Yesaya
17 Muhupi woophukela oniroihiwa oDamaasiko, tuula:+
2 Ipooma sa wAroweri,+ khasinrowa okhaliwaka;
Makoto a inama anrowa wumpaathiki memmo,
Khuuvo onrowa woopopihaka inama iyo.
3 Yehova a anakhotto onihimya wiira:
Ipooma sa wEfrayimi+ sinoolakaseya,
Nave omwene wa oDamaasiko+ onoomala,
Ovuwa wa atthu a oSiiria ahanle, onrowa olikanaka ni ovuwa wa anamwane a Isarayeli”.
4 “Nihiku nno, ovuwa wa Yakobe onoovukuwa,
Nave erutthu awe yooneneva enimootta.
5 Onrowa okhalaka ntoko mulipa-oohepha onithukumanya ipyo mmatta,
Yoowo onihepha etiriku ni moono awe.
Onrowa okhalaka ntoko mutthu onittottela ipyo nxepa* na oRefayimi.+
6 Yehova Muluku a Isarayeli, onihimya wiira: Sinrowa ohala paahi mihokorokho vakhaani sa olivera,
Ntoko vaniiraneya aya okathi onitathiwa aya mwiri wa olivera.
Eritta yoorakamelaxa osulu, sinrowa ohala mihokorokho miili aahiiso miraru paahi soottokottha.
Eritta eniima vanceene, sinrowa ohala mihokorokho mixexe aahiiso mithanu paahi”.+
7 Nihiku nlo, mutthu ononvekelaka Mpattuxa awe wiira omukhaliherye, nave onrowa omuroromelaka Muluku Oowaarya a Isarayeli. 8 Khonrowa waaroromelaka altaari,+ yaawo aapanke awe ni matata awe.+ Nnakhala khonrowa ororomelaka itthu opanke awe ni ikatha sawe, sikhale miri soowuuma onikokhorela awe* aahiiso mapuro anipahiwa nsenso.*
9 Nihiku nno, ipooma soolipihiwa sinrowa olikanaka ni nipuro nihinkhaliwa niri mutakhwani,+
Ntoko eritta enyanyaliwe ohoolo wa aisarayeli;
Iyo sinrowa okhala milepe.
Tivonto munipaka anyu ixarti sooreera,
Munaala memmo miri sinikhuma ilapo sikina.*
11 Othana, munnitekelela saana ematta anyu,
Voosiisu, munnimeliha itthu mwaalale anyu,
Masi itthu munrowa anyu ohepha, sinoolakaseya nihiku munrowa anyu owereiwa ni woona owereya ohinimala.+
12 Mwiiwe! Aakhala atthu anceene ahiniiwanana,
Yaawo aninyakulihana ntoko oruma wa maasi a mphareya!
Maloko anninyakula,
Onyakula waya onlikana ni oruma wa maasi manceene!
13 Maloko anninyakula ntoko oruma wa maasi manceene.
Muluku onoopwapwela maloko awo, nto awo anootthyawela ottaiwene,
Awo anoovavihiwa ntoko ikavava siri vamwaako, seiyo sinivavihiwa ni epheyo,
Ntoko malaxi oowuuma anivavihiwa ni nayuupuri.
14 Vahalaka wiila, awo anniwoopopiha atthu.
Varowaka oxa, awo khanikhala-tho.
Ela ti etthu aniliviwa aya atthu anniiyerya,
Ni anaakhela aya ale anikuxa mireerelo sahu.