Ezekiyeli
32 Eyaakha ya namuloko nenli, mweeri wa namuloko nenli, nihiku noopacerya na mweeri owo, kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mwiipe nsipo na wiikhupanyerya nimmuhimya Farawo, mwene a wExiitu, mwiiraka:
“Nyuwo mwaalikana ni kharamu mwaamukhaani ni ootupa a maloko,
Masi mwaahimaalihiwa.
Nyuwo mwaalikana ni mwaamunama oowoopiha a mphareya,+
Mwaanutuwanya maasi ni inawu sanyu ni mwaninanariha miro’.*
3 Etthu onihimya awe Pwiya Muulupalexa Yehova, tiila:
‘Kirumeelaka ekurupu ya maloko manceene, kinimooreyani ntthavi naka,
Nto awo animoovarani muntthavini mwaka nooxaya.
4 Miyo kinimoonyanyalani mulaponi,
Kinrowa woorihelani opuro woowaataleya.
Kinoowiiriha axipalame ootheene anivava musulu weemela mulaponi mwanyu,
Nave kinimwiiriha inama sootheene sa mutakhwani okhuura erutthu anyu, mpakha ovona.+
5 Erutthu anyu kinoorihela omiyaakoni,
Nave kinoosariha maxepa ootheene ni ipetaaso sa murutthu anyu.+
6 Miyo kinoosaariha elapo ni ephome enikhuma mwerutthuni mwanyu, mpakha ophiya vasulu va miyaako,
Nto ephome eyo enoosareya mmikotini* mwa miro’.
7 Okathi munrowa anyu opwetexiwa, miyo kinookhuneela erimu, nave kinimwiiriha itheneeri oriipela.
Kinookhuneela nsuwa ni meeku,
Nave mweeri khonrowa waaryaka.+
8 Mwaha wa nyuwo, kinoottipiha mithuko sootheene sinaarya wiirimu,
Nave kinookhuneela elapo anyu ni epiphi’. Pwiya Muulupalexa Yehova tonihimya.
9 ‘Miyo kinoothukumeliha mirima sa atthu anceene, okathi kinrowa aka waakuxa atthu anyu weepotthani, kaaroihaka maloko makina,
Kaaroihaka ilapo muhinsuwela anyu.+
10 Miyo kinoowiiriha atthu a maloko manceene otikinihiwa,
Nave mamwene aya anoothukumela ni woova mwaha wa nyuwo, okathi kinrowa aka orumeela espaata* aka ohoolo waya.
Awo anoothukumela voohihiyererya, khula mmosa oovaka wiiviwa,
Nihiku na opwetexiwa wanyu’.
11 Etthu onihimya awe Pwiya Muulupalexa Yehova, tiila:
‘Espaata ya mwene a oBabiloonia enimootuphelani.+
12 Miyo kinimwiiriha muttitthi wa atthu a wExiitu wiiviwa ni espaata ya anakhotto ootupa,
Yaawo ootheene aya ari ootepa otakhala eriyari ya maloko ootheene.+
Awo anoomala-maliha wiixinnuwiha wa atthu a wExiitu, nave anoomala-maliha+ muttitthi wootheene wa atthu a wExiitu.
13 Kinoomala-maliha inama sawe sootheene, seiyo siniwurya maasi awe oowaatta,+
Inawu sa atthu ni itthottopwa* sa inama, khasintthikela-tho onanariha’.+
14 Pwiya Muulupalexa Yehova onihimya wiira: ‘Okathi owo, miyo kinooreeriha maasi aya,
Nave kinimwiiriha miro saya ovira ntoko makhura.
15 Okathi kinrowa aka wiiriha wExiitu okhala othako ohinikhaliwa, elapo ekuxiwe itthu sootheene saari memmo,+
Okathi kinrowa aka waapwetexa atthu ootheene a elapo eyo,
Awo anoosuwela wiira miyo ka Yehova.+
16 Nla nsipo na wiikhupanyerya, tthiri atthu animwiipa nenna,
Anamwane axithiyana a maloko makina animwiipa.
Awo animwiipa ahimyaka elapo ya wExiitu ni muttitthi wa atthu a weiwo’. Pwiya Muulupalexa Yehova tonihimya”.
