Yehova aahimuleela Samuweli wira: ‘Murowe owannyawe Yesé. Mwanawe mmosa onrowa okhala mwene a wIsarayeli’. Samuweli aahirowa owannyawe Yesé. Okathi Samuweli aamoonale awe mwaana oopacerya a Yesé aahuupuwela so: ‘Vekeekhai ti yoola othanliwe’. Masi Yehova aahimuleela Samuweli wira khahiyo yoole aamuthanlale awe. Yehova aahihimya-tho wira: ‘Miyo nkincala itthu sinoona aya atthu, masi kinweha murima’.

Yesé aahimuruuhela Samuweli anaawe akina 6. Masi Samuweli aahimuleela wira: ‘Yehova khomuthanlale hata mmosa. Khamurina anamwane akina?’ Yesé aahaakhula wira: ‘Oohala ookiserya oyeva, Davidi. Oronwe okukhula ipwittipwitthi saka’. Vaavo Davidi aarwiiye awe, Yehova aahimuleela Samuweli wira: ‘Ti yoola omuthanlale aka!’ Samuweli aahimwiitthela Davidi makhura mmuruni, yooniheryaka wira aahimuthanla wira okhale mwene a wIsarayeli muhoolo.

Muhoolo mwaya, aIsarayeli yiira ewanaka ekhotto ni aFilisti. AFilisti yaahikhalana nakhotto oowerya aitthaniwa Goliyathi. Khula nihiku Goliyathi aanaaruwana aIsarayeli. Aanikhuwela ohimyaka so: ‘Haya mmuthanle nakhotto mmosa wira owane ni miyo. Owo akixintta, hiyo nnookhala ipottha sanyu. Masi miyo kamuxintta, nyuwo munookhala ipottha sahu’.

Davidi aahirowa opuro waari anakhotto a wIsarayeli wira aavahe eyoolya axuulupale awe anli yaawo yaari anakhotto. Okathi Davidi aamwiiwale awe Goliyathi, aahihimya wira: ‘Miyo kinoorowa owana ni yena!’ Mwene Sawuli aahimuleela wira: ‘Nyuwo khimureere oyeva’. Masi Davidi aahaakhula wira: ‘Yehova onookikhaliherya’.

Sawuli aahinwariha Davidi ikuwo sawe sa ekhotto, masi Davidi aahimuleela wira: ‘Nkinwerya owana kiwanre ene ikuwo iya’. Davidi aahimukuxa pharansikula wala mukhoi waavonyaniwa maluku nto khurowa mmuro. Owo aahithanla maluku 5 oovilikeya, khuhelaka mmurupani mwawe. Nuumala-vo, Davidi aahimutthimakela Goliyathi. Nakhotto ole oowerya aahihimya wira: ‘Orwe nno, weyo mmiravo. Murutthu awo kinimwaavaha axipalame a musulu ni inama sa mutakhwani’. Davidi khoovale etthu. Owo aahimwaakhula-tho wira: ‘Nyuwo munikirweela ni ekatana ni nivaka, masi miyo kinrwa ni nsina na Yehova. Nyuwo khamunwana ni hiyo, masi munwana ni Muluku. Atthu otheene ari vaava anooweha wira Yehova toowerya ovikana ekatana aahiiso nivaka. Owo onoonivaha nyuwo othene mmatatani mwahu’.

Nto, Davidi aahihela nluku vamukhoini vawe ni aahivonya ni ikuru sawe sotheene. Okhaliheriwaka ni Yehova, nluku nle naahimmana Goliyathi vayuuci. Nakhotto ole oowerya aahikhwa ni aahimorela vathi. Nuumala-vo, aFilisti yaahitthyawa. Nyuwo munnimuroromela Yehova sintoko Davidi?

Nuumala Davidi omwiiva Goliyathi, Mwene Sawuli aahimuthanla Davidi wira okhale muhooleli a anakhotto awe. Davidi aahixintta ikhotto sinceene, nave atthu anceene yaanisiveliwa ni yena. Khula okathi Davidi aahokolowa awe okhottoni, athiyana yaanikhuma mmuttettheni yiipaka ni yiinaka ehimyaka so: ‘Sawuli owiivale anakhotto ekonto emosa, masi Davidi owiivale ikonto muloko’. Sawuli aahipacerya omukhalela nrima Davidi ni aaniphavelasa omwiiva.

