Waattamela oBabeli yaahikhala epooma yiitthaniwa Uri, weiwo atthu yaakokhorela aya amuluku anceene, omuhiya Yehova. Masi epooma ele aahikhala mulopwana mmosa aamukokhorela Yehova paahi. Nsina nawe naari Abrahamu.

Yehova aahimuhimeerya Abrahamu wira: ‘Mukhume mulaponi mwanyu, mwaahiye amusi anyu ni muthaamele elapo enrowa aka woothoonyeryani’. Nuumala-vo Muluku aahimuleiherya wira: ‘Miyo kinimookhalihani nloko nuulupale, kinimwaareeliha atthu otheene a mulaponi mwaha wa nyuwo’.

Abrahamu khaasuwela opuro aaroihiwa awe ni Yehova, masi owo aahimuroromela Yehova. Nto, Abrahamu aahivenya ni mwaarawe Sara, vamosa ni paapa awe aitthaniwa Terahi, ni musulwaawe Lothi. Awo yaahikuxa itthu saya ni mowiiwelela yaahipacerya mukwaha aya woorakama.

Abrahamu aarina iyaakha 75 vaavo owo ni emusi awe yaaphiyale aya elapo Yehova aaphavela awe owooniherya. Elapo eyo yiitthaniwa oKanani. Muluku aahimuleiherya Abrahamu wira: ‘Elapo ela yotheene munoona anyu, miyo kinimwaavaha aniinyu’. Masi Abrahamu ni Sara yiira yuuluvanle ene ni khiyaarina mwaana. Nto Yehova aarowa omaleliha sai yooleiherya awe?

Abrahamu ni Sara yaahimaliha iyaakha sinceene ethelanne ene. Awo yaahihiya enupa aya epooma yoothaaciri ya Uri, enarowa okhalaka muheemani. Masi hata vari siiso Sara khaixinliha maana aanimuroromela Yehova.

Sara aaniphavela vanceene okhalana mwaana, nto aahimuleela Abrahamu wira: ‘Mmuthele murumeyi aka Hagari wira okhalane mwaana, nto mwaana owo onrowa okhalaka ntoko tawaka’. Nuuvira okathi, Hagari aahikhalana mwaana mwaamulopwana. Nsina nawe aitthaniwa Iximayeli.

Nuuvira iyaakha sinceene, vaavo Abrahamu aarina awe iyaakha 99 ni Sara aarina awe iyaakha 89, awosa yaahixukuriwa ni atthu araru. Abrahamu aahaavekela wira aphumurye va muuttutthini va mwiri wira alye hoothe. Nyuwo munnisuwela ti pani yaari atthu awo? Awo yaari malaikha! Awo yaahimuleela Abrahamu wira: ‘Eyaakha eyo okathi yoola, nyuwo ni mwaarinyu munookhalana mwaana’. Sara aahiiwa masu awo ori ene muheemani. Owo aahitheya mekhawe ni aahuupuwela so: ‘Kiireke tthiri kinoomuyara mwaana nnaamwi kuuluvanle ene?’

Nuuvira eyaakha emosa, Sara aahimuyara mwaana mwaamulopwana, ntoko nlaikha na Yehova naahimyale aya. Abrahamu aahinvaha nsina na Isakhi, nenlo nintaphulela “Otheya”.

Okathi Isakhi aarina awe iyaakha 5, Sara aahinweha Iximayeli omutheyaka Isakhi. Sara aaphavela omukhapelela Isakhi, nto aahirowa onvekela Abrahamu wira omoomole Hagari ni Iximayeli. Wanipacerya Abrahamu aahikhootta. Masi Yehova aahimuleela wira: ‘Munwiriyane Sara. Muhixanke! Miyo nkinrowa omunyanyala Iximayeli. Masi kinrowa omurumeela Isakhi wira kimaliherye yooleiherya aka’.

Lothi aakhala ni taata awe Abrahamu, elapo ya oKanani. Nto awosa yaahikhalana inama sinceene. Masi elapo ele yaahaayevela okhala wira inama saya khisaareere. Abrahamu aahimuleela Lothi wira: ‘Khivanireerela nyuwo ni miyo okhalaka hoothe. Vano muhaana othanla muttetthe mmosa wira mwakhaleke weiwo, ni miyo kinoothanla muttetthe aka’. Moohaanyiherya, moolumo ala a Abrahamu yooniherya ophenta!

Lothi aahiweha elapo emosa yooreera waattamela epooma yaitthaniwa Sodoma. Elapo eyo yaahikhala maasi ooreera ni malaxi. Nto Lothi aahithanla yeeyo ni aahikuxa emusi awe khuthaamela weiwo.

