Yesaya
23 Muhupi woophukela oniroiheliwa oTiiro, tuula:+
Nyuwo apakiti a oTaarisi, mwiikhupanyeryeke!+
Epoortu* yoonyaanyiwa, khivaniweryaneya ophiya.
Nyuwo mooleeliwa muri ene oKitimi.+
2 Mmaale nyuwo atthu munikhala ophareya.
Alipa a nakoso a oSiidoni,+ yaawo anivira mphareya, aawiirihani othaaciri.
3 Etiriku ya oSihori,*+ ni itthu saahemphwa mukerekhere mwa muro Niilo, saanivirihiwa mmaasini.
Nto muttetthe wa oTiiro, waanithaaciri mwaha wa itthu iyo.
Nave itthu iyo saaniphwanyiha mureerelo ilapo sikina.+
4 Nyuwo muttetthe wa oSiidoni, muri oolipa ni mutekiwe waattamela mphareya, muuliwe muru,
Okhala wiira ephareya yoohimya wiira:
“Miyo nkoonale owereya onimphwanya muthiyana ohanle oyara, nnakhala nkiyanre,
5 Atthu anooxanka okathi anrowa aya wiiwa ihapari sa oTiiro,+
Ntoko siisaale yaaxankale aya okathi yaiwale aya ihapari sa wExiitu.+
6 Mulapuwele muttetthe wa oTaarisi!
Nyuwo atthu munikhala waattamela ophareya, mwiikhupanyeryeke!
7 Epooma anyu ti yeela atthu yahaareere aya otteeliwa murima okhuma khalai?
Atthu a epooma eyo, yaanithaamela ilapo sa ottaiwene.
8 Ti pani olamunle etthu ela wiira yiiraneye muttetthe wa oTiiro,
Yoowo waakawa ikhara,
Nave alipa a nakoso aya yaari makhulupale,
Nave-tho anamarotta aya yaattittimihiwa mulaponi mootheene?+
9 Yehova a anakhotto, tolamunle etthu ela,
Wiira omalihe wiixinnuwiha waya, mwaha wa oreera waya,
Ni wiira owuulihihe muru atthu ootheene oottittimihiwa a mulaponi mootheene.+
10 Nyuwo mwaana mwaamuthiyana a oTaarisi, mmwareele mulaponi ntoko oniira awe muro Niilo.
Okhala wiira khokhanle opuro aneemela apakiti.*+
11 Owo ohookolela ntata nawe ophareya;
Ooxekexa ilapo sa mamwene.
Yehova ooruma opwexakasiwa ipa soolipihiwa sa oFeniisia.+
12 Owo onihimya wiira: “Nyuwo mwaana mwaamuthiyana a oSiidoni onihaaxiwa,
Khamunrowa-tho otteeliwa murima.+
Nvenye, mulapuwele oKitimi.+
Hata weiwo, khamunrowa ophumurya”.
13 Nwehe elapo ya oKhaldeya.+
Ti akhaldeya yaawo, yiirinhe elapo ela okhala opuro wa axinama a moothakoni,
Ohiya atthu a wAsiiria.+
Awo aateka ipa saya sa ekhotto ni aarukurerya ipooma iyo,
Nave aapwexakasa ipooma saya soolipihiwa,+
Ni ahiiriha ipooma iyo okhala milepe.*
14 Nyuwo apakiti a oTaarisi,
Mwiikhupanyeryeke, okhala wiira ipa sanyu soolipihiwa, soopwexiwa.+
15 Mahiku awo, muttetthe wa oTiiro onooliyaliwa iyaakha 70,+ iyaakha seiyo mwene mmosa onikhala awe mukumi. Nuuvira iyaakha 70, muttetthe wa oTiiro enimwiiraneya etthu enihimya aya nsipo na muthiyana namararuwa, nenno nnihimya so:
16 “Mmukuxe viola anyu, nyuwo muthiyana namararuwa muliyaliwe, mweetteetteke mpooma.
Mmoopeke oratteene viola anyu,
Mwiipeke masipo manceene,
Wiira atthu awuupuwelekeni”.
17 Samala iyaakha 70, Yehova onimuupuwela muttetthe wa oTiiro. Muttetthe owo onootthikela miteko sawe, oraruwaka ni ilapo sootheene sa moolumwenkuni. 18 Masi musurukhu onrowa awe oliviwa ni eluukuru awe, sinrowa okhala ntoko itthu soowaarya sinivahiwa Yehova. Itthu iyo khasinrowa othukumanyiwa nnakhala osukiwa, okhala wiira itthu iyo anrowa ovahiwa atthu a Yehova, wiira alyeeke mpakha ovona ni awareke ikuwo sooreera.+