Yesaya
21 Muhupi woophukela oniroiheliwa muttetthe wa woothakoni onilikana ni ephareya,* tuula:+
Ennoorwa ehasara enlikana ni nayuupuri, ekhumaka osuuli,
Ekhumaka woothakoni, ekhumaka elapo yoowoopiha.+
2 Kihooniheriwa etthu ela yoowoopiha:
Elapo yoowoka, enniwoka,
Nave elapo enipwetexa, ennipwetexa.
Nyuwo atthu a wElami, muroweke ohoolo! Nyuwo atthu a oMedia, mwaatuphele!+
Kinoomaliha ohaawa wootheene muttetthe owo waakumihenrye aya atthu.+
3 Mwaha wa etthu koonihiwe aka, miyo kooriipiwa murima vanceene.*+
Kinnoona owereya,
Ntoko owereya onoona awe muthiyana oniyara.
Kookhulumuwa vanceene, vahiniwerya aka wiiwa;
Kooxanka vanceene, kihiniwerya aka woona.
4 Murima aka onookivava; kinnoova vanceene.
Ohiyu kaalipelela aka vanceene, onnikiiriha ottettemela.
5 Mulokiherye meesa ni mwaarumari ikhatera!
Mulyeeke ni nwuryeke!+
Nyuwo makhulupale, nvenye muhele makhura nikula na wiixaakihana!*
6 Etthu Yehova okihimenrye awe tiila:
“Murowe, mwampwehe kwarta wiira ohimyeke etthu onoona awe”.
7 Owo aahiweha ekaaro ya ekhotto yaapuruliwa ni ikhavalo piili,
Ekaaro ekina ya ekhotto yaapuruliwa ni apuuru,
Ekaaro ekina-tho ya ekhotto yaapuruliwa ni ikamelo.
Owo aahiweha ni ephoole, aayo, ephoole yinceene.
8 Nto owo aahikhuwela ntoko kharamu, iiraka:
“Nyuwo Yehova, miyo kinneemela nipuro na mulipa-oowehaweha, khula nihiku, othana wootheene,
Nave kinneemela nipuro kiniwehaweha aka khula nihiku, ohiyu wootheene.+
9 Mooneke etthu enirwa:
Annoorwa alopwana awenle ene ekaaro ya ekhotto enipuruliwa ni ikhavalo piili!”+
Nuumala-vo, aahilavula iiraka:
“Oomora! Babiloonia, oomora!+
Ilatarato sootheene sa amuluku aya eethiru, soopwexakaseriwa vathi!”+
10 Nyuwo atthu aka, muneepetthiwa ntoko ipyo,
Nyuwo muri ipyo sa nipuro naka nneepetthiwa etiriku,+
Kihooleelani etthu kimwiiwale aka Yehova a anakhotto, Muluku a Isarayeli.
11 Muhupi woophukela oniroiheliwa oDuma,* tuula:
Ookhala onikikhuwelela okhumaka oSeyiri, iiraka:+
“Nyuwo mulipa-oowehaweha, ohiyu ola oneetta sai?
Nyuwo mulipa-oowehaweha, ohiyu ola oneetta sai?”
12 Mulipa-oowehaweha owo, aahaakhula wiira:
“Voosiisu onnoorwa, nave ohiyu onnoorwa.
Mwaaphavelaka okoha, mukoheke.
Mutthikeke-tho ekwaha ekina!”
13 Muhupi woophukela oniroiheliwa othako woowaataleya, tuula:
Nyuwo atthu a oDedani,+ muneetta mukwaha ni ikamelo,
Nvirihe ohiyu mutakhwani ni moothakoni moowaataleya.
14 Nyuwo atthu anikhala elapo ya oTema,+
Mwaaroihele maasi ale avoliwe ntthona,
Mwaroihele eyoolya ale anitthyawa elapo aya.
15 Awo anitthyawa espaata,* espaata yeeyo evareleliwe mmatatani,
Anitthyawa muura wookokhiwa ni anitthyawa ekhotto yooviha.
16 Etthu Yehova okilenle awe tiila: “Ntoko eniiraneya aya ni namuteko oniliviwa, ovuwa wootheene wa oKedari+ onoomala muhina mwa eyaakha emosa. 17 Eriyari ya anakhotto a oKedari, ale anivonya mattheere,* anrowa ohala vakhaani, okhala wiira Yehova Muluku a Isarayeli, tolavunle”.