AMIRAVO ANNIKOHA
Kiireke Vannireerela Ovekela?
Moovarihana ni amiravo yaakohiwe wAmérica, vaahooneya wira amiravo 80 porsento annivekela, masi 40 porsento paahi tanivekela khula nihiku. Moohaanyiherya amiravo akina annikoha wira: ‘Kiireke ovekela etthu ennikhaliherya okhala saana paahi wala onnikikhaliherya mwa enamuna ekina?’
Ovekela exeeni?
Ovekela, ovaanela ni Muluku opattunxe itthu sotheene. Nkahaya muupuwele ele eyo enitaphulela aya! Yehova ti muulupale waavikana atthu otheene mwa inamuna soovirikana. Hata vari siiso, “owo ori vakhiviru wa khula mmosa a hiyo”. (Miteko 17:27) Musuweleke wira Biibiliya onninlattula oriki: “Mmwaattameleke Muluku, vano owo onoowaattamelani”.—Yakobo 4:8.
Munrowa omwaattamela sai Muluku?
Enamuna emosa ori onvekela, eyo piiyo, ovaanela ni Muluku.
Enamuna ekina ori omusoma Biibiliya, okathi munimusoma anyu Biibiliya, Muluku “onnilavula” ni nyuwo.
Ovaanela iwo, niire so, ovekela ni omusoma Biibiliya onimookhaliheryani olipiha waataana wanyu ni Muluku.
“Olavula ni Yehova, yoowo ori mutthu ootepa otthuneya olumwenku wotheene, eparakha yuulupale mutthu orina awe”.—Jeremy.
“Omuleela Yehova moonelo ni muupuwelo aka onnikikhaliherya woona wira kookhalana waataana wooloka ni yena”.—Miranda.
Niireke Muluku onniwiriyana mavekelo?
Hata musuwelaka wira Muluku ookhala ni munvekelaka, pooti woovilani okupali wira onniwiriyana mavekelo. Masi, muhiliyale wira Biibiliya onihimya wira Yehova ‘onniwiwa ale aninvekela’. (Esalimo 65:3) Nave oniphavela wira “Munvahererye Muluku mixankiho sanyu sotheene”. Mwaha wa xeeni? “Maana owo onnookhapelelani”.—1 Pedru 5:7.
Muupuwele ela: Niireke munniphavelasa okathi wira nvaanele ikwaha sinceene ni mpatthani anyu? Akhala wira ti siiso, mpakeke etthu emosaru ni Muluku. Mulavuleke ni yena ikwaha sinceene ni okathi munivaanela anyu murumeeleke nsina nawe, Yehova. (Esalimo 86:5-7; 88:10) Nave Biibiliya onihimya wira: “Nvekeleke voohihiyererya”.—1 aTesalonika 5:17.
“Okathi kinvekela aka, kinvaanela ni Tiithi aka a wiirimu, nto kinnimuleela itthu sotheene siri vamurimani vaka”.—Moises.
“Kinnimuleela Yehova itthu suulupale kirina aka, ntoko kimmuleela aka maama aka wala mpatthani aka muulupele”.—Karen.
Kihaana ovekela exeeni?
Biibiliya onihimya wira: “Itthu sotheene, munvekeleke ni omuxonttela Muluku, vamosa ni omuxukhurela, mmusuwelihaka itthu muniveka anyu”.—aFilipi 4:6.
Nto niireke nihaana ovekela mwaha wa mixankiho sahu? Aayo! Biibiliya onihimya wira: “Mwareye Apwiya muritti anyu: awo t’aniwemexani”.—Esalimo 55:23.
Ekeekhai wira, khahiyo wira khula okathi nninvekela ahu Muluku nihaana omuleela mixankiho sahu paahi. Mwali oniihaniwa Chantelle onihimya so: “Waarowa okhala opatthani woohiloka vaakhanle wira khula okathi kininvekela paahi Yehova wira okikhaliherye. Miyo kinoona wira ti vooloka opacerya omuxukhurela, nto sookhala itthu sinceene kinreerela aka omuxukhurela”.
Muupuwele ela: Itthu xeeni mookumini mwanyu munixukhurela anyu vanceene? Niireke sookhala itthu tthaaru mukhanle anyu oomuxukhurela Yehova?
“Hata itthu saamukhaani ntoko oweha efilori yooreera, pooti oniiriha omuxukhurela Yehova”.—Anita.
“Muupuwelele yoopattuxiwa enoosivela vanceene wala yoolepa emosa ya mBiibiliyani enoosivelani, nuumala-vo munvekele Yehova mmuxukhurelaka”.—Brian.