Mihupi Miili Sinikhuma wa Muluku

Biibiliya otheene, orina muhupi onikhuma wa Muluku. Maana Tiithi ihu a wiirimu tomukumihenrye wira oniixuttiheke. Nto nrowe nithokorerye mihupi miili silavuliwe iyaakha 2.000 sivinre. Mihupi iyo saalavuliwe ni nlaikha Gabriyeli, yoowo oneemela “oholo wa Muluku”. (Luka 1:19) Nlaikha nle naaroihenle atthu a makhalelo xeeni mihupi iye miili sootthuneya?

Mwaakha 3 Kristu Ohinatthi Oyariwa, nlaikha Gabriyeli naahiruuha muhupi woopacerya. Naaroihale opuro xeeni? Naaroihale muttetthe wowaatta myaako, oYudeya. Woonasa wene, muttetthe owo waattamenle oYerusalemu, aakhala awe Zakariya, mukhulupale aanamukuttho a Yehova. Zakariya ni Elizabeti yaahuuluvala ni khiyaarina anamwane. Zakariya iira ovaraka muteko awe wa onamukuttho empa ya Muluku, oYerusalemu. Mootutuxerya, waattamela opuro waapahiwa mukuttho, naahimukhumelela nlaikha Gabriyeli.

Tthiri Zakariya aahoova. Masi nlaikha nne naahimaliha woova wa Zakariya nriki: “Nyuwo Zakariya, muhòvé. Muluku ohìwa malompelo anyu. Mwar’inyu Elizabeti onimoyarelani mwana mwamulopwana, yowo onrowanyu onvaha nsina na Yohani”. Gabriyeli aahincererya wira: “Mwan’owo onrowa okhala mùlupale vamaithoni va Muluku . . . wira àlikanyiherye Apwiya nloko n’atthu òloka”.​—Luka 1:13-17.

Zakariya, khaakupali. Nthowa xeeni? Nthowa noowi Elizabeti aahuuluvala. Tivonto, Gabriyeli aahihimya wira: “Mwaha w’ohamini nno, nyuwo munokhala muhilavulaka, muhiweryaka ohimya etthu, mpakha nihiku ninrowaya wiraneya itthu iya”.​—Luka 1:20.

Vano atthu yaari ota, yaaniikoha nthowa naamwiiriha Zakariya opisa okhuma. Nto Zakariya aahikhuma ohilavulaka. Masi, aalavula orumeelaka matata. Eyo yooniherya wira Zakariya aahiweha etthu yootikiniha mpaani mwa Muluku.

Nuumala Zakariya omaliha muteko awe mpaani mwa Muluku, aahitthikela owannyawe. Moohipisa, Elizabeti aahirupala! Sihalaka myeeri mithanu, Elizabeti kheetta ottaiwene maana aalipelela omuyara mwaana.

Muhoolo mwaya, nlaikha Gabriyeli naahirwa ekwaha ya nenli. Ekwaha ela naaronwe omuxukurya mwali oohitheliwa iihaniwa Maria. Owo aakhala mpantta onikhuma epheyo, muttetthe wa oGalileya, epooma ya oNazarethi. Nlaikha nne, naamulenle exeeni Maria? Naahimmye so: “Muluku ohojanliyani”. Nave Gabriyeli aahimuleela Maria wira: “Vekekhai, munorupala, mmuyare mwana mwamulopwana, yowo onrowanyu onvaha nsina na Yesu”. Gabriyeli aahincererya oriki: “Mwan’owo onrowa okhala mulupale, onimwihaniwa Mwana a Muluku mulupalexa, . . . Owo onimwettiha vohimala-tho nloko na Yakobe: nave Omwene awe khummala-tho”.​—Luka 1:30-33.

Tthiri, yaari eparakha yuulupale Gabriyeli ohimya mihupi iye miili sa Muluku! Vaavo ninvikaniha ahu wiixutta voohimya sa Yohani ni Yesu, nnimoona wira mihupi iya sinikhuma wiirimu, ti sootepa otthuneya.