Hiyo nnoowerya owooniherya niphento anna ni arokora, naataanaka naawo ni oviriha okathi niri ene hoothe. (2aKor. 6:11-13) Miloko sinceene olelo-va, aakhala anna ni arokora yaawo arina mikhalelo ni mahuweliwo oovirikana. Nnoowerya wuncererya waaphenta wahu anna ni arokora awo, akhala wiira nnoowehexexaka mikhalelo saya sooloka. Okathi nnaaweha ahu atthu akina ntoko Yehova onaaweha awe, ninnooniherya wiira ninnaaphenta. Okathi wa maxakha maalupale, nnoorowa opirisariki waaphenta anna ni arokora. Okathi wa maxakha maalupale Yehova onrowa onikhapelela sai? Nkawehani etthu Yehova aalenle awe arumeyi awe okathi yaatupheliwe aya ni ababilonia. Yehova aalenle so: “Nyuwo atthu a nloko naka, mutthikele owannyu: mwiwaleleke mpa mwinyu, mulipihe masele [mikhora]. Mwipitheke okathi vakhani, mpakha ovira oviruwa w’Apwiya”. (Yes. 26:20) Woonasa wene, Yehova pooti orowa onivekelaka opaka etthu emosara-ru, okathi wa maxakha maalupale. w23.07 6-7 itti. 14-16

Niireke ninnisuweliwa okhala atthu oohithipelela? Mwiikoheke so: ‘Kiireke atthu akina annikisuwela ntoko mutthu onaathokorerya saana atthu akina, ooleva ni nkinaakhanyererya atthu akina moonelo aka? Kiireke atthu anikisuwela okhala mutthu oothipelela? Kiireke kinniiwelela ni otthara miyoonelo sa atthu akina?’ Makoho ala, anoonikhaliherya woona akhala wiira ninnimutakiha Yehova ni Yesu. Hata makhalelo ahu aturukeyaka, nihaana ohithipelela itthu sa khalai ni waakuva wiilimaleliha makhalelo masya. Nto oturukeya iwo wa makhalelo ahu, pooti oniphwanyihaka mixankiho nahaalipelela ahu. Mwa ntakiheryo, hiyo pooti oniphwanyaka oretta mootutuxerya, othoiwa musurukhu, aahiiso oniphwanya mixankiho sinikumiheriwa ni ahooleli a mulaponi. (Mus. 9:11) Ikwaha sikina, pooti onixankiha okathi mutthenkeso wa Yehova onnivekela awe othaamela mapuro makina aahiiso onituruka awe yoothanleliwa ahu. Vanniweryaneya olimalela makhalelo masya. Masi ninrowa owerya sai opaka eyo? Nnoowerya akhala wiira nnimwiimananiha opaka itthu 4 sinittharelana: (1) Npakeke itthu moovarihana ni makhalelo anyu aniinaano, (2) muhuupuweleleke itthu siiraneyale khalai, (3) muupuweleleke itthu sooloka murina anyu aahiiso muniwerya anyu opaka, ni (4) mwaakhaliheryeke atthu akina. w23.07 21-22 itti. 7-8

Profeta Daniyeli aari mmiravo, okathi ababilonia yaamukunxe aya elapo aayariwe awe oYerusalemu, amuroihaka oBabilonia ntoko epottha. Masi nnaamwi Daniyeli aari mmiravo, atthu ale yanvanre yaahisiveliwa vanceene nuuwo. Alopwana ale yaahoona wiira Daniyeli aari “òrera ni òhirakala”, nave aayariwe etthoko ya atthu oovuwa. (1Sam. 16:7) Ti nthowa naya ababilonia yaaphavenle aya omwiixuttiha Daniyeli wiira okhaleke vatthokoni va mwene. (Dan. 1:3, 4, 6) Yehova aanimphenta Daniyeli, mwaha wa makhalelo awe ni yoothanla aapanke awe nnaamwi nlelo aari mmiravo. Woonasa wene Daniyeli aarina iyaakha 20 paahi, okathi Yehova aamulikanyinha awe ni Nowe ni Yoobi, yaawo yaamurumenle Yehova mwa iyaakha sinceene. (Maph. 5:32; 6:9, 10; Yoobi 42:16, 17; Ezek. 14:14) Nave Yehova khaahiyale omphenta Daniyeli okumi awe wootheene. — Dan. 10:11, 19. w23.08 2 itti. 1-2