Murummwa Pedru aari oororomeleya, nave kheemerenrye wiira etthu nnakhala mutthu omuhiihe omutthara Yesu. Mwa ntakiheryo, aahooniherya okhala oororomeleya okathi awiixutti yaahaiwexenxa aya etthu Yesu aahimmye awe. (Yoh. 6:68) Okhala wiira khiyaalipelenle otthokiheriwa etthu yahaiwexenxa aya, atthu anceene yaahihiya omutthara Yesu. Masi Pedru khaahiyale. Owo aari oororomeleya ni aahihimya wiira Yesu paahi torina “moolumo a okumi woohimala”. Yesu aanisuwela wiira Pedru ni arummwa akina yammunyanyala. Hata vari siiso, Yesu aahimuhimeerya Pedru oriki koosuwela wiira khamunrowa ohiya okhala oororomeleya. (Luka 22:31, 32) Yesu aanisuwela wiira “murima onniphavela tthiri, masi erutthu teri yootteettheya”. (Mar. 14:38) Yesu khaamunyanyanle Pedru, hata okathi yoole yena aahimmye awe wiira khaamusuwela. Nuumala ohihimuxiwa, Yesu aahimukhumelela Pedru ori ene mekhawe. (Mar. 16:7; Luka 24:34; 1aKor. 15:5) Aahimulipiha Pedru nnaamwi aakhulumunwe mwaha wa itthu soohiloka aapanke awe! w23.09 22 itti. 9-10

Muluku onnilevelela itampi saya atthu yaale animwaamini. Owo onnaalevelela moomalela ni khonuupuwela-tho soovonya saya. (Esal. 32:1, 2) Yehova onnimuthokorerya mutthu okhala naxariya ni oohittheka, mwaha wa waamini wawe. Abrahamu, Davidi ni arumeyi a Yehova oororomeleya, yaahiitthaniwa okhala anaxariya. Masi hata vari siiso, awo yaari atthu oottheka ni anatampi. Mwaha wa waamini waya, Yehova aahaathokorerya okhala atthu oohittheka, naalikanyiha ni ale yahaamurumeela. (aEef. 2:12) Ekarta murummwa Paulo aalepenle awe aroma, aahitthokiherya wiira nihaana okhalana waamini, naaphavelaka okhala apatthani a Muluku. Ntoko Abrahamu ni Davidi, akhala wiira nnoomwaamini Yehova, nnookhala apatthani awe. w23.12 3 itti. 6-7

Olelo-va, makristau ootheene aakhalana eparakha ya onvaha Yehova mikuttho saya, eyo piiyo, arumeelaka okathi aya, ikuru saya ni mireerelo saya wiira akhaliherye miteko sa Omwene wa Muluku. Ninnooniherya wiira ninnivaha efaita eparakha eyo, nimurumeelaka Yehova ni ninvahaka ele ninwerya ahu. Murummwa Paulo aahilavula itthu nikhanle ahu oopaka wiira nimukokhorele Yehova. (aHep. 10:22-25) Itthu iyo sinihela muhina onvekela Yehova khula okathi, waalela atthu akina sa nlipelelo nahu, ohicompela mithukumano ni ‘olipihana mukina ni mukhwaawe, vanceenexa vaavo nnoona ahu wiira nihiku na Yehova ninnaattamela’. Eliivuru ya Wiisuupulula ninniphwanya ele nlaikha naahimmye aya. Nlo naahimmye so: “mmukokhoreleke Muluku”. Nlaikha nlo naahilavula moolumo ala ikwaha piili, nooniheryaka wiira yaahikhalana efaita yuulupale. (Wis. 19:10; 22:9) Nihiliyale itthu iya niixuntte ahu sa etemplo ya Yehova ya omunepani ni eparakha nrina ahu ya omukokhorela Muluku ahu, Yehova! w23.10 29 itti. 17-18