Davidi aanisuwela omoopa saana xittaattha. Nihiku nimosa, vaavo Davidi aamoopa awe xittaattha ohoolo wa Sawuli, mwene owo aahimurihela nivaka wira omuhome. Davidi aahirapela, nto nivaka nlo naahihoma exiri. Nuumala-vo, Sawuli aahimananiha ikwaha sinceene omwiiva Davidi. Nto Davidi aahitthyawa ni aahiipitha moothakoni.

Sawuli aahaakuxa anakhotto awe 3.000 ni aahirowa omphavela Davidi. Sawuli aahikela mukhukuni memmo Davidi ni anakhotto awe yiipinthe aya. Nto anakhotto a Davidi yaahihimya wira: ‘Olelo nihiku munrowa anyu omwiiva Sawuli’. Davidi aahimwaattamela Sawuli nto aahithikila epantta yaamukhaani ya nlaya na mwene. Masi Sawuli khaasuwenle etthu. Nuumala-vo, Davidi aahiriipiwa murima mwaha woohimuttittimiha mwene aathanliwe ni Yehova. Davidi aahaakhoottiherya anakhotto awe omutuphela Sawuli. Nave aahimukhuwelela Sawuli, ohimyaka wira vaakhanle wira Davidi aaniphavela omwiiva, owo ampaka eyo okhala wira waahikhumelela okathi wooreerela. Nto niireke Sawuli aahihiya omulupattha Davidi?

Nnaari. Sawuli aahivikaniha omulupattha Davidi. Ohiyu omosa Davidi ni musulwaawe aitthaniwa Abixayi, yaahikela opuro aarumpe awe Sawuli. Hata Abineri, guarda a Sawuli, aahirupa. Abixayi aahihimya wira: ‘Woophiya okathi wooreerela! Mukihiye kimwiive Sawuli’. Davidi aahimwaakhula wira: ‘Yehova tonrowa omphukela Sawuli. Nikuxe paahi nivaka nawe ni murinki wa maasi nrowe’.

Davidi aahilapuwela okhopela, khweemela vamwaako wira oweheke opuro aamanke awe Sawuli. Owo aahikhuwela ohimyaka so: ‘Abineri, xeeni muhimukhapelelaka oratteene mwene anyu? Nivaka ni murinki wa Sawuli ori vayi?’ Sawuli aahisuwela wira naari nsu na Davidi, khwiira: ‘Nyuwo mwanwerya okiiva, masi khampanke eyo. Koosuwela wira nyuwo munrowa okhala mwene a wIsarayeli muhoolo’. Nuumala-vo, Sawuli aahitthikela owannyawe. Masi yaahikhala atthu akina a emusi ya Sawuli yahaamulupattha Davidi.

Mwanawe mwene Sawuli, Yonathani aari nakhotto oolipa murima. Davidi aahihimya wira Yonathani aari mutthu ootthyawexa onvikana xaaka, ni aari a ikuru onvikana kharamu. Nihiku nimosa, ori ene opuro woottukhuwa, Yonathani aahaaweha anakhotto aFilisti. Owo aahimuleela murumeyi awe aamukuxerya ikaruma sawe sa ekhotto wira: ‘Hiyo ninrowa waatuphela paahi akhala wira Yehova onoonivaha ethoonyeryo. AFilisti yaniirela wira murweeke wenno oryahu, hiyo nihaana orowa waatuphela’. Okathi aFilisti yamoonale aya Yonathani ni murumeyi awe, yaahihimya wira: ‘Murweeke wenno niwaneke!’ Nto alopwana ale anli yaahiwela vamwaako ni yahaatuphela aFilisti ni yaahiwiiva 20.

Mwaha wookhala mwaana oopaceriwa a Sawuli, Yonathani taarowa okhala mwene muhoolo. Masi owo aahisuwela wira Yehova aamuthanlale Davidi wira okhale mwene a wIsarayeli, nto hata vari siiso, Yonathani khaamukhalenle nrima Davidi. Yonathani ni Davidi yaahikhala apatthani eekeekhai. Awosa yaahileiheryana okhaliheryana ni waakihana. Yonathani aahinvaha Davidi nlaya nawe, ekatana, muura ni musako awe wa ekhotto ntoko ethoonyeryo ya opatthani.

