Yesaya
19 Muhupi woophukela oniroiheliwa wExiitu, tuula:+
Moone! Yehova oowela neeku nawe noowaakuveya ni onnikela wExiitu.
Amuluku eethiru a wExiitu, annittettemela ohoolo wawe,+
Mirima sa atthu a wExiitu sinimoova vanceene.
2 “Kinoowiiriha atthu a wExiitu otuphelana yaawo-ru,
Awo anoowana yaawo-ru,
Khula mmosa onoowana ni munnawe ni ole aattamanne awe,
Epooma emosa enoowana ni epooma ekina, omwene mmosa onoowana ni omwene mukina.
3 Nave atthu a wExiitu anooxanka,
Miyo kinimwaahonona apalano aya.+
Awo animwaaroromelaka amuluku aya,
Ni anamaxintta, anookhwiri ni anahako.+
4 Pwiya eekeekhai, Yehova a anakhotto onihimya wiira:
Kinimwaavahererya atthu a wExiitu pwiya ootakhala, nto mwene ootakhala tonrowa waalamulelaka”.+
5 Maasi a mphareya animuuma,
Nave muro onoowelela ni onimuuma.+
6 Miro sinrowa wunkhaka vanceene;
Miro saamukhaani sa muro Niilo a wExiitu, sinoowelela ni sinimuuma.
Marekele ni anammese* anrowa onyaala.+
7 Miro siri mukerekhere mwa muro Niilo, opuro onimalela aya muro owo,
Ni imatta sootheene saaliwe ipyo mukerekhere mwa muro Niilo+ sinimuuma.+
Itthu sootheene siri mmatta-mmo sinoovavihiwa ni epheyo, khasinrowa okhala.
8 Nave atthu antotha ihopa anooriipiwa murima,
Ale anaarihela acoolo mmuro Niilo, animwiikhupanyerya,
Nave atthu anrihela matthavi aya mmaasini, anoovukuwa.
9 Ale anipaka ikuwo sa eliinyu,+
Ni ale anitthava ikuwo sa nxotte, animuulihihiwa muru.
10 Atthu anitthava ikuwo, anooriipiwa murima;
Anamuteko ootheene aniliviwa, anooriipiwa murima.
11 Makhulupale a oSowani,+ alolo.
Asuweli aninvaha miruku Farawo, anninvaha miruku soohikhalela.+
Vaniweryaneya sai omuleela Farawo wiira:
“Miyo kiyariwe nloko na asuweli,
Nloko na mamwene a khalai”?
12 Vano, asuweli anyu ari vai?+
Yooleeleni akhala wiira annisuwela etthu Yehova a anakhotto, olakenle awe wiiriha elapo ya wExiitu.
13 Makhulupale a oSowani, ahiira itthu sa elolo;
Makhulupale a oNofi,*+ aawokiwa;
Maxeefi a mahimo a wExiitu ahaahapuxa atthu a wExiitu.
14 Yehova oowaakanyerya atthu a wExiitu;+
Nave ahooleli a wExiitu, ahaahapuxa vanceene atthu a wExiitu,
Ntoko namuhapaliwa ontherekuwa vamarapheyoni vawe.
15 Nave atthu a wExiitu khanrowa owerya opaka etthu,
Akhale makhulupale aahiiso acikhaani,* akhale atthu oovuwa aahiiso ahinooniwa okhala etthu.*
16 Mahiku awo, atthu a wExiitu anrowa ottettemelaka ni woova vanceene ntoko athiyana, mwaha wa Yehova a anakhotto onrowa weemexa ntata nawe noowerya wiira aahukhumu.+ 17 Nave elapo ya oYuda, enrowa woopopiha elapo ya wExiitu. Atthu a wExiitu anrowa woovaka, okathi anrowa aya wiiwa elavuliwaka elapo ya oYuda, okhala wiira annisuwela wiira yookhala etthu Yehova a anakhotto onrowa awe owiiriha.+
18 Mahiku awo, sinookhala ipooma thanu sa elapo ya wExiitu, sinrowa olavulaka nttaava na akanaani+ ni anoolaphaka wiira anrowa ororomeleyaka wa Yehova a anakhotto. Epooma emosa enrowa ovahiwa nsina noowi Muttetthe wa Opwetexiwa.
19 Mahiku awo, eriyari ya elapo ya wExiitu, onookhala altaari onrowa otekeliwa Yehova. Nave mmukanoni mwa elapo eyo, enimweemexiwa epilaari para Yehova. 20 Itthu iyo sinrowa okhala esinaale wiira atthu amuupuweleke Yehova a anakhotto, wExiitu. Awo anoomukhuwelela Yehova mwaha wa atthu anaahaaxa. Nto owo onimwaaroihela moopoli muulupale, wiira owoopole. 21 Mahiku awo, Yehova onimwiisuweleiha atthu a wExiitu, nave atthu wExiitu anoomusuwela Yehova. Awo anonvaha mikuttho ni itthu sikina. Nave-tho, awo anommanela natiri Yehova ni anoomutaphula natiri owo. 22 Yehova onimwaavaha ehukhumu atthu a wExiitu+ ni onimwaapenuxa. Atthu awo anootthikela wa Yehova. Nto owo onoowiiwa okathi anrowa aya omuxonttela ni onimwaapenuxa.
23 Mahiku awo, enookhala estaraata+ enrowa okhuma wExiitu erowaka wAsiiria. Vano atthu a wAsiiria anoorowaka wExiitu, nave atthu a wExiitu anoorowaka wAsiiria. Nto atthu a wExiitu ni atthu a wAsiiria, anrowa omurumeelaka Muluku hoothe. 24 Mahiku awo, atthu a wIsarayeli anrowa okhala nloko na neeraru ninrowa otakaahana ni atthu a wExiitu ni a wAsiiria.+ Atthu a Isarayeli anrowa okhala mareeliho para atthu ootheene anikhala elapo ya vathi, 25 okhala wiira Yehova a anakhotto ohaareeliha, iiraka: “Areelihiwe atthu aka, eyo piiyo, Exiitu, vamosa ni aSiiria yaawo kaapanke aka ni matata aka. Nave areelihiwe aisarayeli, yaawo kihiyeriwe aka”.+