Watchtower EBIBLIOTEKA ONLAINE
Watchtower
EBIBLIOTEKA ONLAINE
Emakhuwa
  • BIIBILIYA
  • ILIIVURU
  • MITHUKUMANO
  • jy muru 28 epaax. 70-epaax. 71 etti. 6
  • Xeeni Awiixutti a Yesu Yahaatthukwa Aya?

Mpantta ola khekhanle eviidiyu.

Muniswaamihe, khivaniweryaneya orumiha eviidiyu ela.

  • Xeeni Awiixutti a Yesu Yahaatthukwa Aya?
  • Yesu ti Ephiro, Ekeekhai ni Ekumi
Yesu ti Ephiro, Ekeekhai ni Ekumi
jy muru 28 epaax. 70-epaax. 71 etti. 6
Atthareli a Yohani Mbatiza amukohaka Yesu voohimya sa otthukwa

MURU 28

Xeeni Awiixutti a Yesu Yahaatthukwa Aya?

MATHEYO 9:14-17 MARKO 2:18-22 LUKA 5:33-39

  • AWIIXUTTI A YOHANI YAAHIMUKOHA YESU VOOHIMYA SA OTTHUKWA

Nuumala Yesu omwiira Paasikha a 30 EC, nlelo Yohani Mbatiza iira ori ene mukhatteya. Yohani aaphavela wira atthareli awe amutthareke Yesu, masi khahiyo wira otheene yaahimutthara Yesu ohinatthi Yohani oriheliwa mukhatteya.

Vano, aanaattamela Paasikha a 31 EC. Nto atthareli akina a Yohani yaahirowa omukoha Yesu wira: “Vanikhala sai hiyo ni maFarisi otthukwaka mahiku manjene, awixutti anyu ehinatthukwa?” (Matheyo 9:14) Okathi ole, aFarisi yaanitthukwa ntoko yoolema ya etiini. Muhoolo mwaya, Yesu aahipaka nlikanyiho na nFarisi yoowo aavekela iixoonaka okhala naxariya oriki: “Múluku! Kinnoxukhuruni mwaha w’ohilikanaka miyo n’atthu akina, . . . Miyo kinnitthukwa mahiku manli khula esumana”. (Luka 18:11, 12) Nave atthareli a Yohani yaahikhalana yoolema ya otthukwa. Woonasa wene, yaahitthukwa mwaha wa Yohani aariheliwe mukhatteya. Nave atthu akina yaaniphavela osuwela nthowa naya awiixutti a Yesu yahaatthukwa aya, wira yooniherye oriipiwa murima mwaha wa ele yaamwiiranenle Yohani.

Yesu aahiwaakhula orumeelaka nlikanyiho nna: “Vanìraneya sai axipatthani awe mutheli oripiwaka murima, mutheli anari ni yawo? Vano, anophiya mahiku anìraya yakhiwe mutheli: mahiku yawo t’anrowaya otthukwaka”.​—Matheyo 9:15.

Yohani mwaneene aahimuhimya Yesu okhala mutheli. (Yohani 3:28, 29) Nto, okhala wira Yesu aari ni awiixutti awe, awo khiyaatthuneya otthukwa. Muhoolo mwaya, vaavo aarowa awe wiiviwa, awiixutti awe yaarowa otthukwaka. Nto, eyo yaamuturukeya nuumala Yesu ohihimuxiwa! Mwaha woowi khiyaarowa okhalana nthowa na otthukwa.

Moottharelana, Yesu aahipaka malikanyiho manli: “Khavo onkuxa esapha y’ekuwo esyá, khuttotthela vakuwoni ya khalai; mana esaph’eyo enotthikelana, mpakha okhera ekuwo eyo ya khalai. Vano nipuro nle nakhereiye nnimunjerereya. Siso-tho, khavo onkuxa evinyu esyá, khwitthela ikhali sa khalai: ìra siso, evinyu iyo enopwexakasa ikhali, enoyeheya, ikhali sinohononeya. Evinyu esyá ennìttheliwa ikhali isyá”. (Matheyo 9:16, 17) Exeeni Yesu aaphavela awe owiixuttiha?

Yesu aaphavela waakhaliherya atthareli a Yohani Mbatiza woona wira atthareli a Yesu, khiyaakhanyereriwa otthara soolema sa aYuda, ntoko yoolema ya otthukwa. Yesu khaarwenle wuncererya soolema iye aahiiso waatumererya atthu otthara soolema iye saahanle vakhaani omala. Okokhorela Yesu aatumerenrya awe khiwaavarihana ni soolema sa aYuda aahiiso sa apinaatamu. Nave kheerenrye ohela esaapha ekuwo ya khalai aahiiso ohela eviinyu ya niinaano ikhali sa khalai.

NLIKANYIHO NA OTTHUKWA.

Murupa wa esapala

Yesu aahirumeela nlikanyiho naasuweliwa ni atthu ale yanwiriyana, eyo piiyo, ottottha. Akhala wira mutthu aanihela esaapha ekuwo ya khalai, exeeni yaarowa wiiraneya? Okathi wookattha, esaapha esya yaanitthikelana mpakha ekuwo ya khalai okhereya.

Moolikanasa, eviinyu yaaniheliwa mmurupani waapakiwa ni esapala ya inama. Nuuvira okathi, murupa owo waanitthikelana. Nto khiwaaroromeleya ohela eviinyu esya mirupa iyo. Maana vaavo eviinyu aahiiso otheka waarowa aya weelaka, murupa owo waamukokheya. Wanikisa waya, murupa owo wamphuleya.

  • Mahiku a Yesu, tani yaatthukwa, ni nthowa xeeni?

  • Xeeni awiixutti a Yesu yaahaatthukwa aya okathi yaari aya ni Yesu? Muhoolo mwaya, exeeni yaarowa owiiriha otthukwa?

  • Nlikanyiho na Yesu na esaapha ni eviinyu esya, nintaphulela exeeni?

    Watchtower EBIBILIOTEKA ONLAINE (1982-2025)
    Okhuma
    Okela
    • Emakhuwa
    • Ovaha
    • Siniphavela Anyu
    • Copyright © 2025 Watch Tower Bible and Tract Society of Pennsylvania
    • Malamulo Oorumeela
    • Mwaha Woosuka Isiiri
    • Privacy Settings
    • JW.ORG
    • Okela
    Ovaha