Nuulumo murummwa Pedru orumenle awe noowi “vanceenexa” nintaphulela etthu ‘yoowookowa’ aahiiso yootapuruxiwa. Epantta ya nenli ya eversiikulu eyo, ennooniherya etthu enrowa okhumelela akhala wiira nnoophentanaka vanceene. Nnoorowa okhuneela aahiiso khaninrowa owehexexaka ifaalya saya. Mwa ntakiheryo, nkuupuwelani murina ene meesa oonanara ipantta sinceene. Exeeni mukhanle anyu oopaka wiira ipantta iyo sihooneyeke? Etthu mukhanle anyu oopaka, ori okuxa ekuwo ‘mukhuneela’ meesa ootheene ohiya paahi epantta emosa aahiiso piili sihireere onanara. Moolikanasa, vakhala wiira nnimwaaphentaka vanceenexa anna ni arokora, vanooweryaneya okhuneela aahiiso waalevelela ohiya paahi efaalya emosa wala piili, masi “itampi sinceene”. Nihaana okhalana ophenta woolipa, wiira niwerye olevelela ifaalya sa anna ni arokora hata ikwaha sikina vaxankihaka. (aKol. 3:13) Okathi nnaalevelela ahu, ninnooniherya wiira nookhalana ophenta woolipa nave ninniphavela omuhakalaliha Yehova. w23.11 11-12 itti. 13-15

Okathi mwene Yosiya arina awe iyaakha 26, aahipacerya olokiherya etemplo. Waari okathi ene yoowo, yaaphwanyiwe aya “eliivuru ya Nlamulo na Yehova, aavahereriwe awe Moise”. Okathi mwene iiwale awe eliivuru ele esommwaka, aahipaka marukunuxo moowakuveya wiira iiwelele itthu saalempwale muliivuruni mmo. (2Wah. 34:14, 19-21) Niireke munniimananiha omusoma Biibiliya khula nihiku? Vakhala wiira ti siiso niireke onnookhaliheryani? Niireke munnilepa iversiikulu sinrowa wookhaliheryani? Okathi Yosiya aarina awe iyaakha 39, owo aahipaka etthu yoohiloka yaamwiirinhe okhwa. Ohiya omuroromela Yehova, Yosiya aarimwiiroromela. (2Wah. 35:20-25) Eyo enniniixuttiha etthu. Moohicikha iyaakha nirina ahu aahiiso iyaakha nivirinhe ahu nimurumeelaka Yehova, ootheene ahu nihaana ohihiya omwaattamela. Wiira nipake eyo nihaana khula okathi onvekelaka Yehova malakiheryo, omusoma Biibiliya ni ovaha ephoole miruku ninvahiwa ahu ni makristau arina waamini woolipa. Mwiira siiso, enimookhaliheryani ohipaka itampi suulupale, nave enimookhaliheryani okhala oohakalala. — Yak. 1:25. w23.09 12 itti. 15-16

Biibiliya, onnaaromola athiyana anceene yamphenta ni yaamurumeela Yehova. Athiyana awo yaanisuwela “wiiphimela itthu sotheene” ni yaari ‘oororomeleya mwa itthu sootheene’. (1Tim. 3:11) Olelo-va, mmulokoni aakhala arokora anceene arina waamini woolipa, yaawo arokora aximwali akhanle aya oowaatakiha. Niireke munnimusuwela murokora orina ntakiheryo nooloka mukhanle anyu ootthara? Nweheke mikhalelo xeeni orina awe, nuumala-vo, muupuweleke moota mukhanle anyu ootakiha mikhalelo iyo. Wiiyeviha, mukhalelo wa faita makristau anireerela aya okhalana. Akhala wiira murokora toowiiyeviha, onookhalana ompatthani wooloka ni Yehova ni atthu akina. Mwa ntakiheryo, muthiyana onimphenta Yehova ni oowiiyeviha onniiwelela malakiheryo akumiheriwe ni Yehova voohimya sa okhala muhooleli. (1aKor. 11:3) Malakiheryo awo, Yehova oomuhimya mutthu okhanle ookhapelelaka muloko ni emusi. w23.12 18-19 itti. 3-5