Yesaya
31 Aatakhaliwa ale anirowa wExiitu, aphavelaka okhaliheriwa,+
Yaawo aniroromela ikhavalo,+
Aniroromela ikaaro sinceene sa ekhotto, sinipuruliwa ni inama,
Ni anaaroromela anakhavalo, mwaha woowi toowerya.
Masi awo khanimuroromela Muluku Oowaarya a Isarayeli,
Nave khanimwaavya Yehova.
2 Owo ta miruku ni onookumiherya maxakha,
Nave onoopaka etthu olavunle awe.
Onimwaahukhumu atakhali,
Ni ale anaakhaliherya atakhali awo.+
3 Atthu a wExiitu khahiyo Muluku, awo apinaatamu paahi;
Ikhavalo saya inama paahi, khahiyo ikuru sihinooneya.+
Okathi Yehova oneemexa awe ntata nawe,
Khula mutthu onaakhaliherya atthu akina onoomora,
Nave ole onikhaliheriwa onoomora.
Ootheene aya animookhwa okathi omosa-ru.
4 Yehova ookileela wiira:
“Siisaale kharamu, eyo piiyo, kharamu mwaamukhaani ni a ikuru, onoopa awe murukulu mwaha wa enama ovanre awe,
Ohinoopopiheya awe mwaha wa amakampusi anceene anithukumana,
Wiira amoomole akhuwelaka,
Nnakhala ohinoova awe mwaha wa onyakula waya,
Siiso-tho, Yehova a anakhotto onookhuruwa wiira owane ekhotto,
Mwaha wa mwaako Siyoni ni mapuro aya oottukhuwa.
5 Ntoko mwaapalame onivava onaakhapelela awe axaana awe, siiso-tho, Yehova a anakhotto onimwaakiha muttetthe wa oYerusalemu.+
Owo onimwaakiha ni onimoopola.
Onookhapelela ni onimwaakiherya”.
6 “Nyuwo atthu a Isarayeli, mmutthikele ole mulakenle anyu ohimwiiwelela.+ 7 Okathi owo, munimwaakhootta amuluku anyu eethiru a eparatha ni amuluku anyu a eweero ahirina efaita, yaawo mwaapanke anyu ni matata anyu. Nto eyo etampi.
8 Nave asiiria animwiiviwa ni espaata,* masi ohiya ya pinaatamu.
Awo anoomiriwa ni espaata, masi ohiya ya pinaatamu.+
Asiiria awo anootthyawa mwaha wa espaata,
Nave amiravo aya, anoovarihiwaka muteko wookhanyereriwa.
9 Ole yaamuroromela aya,* onimookhwa mwaha wa woova,
Nave makhulupale aya, animoova mwaha wa esinaale yeemexiwe”.
Moolumo ala onihimya ti Yehova, yoowo muthuko awe onipatta oSiyoni ni efornu awe eri oYerusalemu.