Yesu orowaka oYerusalemu onwenle ene puuru

Niireke Iprofesia Sootheene Saamulavula Yesu Saanooniherya Wiira Aari Mesiya?

Moota Biibiliya onaakhula awe

Aayo, maana okathi Yesu aari awe elapo ya vathi, aahimaleliha iprofesia sinceene, saamulavula ‘Mukhulupale Mesiya,’ yoowo aarowa okhala “moopoli a olumwenku”. (Daniyeli 9:25; 1 Yohani 4:14) Nave hata nuumala okhwa, Yesu aahimaleliha iprofesia saamulavula Mesiya. — Esalimo 110:1; Miteko 2:34-36.

Nintaphulela-ni nuulumo noowi “Mesiya”?

Nuulumo na eheeberi noowi Ma·shiʹach (Mesiya), nave nuulumo na ekereku noowi Khri·stos (Kristu), oomanli aya antaphulela “Ole Othanliwe”. Nto nsina noowi “Yesu Kristu”, nintaphulela “Yesu Oothanliwa”, aahiiso “Yesu ti Mesiya”.

Khalai, okathi aalempwa awe Biibiliya, mutthu aanithanliwa ni aanoottihiwa makhura mmuruni, ethoonyeryaka wiira mutthu owo ookhalana okhulupale. (Onamukuttho 8:12; 1 Samuweli 16:13) Yesu oothanliwa ni Muluku wiira okhale Mesiya ni oovahiwa okhulupale ni owerya. (Miteko 2:36) Nto Muluku khomuthanlale omoottihaka makhura mmuruni, masi omuthanlale ni munepa woowaarya. — Matheyo 3:16.

Niireke vanweryaneya atthu anceene omaleliha iprofesia saamuhimya Mesiya?

Nnaari. Ntoko siisaale maakina a impressão digital animooniherya aya mutthu mmosa paahi, nave wiiraneya wa iprofesia sa mBiibiliyani saamuhimya paahi Mesiya, aahiiso Kristu. Nave Biibiliya aahihimya wiira ‘yaamukhumelela maprofeta manceene oowootha, yaarowa waahapuxaka atthu anceene’. — Matheyo 24:24.

Vanweryaneya Mesiya okhumelela muhoolo?

Nnaari, maana Biibiliya aahihimya wiira Mesiya aarowa paahi oyariwa nloko na Davidi a wIsarayeli. (Esalimo 89:4, 5) Masi iliivuru sinooniherya nloko na Davidi soorimeela. Vanikhala wiira sirimenle okathi aroma yaapanhe aya esidade ya oYerusalemu mwaakha wa 70 Nuumala Kristu Orwa.a Nto ti nthowa naya atthu olelo-va ahiniwerya aya osuwelexa akhala wiira Yesu aakhumme nloko na Davidi. Hata vari siiso, iliivuru iyo saahikhala okathi wa Yesu maana hata awanani awe yaanisuwela wiira Yesu aari a nloko na Davidi. — Matheyo 22:41-46.

MBiibiliyani siri iprofesia ikavi sinimuromola Mesiya?

Khivaniweryaneya osuwela mwaattelo wa iprofesia sootheene saamuhimya Mesiya. Mwa ntakiheryo, hata muliivuruni saamulavula saana Mesiya, moota wookontari iprofesia iyo pooti ovirikanaka. Yesaya 53:2-7, onnooniherya itthu sinceene saamuthoonya Mesiya. Nto atthu akina pooti woonaka mwaha wootheene onilavuliwa mpantta ole ntoko eprofesia emosa paahi. Masi akina pooti woonaka khula etthu enihimmwa ntoko iprofesia soovirikana.