Atthu a oSodoma ni epooma yoowaattamela ya oGomora yaari ootakhala vanceene. Nto okhala wira atthu awo yaari ootepa otakhala, Yehova aahimpaka palano wira opwetexe ipooma iye. Masi Muluku aaphavela omoopola Lothi ni emusi awe. Nto aahiruma malaikha manli wira yamuleele Lothi. Awo yaahimmye so: ‘Mwaakuveke! Mukhumase epooma ela! Yehova oniphavela opwetexa’.

Lothi khaakhumme mowaakuveya. Nto okhala wira aanipisa, malaikha ale yaahinvarela ntata Lothi ni amwaarawe ni anaawe anli axithiyana, yahaakumiherya ota. Nuumala-vo yaahaaleela wira: ‘Mwaatthunaka okhala mukumi, mutthyawe. Muhiwehe ottuli, mwaweha vale ottuli, munimookhwa’.

Okathi yaaphiyale aya epooma yiitthaniwa oSowari, Yehova aahikumiha mooro ni sófiri wiirimu, ni aahipaha ipooma sa oSodoma ni oGomora. Ipooma iye piili saahipwetexiwa moomalela. Vaavo mwaarawe Lothi ahaamwiwelenle awe Yehova nto khuwehaka ottuli, owo aahithatuwa nripu na maakha! Masi Lothi ni anaawe anli axithiyana yaahoopowa mwaha woowi yaahimwiiwelela Yehova. Awo yaahiriipiwa murima vanceene maana mwaarawe Lothi khaamwiiwelenle Yehova. Tthiri eyo enniixuttiha wira nihaana opaka ele Yehova onniruma awe.

Abrahamu aahimwiixuttiha mwanawe Isakhi omphenta Yehova ni ororomela sooleiherya sotheene sa Yehova. Masi okathi Isakhi aarina awe iyaakha 25, Abrahamu aahivekeliwa opaka etthu yooxankiha. Yaari etthu xeeni?

Muluku aahimuleela Abrahamu wira: ‘Mmukuxe Isakhi, mwaninyu mmosa ene, mmurowane omwaako Moriya mwamwiive mukivahe ntoko mukuttho’. Abrahamu khaasuwela nthowa naya Yehova anvekela awe opaka eyo. Masi aahivikaniha omwiiwelela Yehova.

Mmeeloni mwaya voosiisu, Abrahamu aahimukuxa Isakhi ni arumeyi awe anli enarowasa omwaako Moriya. Nuuvira mahiku mararu yeettaka, woonasa wene yaaniwerya oweha miyaako yaarowa aya. Abrahamu aahaaleela arumeyi awe wira emulipeleleke maana owo ni Isakhi yaaphavela ovaha mukuttho. Abrahamu aahimuruma Isakhi oteexa ikhuni, nto owo aahikuxa mwaalo. Isakhi aahimukoha tiithi awe wira: ‘Tiithi enama ene ninrowa ahu ovaherya mukuttho eri woowi?’ Nto Abrahamu aahimwaakhula so: ‘Mwanaka, Muluku onooniphwanyiha’.

Okathi yaaphiyale aya omwaako Moriya, awosa yaahimpaka altari. Nuumala-vo, Abrahamu aahimutthukwa Isakhi miyoono ni metto ni aahimpweha vasulu va altari.

Abrahamu aahikuxa mwaalo wira omwiive Isakhi. Nto okathi yoowo, nlaikha na Yehova naahimwiitthana nihimyaka so: ‘Abrahamu! Muhimwiive mmiravo owo! Vano koosuwela wira munnimwaamini Muluku maana muheemererya onvaha mwaninyu ntoko mukuttho’. Nuumala-vo, Abrahamu aahiweha epwittipwitthi ephanre ene vamwirini. Moohipisa aahimutaphula Isakhi ni aahivara epwittipwitthi ele khuvaha ntoko mukuttho.

Okhuma nihiku nne, Yehova aahimwiitthana Abrahamu okhala mpatthani awe. Munnisuwela nthowa naya? Abrahamu aahipaka ele Yehova anvekenle awe, nnaamwi ahaasuwela nthowa naya Yehova anvekenle awe opaka eyo.

Yehova aahimuleiherya-tho Abrahamu ekwaha ya nenli ohimyaka so: ‘Kinimooreelihani ni kinimuncererya osuulu anyu’. Eyo yaataphulela wira Yehova aarowa orumeela emusi ya Abrahamu wira aareelihe atthu otheene ooreera murima.