Ezekiyeli
19 “Mwiipe nsipo na wiikhupanyerya, nnaahimya makhulupale a wIsarayeli, 2 mwiiraka:
‘Maama anyu aari aani? Owo aari kharamu oothiyana yoowo eetta ni akharamu akina.
Owo aanimpaathi eriyari ya akharamu acikhaani ni oowerya, nave aanaahuwa axaana awe.
3 Owo aahaahuwa axaana awe mpakha okhala akharamu oowerya.+
Owo aahiixutta moota wookhuura enama,
Khupacerya waakhuura atthu.
4 Maloko yaahiiwa olavuliwaka ni yaahinvara munlittini mwaya,
Nto yaahimukuxa ni ikweeceryo, amuroihaka elapo ya wExiitu.+
5 Owo aanilipelela wiira aamutthika, nto aahoona wiira khaarowa otthika.
Tivonto, aahimukuxa mwaaxaana mukina, omukhaliha kharamu oowerya.
6 Nave-tho, owo aaheetta eriyari ya akharamu ni aahipakeya kharamu oowerya.
Owo aahiixutta moota wookhuura enama ni aahaakhuura atthu.+
7 Owo aahimoroxa ipa saya soorakamela osulu soolipihiwa ni aahipwexakasa ipooma saya.
Nto woopawa wawe murukulu waahisareya elapo ele yahaakhaliwa.+
8 Maloko a idistritu saarukurenrye yaahimurweela wiira amureye ntthavi naya,
Nto yaahinvara munlittini mwaya.
9 Arumeelaka ikweeceryo, yaahimuhela mweekeeloni amuroiha wa mwene a oBabiloonia.
Yaahimutthukwela weiwo wiira nihitthikele wiiwanyeya nsu nawe miyaako sa wIsarayeli.
10 Maama anyu aari ntoko mwiri wa ewuuva+ mphomeni mwanyu,* yoowo waaliwe mukerekhere mwa maasi.
Mwiri owo waahiima mihokorokho ni waahisareya iritta mwaha wa maasi manceene.
11 Mwiri owo waahikumiherya iritta soolipa,* saareerela opakeliwa ekopo ya anamalamulela.
Saahinnuwa ni saahikhala sootepa orakama ovikana miri sikina.
Nto vaaniweryaneya wooniwa ottaiwene mwaha wa orakama wawe ni mwaha wa makukhu awe oowaatta.
12 Masi, Muluku onanariwe ene, owo aahiphela mutatthaari+ ni aahirihela vathi.
Vano epheyo ya mpantta onikhuma nsuwa yaahuumiha mihokorokho sawe.
Mitathaari sawe soolipa saahipheliwa ni saahuuma,+ nave mooro waahipaha.+
13 Vano mwiri owo wa ewuuva ohaaliwa woothakoni,
Elapo yoowuuma ni ehirina maasi.+
14 Mooro woomwareela mweerittani mwawe, nave woopaha iritta vamosa ni mihokorokho sawe.
Khehanle nnakhala eritta yoolipa, nnakhala ekopo ya olamulela.+
“‘Nla nsipo na wiikhupanyerya, nave ninrowa orumeeliwaka ntoko wiikhupanyerya’”.