Iprofesia sikina sa Mesiya Yesu aamalihenrye awe

Eprofesia	Eri yoolepa ya	Wiiraneya waya
Osuulu wa Abrahamu	Maphattuwelo 22:17, 18	Matheyo 1:1
Osuulu wa Isakhi mwaana a Abrahamu	Maphattuwelo 17:19	Matheyo 1:2
Oyariwa wisarayeli nloko na Yuda	Maphattuwelo 49:10	Matheyo 1:1, 3
Aarowa okhala a nloko na Mwene Davidi	Yesaya 9:6	Matheyo 1:1
Aarowa oyariwa ni mwali	Yesaya 7:14	Matheyo 1:18, 22, 23
Aarowa oyariwa oBethelehemu	Mikeya 5:2	Matheyo 2:1, 5, 6
Aarowa wiitthaniwa Manuwelib	Yesaya 7:14	Matheyo 1:21-23
Aarowa oyariwa etthoko yoohaawa	Yesaya 53:2	Luka 2:7
Nuumala Mesiya oyariwa anamwane axilopwana yaamwiiviwa	Yeremiya 31:15	Matheyo 2:16-18
Aarowa wiitthaniwa wExiitu	Hoseya 11:1	Matheyo 2:13-15
Arowa wiitthaniwa munazarethic	Yesaya 11:1	Matheyo 2:23
Namitthaka aahilokiherya ephiro	Malakhiya 3:1	Matheyo 11:7-10
Oothanliwa okhala Mesiya mwaakha wa 29 Nuumala Orwa Kristud	Daniyeli 9:25	Matheyo 3:13-17
Muluku aahimuhimya okhala Mwanawe	Esalimo 2:7	Miteko 13:33, 34
Aamuttittimiha empa ya Muluku	Esalimo 69:10	Yohani 2:13-17
Aamulaleya ihapari sooreera	Yesaya 61:1	Luka 4:16-21
Olaleerya oGalileya waari muthuko muulupale	Yesaya 9:1, 2	Matheyo 4:13-16
Aahipaka miiriirya ntoko Moise	Otumererya 18:15	Miteko 2:22
Moolikanasa ni Moise, aalavunle itthu sa Muluku	Otumererya 18:18, 19	Yohani 12:49
Aahaavoniha aretta anceene	Yesaya 53:4	Matheyo 8:16, 17
Khaaphavela wiivuwiha	Yesaya 42:2	Matheyo 12:17, 19
Aanaamorela ikharari atthu oohaawa	Yesaya 42:3	Matheyo 12:9-20; Marko 6:34
Aahooniherya exariya ya Muluku	Yesaya 42:1, 4	Matheyo 12:17-20
Namavaha miruku ooloka	Yesaya 9:5, 6	Yohani 6:68
Aahilaleya nsina na Yehova	Esalimo 22:23	Yohani 17:6
Aahiixuttiha ni malikanyiho	Esalimo 78:2	Matheyo 13:34, 35
Mukhulupale	Daniyeli 9:25	Matheyo 23:10
Atthu anceene khiyaamukupali	Yesaya 53:1	Yohani 12:37, 38
Nluku ninkwattuliha	Yesaya 8:14, 15	Matheyo 21:42-44
Aahikhoottiwa ni atthu	Esalimo 118:22, 23	Miteko 4:10, 11
Aahinyokhiwa voohinthowa	Esalimo 69:5	Yohani 15:24, 25
Aamurowa oYerusalemu onwenle ene puuru	Zakariya 9:9	Matheyo 21:4-9
Aanivuwihiwa ni anamwane	Esalimo 8:3	Matheyo 21:15, 16
Aahirwa mwa nsina na Yehova	Esalimo 118:26	Yohani 12:12, 13
Aahirukunuweliwa ni mpatthani awe	Esalimo 41:10	Yohani 13:18
Aahitumihiwa ni musurukhu 30 wa eparathae	Zakariya 11:12, 13	Matheyo 26:14-16; 27:3-10
Apatthani awe yaahimutthyawa	Zakariya 13:7	Matheyo 26:31, 56
Aahootheriwa ni anamoona oowootha	Esalimo 35:11	Matheyo 26:59-61
Aahimaala okathi ootheriwa awe	Yesaya 53:7	Matheyo 27:12-14
Aahiseneliwa	Yesaya 50:6	Matheyo 26:67; 27:27, 30
Yaahimmana vamuru	Mikeya 5:1	Marko 15:19
Aahiwaxuliwa	Yesaya 50:6	Yohani 19:1
Khaakhoottale omaniwa	Yesaya 50:6	Yohani 18:22, 23
Makhulupale a kuvernu yaahimootherya	Esalimo 2:2	Luka 23:10-12
Inawu sawe ni matata saahikhomeliwa vamwirini	Esalimo 22:17	Matheyo 27:35; Yohani 20:25
Ikuwo sawe saahaavereriwa eparakha	Esalimo 22:19	Yohani 19:23, 24
Aahikhomeliwa vamosa ni anatampi	Yesaya 53:12	Matheyo 27:38
Aahiveehiwa	Esalimo 22:8, 9	Matheyo 27:39-43
Ohookhwa mwaha wa anatampi	Yesaya 53:5, 6	1 Pedru 2:23-25
Vaakhala wiira aarooliyaliwa ni Muluku	Esalimo 22:2	Marko 15:34
Aahivahiwa eviinyu yooheliwa makukhu oowaawa	Esalimo 69:22	Matheyo 27:34
Aahivoliwa ntthona ohalaka vakhaani okhwa	Esalimo 22:16	Yohani 19:28, 29
Aahimuroromela okumi awe Muluku	Esalimo 31:6	Luka 23:46
Aahivahererya okumi awe	Yesaya 53:12	Marko 15:37
Aahivaha okumi awe wiira omalihe itampi sahu	Yesaya 53:12	Matheyo 20:28
Makhuva awe khiyaapwexiwe	Esalimo 34:21	Yohani 19:31-33, 36
Aahihommwa	Zakariya 12:10	Yohani 19:33-35, 37
Aahivithiwa ni athaaciri	Yesaya 53:9	Matheyo 27:57-60
Aahihihimuxiwa mookhwaani	Esalimo 16:10	Miteko 2:29-31
Ole anvarinhe aahirantteliwa	Esalimo 109:8	Miteko 1:15-20
Aahikilaathi moono woolopwana wa Muluku	Esalimo 110:1	Miteko 2:34-36

