Wiiraneya wa Eprofesia ya Yesaya

Vaavo aasuwenle awe wira aFarisi ni atthu a Herodi yaaphavela omwiiva, Yesu ni awiixutti awe yaahirowa Ephareya ya oGalileya. Muttitthi ole muulupale waakhumme mapuro oovirikana, ntoko, oGalileya, ipooma soowaattamela ephareya ya oTiro ni oSidoni, mpantta onikhuma nsuwa wa Muro Yordani, oYerusalemu ni ilapo sa okuusini, wIdumeya. Yesu aahaapenuxa atthu anceene. Nto ale yaarina iretta suulupale yaanimwaattamela Yesu. Awo yaaphavela omukwata, ohiya omulipelela Yesu waakwata.​—Marko 3:9, 10.

Muttitthi ole waari muulupale mpakha omwiiriha Yesu waavekela awiixutti awe wira alokiherye ekalawa yaamukhaani wira osuserye mmaasini mwaha wa atthu ale yamphunya. Nto Yesu anwerya owiixuttiha oratteene aahiiso orowa mpantta mukina wira aakhaliherye atthu anceene.

Murummwa Matheyo aahoona wira muteko wa Yesu waanimaliherya “sahimalyawe Muluku ni molumo a profeta Yesaya”. (Matheyo 12:17) Eprofesia xeeni Yesu aamalihenrye awe?

Eprofesia eyo tiila: “Ola va, murumeyi aka omuthanlalyaka. Ola t’ule onimphentexaka, yowo kinimurerelaka murima! Miyo kinohela eroho [munepa] aka mwa yowo: van’owo onolalèrya exariya maloko othene. Owo khanrowa ovanyihana ni mutthu nnákhala onyakulihana: khavo onrowa wiwa nsu nawe mmawani. Owo khanrowa osinsa mutathi wowunteya: khanrowa ottipiha ntthampo nintthuwa mwixi. Owo onimwira siso mpakha omaleliha exariya. Vano, atthu a maloko othene anororomela nsina nawe”.​—Matheyo 12:18-21; Yesaya 42:1-4.

Tthiri, Yesu aari murumeyi oophentiwa, yoowo Muluku aamweemerenrye awe. Yesu aahooniherya ele exariya yekeekhai entaphulela aya, yeeyo yaavuvuriwa ni soolema sa etiini yoowootha ya aFarisi. Avarihelaka moohiloka Nlamulo na Muluku, aFarisi yaanipaka itthu moohixariya maana khiyaakhaliherya atthu yaawereiwa nihiku na Saabadu! Okhala wira Yesu aahooniherya exariya ya Muluku ni aahikhalana munepa wa Muluku, eyo enooniherya wira Yesu aanaarula atthu miritti soolemela sa soolema soohiloka. Tivonto, ahooleli a itiini yaaphavela aya omwiiva. Tthiri atthu ale yaari oohixariya!

Anitaphulela exeeni masu oowi: “Owo khanrowa ovanyihana ni mutthu nnákhala onyakulihana: khavo onrowa wiwa nsu nawe mmawani”? Vaavo aapenuxa awe atthu, aahiiso oomola awe malaikha ootakhala, Yesu khaawemererya ‘omoneleliha’. (Marko 3:12) Yesu khaaphavela wira atthu ale alaleyeke itthu aapanke awe aahiiso ohimya itthu soohikhalela.

Nave, Yesu aanaamaaliha atthu yaakhala ntoko mutathi woowunteya yoowo waatthukiwe eriyari ni waamonre. Nave atthu ale yaakhala ntoko ntthampo naatthuwa mwiixi nihalaka ottipha. Yesu khasinsale mutathi waahala wunteya aahiiso ntthampo naahala ottipha. Ohiya-vo, moophenta ni mooreerela murima, Yesu aanaalipiha. Tthiri Yesu aahaavaha nlipelelo atthu a maloko otheene!