Nweheke mireerelo sinikhumelela mwaha wookhala oopixa murima. Mutthu oopixa murima toohakalala ni toomaaleleya. Ohiya-vo, opixa murima pooti onikhaliherya mookumini mwahu ni mmuupuweleloni mwahu. Okathi nnaapixerya ahu murima atthu akina, ninnikhala apatthani aya. Ohiya-vo, muloko ahu onnikhala woowiirana. Okathi mutthu mukina onninyoonyiha awe, hiyo khannaakuva onanariwa, nave khannihiya wiira mwaha owo winnuwe. (Esal. 37:8; Mir. 14:29) Etthu yuulupale okhala wiira vaavo nnooniherya ahu opixa murima, nimmutakiha Tiithi ahu a wiirimu Yehova nave ninnitepa omwaattamela. Opixa murima mukhalelo wooreera ni onnikhaliherya ootheene ahu. Ekeekhai wiira khivanikhweya okathi wootheene wooniherya opixa murima. Masi nikhaliheriwaka ni Yehova, nnoowerya ohihiya wooniherya mukhalelo owo. Nlelo nlipelelaka elapo esya, nikupaliki wiira “Apwiya t’anasuka ale aniwova: ale anroromela [anlipelela] orera waya murima”. (Esal. 33:18.) Nto nihihiye okhalana mukhalelo ola wooreera wa opixa murima. w23.08 22 etti. 7; 25 itti. 16-17

Yakobo aahimmye wiira mulopwana ole aixoona okhala mutthu oowaamini masi itthu aapaka awe khisaavarihana ni itthu aahimya awe. (Yak. 2:1-5, 9) Nave Yakobo onnilavula sa munna aahiiso murokora ohirina etthu yoowara ni yoolya eniphiyerya khula nihiku, masi mutthu mukina khonipaka etthu wiira omukhaliherye. Hata mutthu owo ohinimukhaliherya ohimyaka wiira onnaamini, masi miteko sawe sinnooniherya wiira khorina waamini. (Yak. 2:14-16) Yakobo onnimulavula Rahabi okhala ntakiheryo nooloka na mutthu aarina waamini ni oonihenrye ni miteko sawe. (Yak. 2:25, 26) Rahabi aahiiwa olavuliwaka sa Yehova ni aanisuwela wiira owo aanaakhaliherya aisarayeli. (Yox. 2:9-11) Nto owo aahooniherya waamini wawe ni miteko aakhapelelaka anamahottela a aisarayeli yaawo okumi aya waari mmaxakhani. Eyo yaahimwiiriha muthiyana ole oottheka ni ahaakhanle mwisarayeli, othokoreriwa okhala naxariya ntoko athokoreriwe awe Abrahamu. Ntakiheryo na Rahabi, ninniniixuttiha wiira waamini wahu ohaana ovarihanaka ni miteko. w23.12 5-6 itti. 12-13

Ntoko makristau, hiyo khanimphavela wiixutta paahi ikeekhai soopacerya sa mbiibiliyani. Nikhaliheriwaka ni munepa woowaarya wa Yehova, ninniphavela wiixutta “hata itthu soowiixerya sa Muluku”. (1aKor. 2:9, 10) Munoonela sai opaceriha yoosoma anyu ya Biibiliya wiira mmwaattamele Yehova? Mwa ntakiheryo, nyuwo pooti otokosa moota Yehova aakhaliherye awe ni waamorela ikharari arumeyi awe a khalai ni moota onoophentaweni. Nave pooti ophavela osuwela moota aisarayeli yaamukokhorela aya Yehova khalai ni moota nimmukokhorela ahu mahiku ala. Woonasa wene nyuwo pooti osoma voohimya sa iprofesia sa Yesu ni moota siiraneyale aya okathi ari awe valaponi. Nyuwo pooti omurumeela Índice das Publicações da Torre de Vigia wala Eliivuru Enaakhaliherya Anamoona a Yehova Otokosa Myaha Sikumiheriwe. Mwiira siiso munoosiveliwaka osoma Nuulumo na Muluku, munoolipiha waamini wanyu ni “munimwixutta wasuwela Apwiya”. — Mir. 2:4, 5. w23.10 18-19 itti. 3-5