17 Eyaakha ya namuloko nenli, nihiku na namuloko neethanu na mweeri ene yoowo,* kaahisuwelihiwa moolumo a Yehova yaahimya wiira: 18 “Nyuwo mwaana a mutthu, mukhupanyerye muttitthi wa atthu ori wExiitu, nave mwaaroihe vathi, opuro woowiixa wa elapo, akhale awo, anamwane axithiyana a maloko oowerya, vamosa ni ale anikhuruwela mulittini.*
19 “‘Nyuwo munuupuwela wiira mwa mutthu oolokexa waavikana akina? Nyuwo munimookhwa, nave munrowa wumpaathi ni atthu oohinnuwihiwa!’
20 “‘Awo anoomorela eriyari ya atthu yiiviwe ni espaata.+ Owo* oovahereriwa espaata. Mmukuxe ni muttitthi awe wa atthu ootheene ari wExiitu.
21 “‘Mmahiye* moowiixa, anakhotto ootupexa anoolavula nuuwo vamosa ni ale animukhaliherya. Tthiri awo anookhuruwela mmahiye-mmo, animumpaathi ni ale oohinnuwihiwa, yaawo yiiviwe ni espaata. 22 Asiiria ari weiwo vamosa ni muttitthi aya wootheene. Mahiye a asiiria aamurukurerya mwene aya, ootheene aya akhwiiye espaata.+ 23 Mahiye awe ari mulittini* moowiixa, nave muttitthi wootheene wa atthu wiiviwe ni espaata, ori mukerekhere mwa mahiye awe, okhala wiira okathi yaari aya akumi, yaaniwiiriha atthu woova.
24 Elami+ ori weiwo vamosa ni muttitthi awe wootheene, orukurenrye ene mahiye awe, ootheene aya akhwiiye espaata. Awo anoorowa ni ale oohinnuwihiwa vathi va elapo, eyo piiyo, ale yaawiriha atthu woova, okathi yaari aya akumi. Vano, awo animuuliwa muru ni ale anikhuruwela mmahiye. 25 Atthu a wElami ahookhwa* vamosa ni atthu akina yiiviwe, ohela muhina mittitthi sootheene sa atthu a wElami sirukuryenrye mahiye aya. Ootheene aya toohinnuwihiwa, ni ahiiviwa ni espaata, okhala wiira okathi yaari aya akumi, yaaniwiiriha atthu woova. Awo animuuliwa muru vamosa ni ale anikhuruwela mmahiye. Elami oopwehiwa eriyari ya atthu ookhwa.
26 “‘Weiwo ookhala Mexeki ni Tubali,+ vamosa ni mittitthi saya sa atthu. Mahiye aya* aroomurukurerya. Ootheene aya toohinnuwihiwa ni ahiiviwa ni espaata, okhala wiira okathi yaari aya akumi, yaaniwiiriha atthu woova. 27 Kiireke awo khanrowa wummaathi ni anakhotto ootupa oohinnuwihiwa, yaawo yiiviwe akhuruwela Mmahiye* vamosa ni ikaruma saya sa ekhotto? Ispaata saya sinoopwehiwa vathi va miru saya,* nave itampi saya sinoopwehiwa vathi va makhuva aya, okhala wiira anakhotto ala ootupa, yaaniwiiriha atthu woova, okathi yaari aya akumi. 28 Masi nyuwo, munoonyakattiwa eriyari ya ale oohinnuwihiwa, nave munrowa wummaathi vamosa ni ale akhwiiye espaata.
29 “‘Edomi+ ori weiwo, vamosa ni mamwene awe ni makhulupale awe ootheene. Nnaamwi ari ene oowerya, awo aariheliwa eriyari ya atthu yiiviwe ni espaata. Nave-tho, awo animummaathi vamosa ni ale oohinnuwihiwa,+ ale anirowa mulittini.
30 “‘Makhulupale ootheene a onorti ari weiwo, ni atthu ootheene a oSiidoni,+ yaawo akhurunwe yuuliwe ene muru vamosa ni ale yiiviwe, nnaamwi yaawoopopiha atthu ni owerya waya. Awo anrowa wummaathi ni ale oohinnuwihiwa, yaawo akhwiiye espaata. Animuuliwa muru vamosa ni ale anikhuruwela mmahiye.
31 “‘Farawo onimoona itthu iya sootheene ni onoomaaliheya mwaha wa ele ewiiranenle atthu a muttitthi awe.+ Farawo ni anakhotto awe ootheene, animwiiviwa ni espaata’. Pwiya Muulupalexa Yehova tonihimya.
32 “Pwiya Muulupalexa Yehova onihimya wiira: ‘Farawo ni atthu a muttitthi awe wootheene anoovithiwa vamosa ni atthu oohinnuwihiwa, ni ale akhwiiye espaata, okhala wiira okathi aari awe mukumi, aaniwiiriha atthu woova’”.