Okathi Davidi aamutthyawa awe Sawuli, Yonathani aahirowa okumana ni Davidi khumuleela so: ‘Mwiilipihe, ni mulipe murima. Yehova ohoothanlani wira mukhale mwene. Hata apaapa aasuwela oratteene’. Niireke munniphavela okhalana mpatthani ooloka ntoko Yonathani?

Yonathani aahileva okumi awe ikwaha sinceene wira omukhaliherye mpatthani awe. Owo aanisuwela wira mwene Sawuli aaphavela omwiiva Davidi, nto aahimuleela Sawuli wira: ‘Paapa, mwamwiiva Davidi munoottheka, owo khiivo epanke awe yootakhala’. Sawuli aahinanariwa vanceene. Nuuvira iyaakha, Sawuli ni Yonathani yaahikhwa hoothe okhottoni.

Nuumala Yonathani okhwa, Davidi aahimphavelasa mwanawe Yonathani, Mefiboxethi. Okathi amphwannye awe aahimuleela so: ‘Mwaha woowi apapinyu yaari mpatthani aka eekeekhai, kinimookhapelelani okumi anyu wotheene, vano nyuwo munrowa olyaaka mahiku othene vameesa vaka’. Davidi khaatonko omuliyala mpatthani awe Yonathani.

Nuumala Sawuli okhwa, Davidi aahikhala mwene. Owo aarina iyaakha 30. Sivinre ene iyaakha vakhaani nuumala Davidi okhala mwene, ohiyu omosa ori ene owannyawe, aahimoona muthiyana ooreera. Davidi aahileeliwa wira nsina nawe aari Bathi-Xeba ni wira aatheliwe ni nakhotto mmosa aitthaniwa Uriya. Davidi aahiruma oruuhiwa Bathi-Xeba owannyawe. Awosa yaahiraruwa nto muthiyana owo aahirupala. Davidi aahimananiha ovitha etthu ele aapanke awe. Owo aahimuleela mukhulupale a anakhotto wira omuhoolihe Uriya okhottoni ni omuhiye mekhawe wira iiviwe. Nuumala Uriya wiiviwa, Davidi aahimuthela Bathi-Xeba.

Yehova aahiweha itthu sotheene soohiloka saakhumelenle. Exeeni aapanke awe? Owo aahimuruma profeta Natani orowa wa Davidi. Natani aahimuleela Davidi wira: ‘Mulopwana mmosa thaaciri aahikhalana ipwittipwitthi sinceene, masikhini mmosa aarina epwittipwitthi emosa paahi yaamukhaani yoothiyana, yeeyo aakhapelela awe saana. Thaaciri ole aahikuxa epwittipwitthi ele emosa ya masikhini’. Davidi aahinanariwa khuhimya so: ‘Thaaciri owo onniphwanela wiiviwa!’ Natani aahimuleela wira: ‘Thaaciri owo ti nyuwo!’ Davidi aahiriipiwa murima vanceene, ni aahimuleela Natani wira: ‘Koomutthekela Yehova!’ Yoottheka eyo yaahimukumiherya mixankiho sinceene Davidi ni emusi awe. Yehova aahimuhukhumu Davidi masi khaamwiivale, maana aaheemererya itampi sawe ni aahiiyeviha.

Davidi aahiphavela oteka etemplo ya Yehova, masi Yehova aamuthanlale mwanawe Davidi, Salomoni, wira oteke etemplo eyo. Davidi aahipacerya omuthukumanyerya itthu Salomoni ni aahihimya wira: ‘Etemplo ya Yehova ehaana okhala yulupalexa ni yooreerexa. Salomoni nlelo mmiravo, tivo miyo kinoomukhaliherya ni kinoolokiherya itthu simphaveleya’. Davidi aahivaha musurukhu awe wira orumeeliweke okathi wooteka. Owo aahaaphavela anamuteko ooratta. Aahithukumanya eweero ni eparatha, ni miri suulupale ni sooreerexa seiyo saakumihiwa elapo ya oTiro ni oSidoni. Ohalaka vakhaani okhwa, Davidi aahinvaha Salomoni malakiheryo a moota yaarowa aya okhala etemplo. Davidi aahimuleela Salomoni wira: ‘Yehova tokirumme woolepelani itthu iya. Owo onimookhaliheryani. Muhoove. Mwiilipihe, ni mpaceryeke muteko ola’.