a Ensiclopedia ya McClintock ni Strong ehimmye so: “Vanikhala wiira iliivuru sinilavula nloko ni emusi ya aYuda sirimenle nuumala opwetexiwa Yerusalemu, ohiya ohinatthi opwetexiwa”.

b Elavulelo ya eheeberi nsina noowi Manuweli, nintaphulela wiira: “Muluku ori ni hiyo”. Nto nsina nla, ninnooniherya saana muteko wa Yesu ntoko Mesiya. Orwa wawe valaponi ni itthu aapanke awe, sinnooniherya wiira Muluku ori ni arumeyi awe aahiiso ale animphenta. — Luka 2:27-32; 7:12-16.

c Nuulumo noowi:“Munazarethi” ninkhuma nttaava na eheeberi neʹtser nintaphulela ‘ophuwa’.

d Mwaaphavelaka osuwela soohimmwa sikina siniromola mwaakha wa 29 Nuumala Orwa Kristu, ntoko mwaakha aarowa awe orwa Mesiya, nwehe mwaha oni:“Como a profecia de Daniel predisse a chegada do Messias”.

e Eprofesia ela eri eliivuru ya Zakariya, masi mutthu olempe eliivuru ya Matheyo, aahimmye wiira “yaahiiraneya ele yaahimmwale ni profeta Yeremiya”. (Matheyo 27:9) Ela enooniherya wiira ikwaha sikina eliivuru ya Yeremiya yiirela mpantta iliivuru saitthaniwa “maprofeta”. (Luka 24:44) Moolikanasa, Matheyo ooromola eliivuru ya “Yeremiya” ophavelaka ohimya iliivuru iyo sootheene ohela muhina eliivuru ya Zakariya.