Okathi emusi ya Yakobe yaaphiyale aya wEjiitu, yaahisuweliwa okhala aIsarayeli. Nuumala Yakobe ni Yosefe okhwa, aahipacerya olamulela Farawo mukina. Owo aanoova wira aIsarayeli yaarowa okhala a ikuru waavikana atthu a wEjiitu. Nto, Farawo aahipacerya waahaaxa aIsarayeli. Aanaakhanyererya opaka itijolo ni ovara miteko soolipa mmatta. Masi, hata atthu a Isarayeli yaakhanyereriwa ovara miteko soovila, yaamutepa wuncerereya. Eyo yaahimunanara Farawo ni yaahimwiiriha okumiherya nlamulo naahimya wira anamwane otheene alopwana a nloko na Isarayeli yaayariwa, yaahaana wiiviwa. Moohaanyiherya, eyo yahaariipiha murima vanceene aIsarayeli!

Muthiyana mmosa aitthaniwa Yokebedi aahimuyara mwaana mwaamulopwana, ooreera. Wira ohiiviwe, aahimuhela musestoni ni khurowa ompweha mmalaxini mwa muro Nilo. Nto murokorawe mwaana ole, Miryamu, aahiipitha mmalaxini wira aweheke etthu yaarowa okhumelela.

Vano, mwaana mwamuthiyana a Farawo aahirowa orapa omuro ni aahiweha esesto ele. Okathi aakhununle awe, aahimphwanya mwaana anlaka, nto aahimoonela othunku. Miryamu aahimukoha wira: ‘Kamphaveleke muthiyana wira amwaamwiheke mwaana ola?’ Okathi mwaana mwaamuthiyana a Farawo iirale awe aayo, Miryamu aahimurowela maama awe oomuyara, Yokebedi. Mwanawe Farawo aahihimya wira: ‘Mmukhapeleleke mwaana ola, miyo kinimoolivani’.

Vaavo mwaana ole annunwe awe, Yokebedi aahimuroiha wa mwaana a Farawo, nto owo aahinvaha nsina na Moise ni aahimuhuwa ntoko mwanawe oomuyara. Moise aahinnuwa ntoko mwaana a mwene ni aanivahiwa khula etthu aaphavela awe. Masi Moise khaatonko omuliyala Yehova. Aanisuwela wira ari a nloko na Isarayeli, ohiya wEjiitu. Nto aahithanla omurumeela Yehova.

Okathi Moise aarina awe iyaakha 40 aahilakela waakhaliherya atthu a nloko nawe. Nto vaavo anwenhe awe mulopwana mmosa a wEjiitu amuhaaxaka mutthu a nloko na Isarayeli, Moise aahimmana mutthu ole a wEjiitu mpakha omwiiva. Nuumala-vo, aahimuuheela vaareyani. Okathi Farawo aasuwenle awe, aahimananiha omwiiva Moise. Masi Moise aahitthyawela oMadiyani. Yehova aahimukhapelela opuro ole.

Moise aahikhala iyaakha 40 oMadiyani. Owo aahimuthela muthiyana ni aahikhalana anamwane. Nihiku nimosa, vaavo aalyiha awe inama waattamela omwaako Sinayi, aahiweha etthu emosa yootikiniha. Aahiweha mwiri opattaka masi khiwaalala! Okathi Moise aattamenle awe wira awehe saana, aahiiwa nsu nihimyaka so: ‘Moise! Muhaattamele-va! Murule ixapattho sanyu maana opuro ola ti woothanliwa ni Muluku’. Nsu nlo naari na Yehova, ni aalavula orumeelaka nlaikha.

Okhala wira Moise aanoova, aahiikhuneela owiitho. Nsu nlo naahihimya so: ‘Kooweha wira aIsarayeli anoohaaxiwa. Vano kinrowa waakumiha wEjiitu wira kaaroihe elapo yooreera. Nyuwo munrowa waahoolelaka atthu aka nuumala okhuma wEjiitu’. Moohaanyiherya, Moise aahitikiniheya vanceene.

Moise aahikoha so: ‘Kakohiwa wira tani okirumme, kinrowa waakhula sai?’ Muluku aahimuleela wira: ‘Mwahimye wira kirummwale ni Yehova, Muluku a Abrahamu, Muluku a Isakhi ni Muluku a Yakobe’. Moise aahimukoha wira: ‘Ankhi atthu yaahiphavele okiwiriyana?’ Yehova aahipaka itthu saarowa omukhaliherya Moise omuroromela. Aahimuruma Moise onvonyerya ttootto awe vathi. Nuumala-vo, ttootto owo aahithatuwa enowa! Vaavo Moise aavanre awe mwiila wa enowa eyo, yaahipakeya-tho ttootto. Yehova aahimuleela wira: ‘Okathi munrowa anyu opaka mwiiriirya ola, eyo enimooniherya wira miyo koorummeni’.

Moise aahihimya wira: ‘Miyo nkinsuwela olavula saana’. Yehova aahimuleiherya wira: ‘Muhixanke miyo kinimooleelani ele enirowa anyu ohimya, nave kinoomuruma munninyu Aroni wira ookhaliheryeni’. Ororomelaka wira Yehova aari ni yena, Moise aahaakuxa amwaarawe ni anaawe ni aahitthikela wEjiitu.

AIsarayeli yaahikhanyereriwa ovara miteko soovila ntoko ipottha. Nto Yehova aahimuruma Moise ni Aroni orowa okumana ni Farawo ni omuleela wira: ‘Mwaahiye atthu aka erowe, yakikokhorele moothakoni’. Farawo aahaakhula wira: ‘Nkinrowa omwiiwelela Yehova! Ni nkinaahiya atthu a wIsarayeli erowaka’. Nuumala-vo, Farawo aahitepa waakhanyererya ovara miteko soolipa ovikana khalai. Vano Yehova aahimusomiha Farawo. Nyuwo munnisuwela etthu aapanke awe? Owo aahikumiherya Ihukhumu Muloko wEjiitu. Yehova aahimuleela Moise wira: ‘Farawo khoniphavela okiwiriyana. Meelo voosiisu, owo onoovenya arowaka omuro Nilo. Murowe mwakumane ni yena, mmuleele wira okhala wira khoniphavela waahiya atthu aka erowaka, maasi otheene a muro Nilo anoopakeya ephome’. Moise aahimwiiwelela Yehova ni aahirowa okumana ni Farawo. Okathi yaakumanne aya ni Farawo, Aroni aahimukuxa ttootto ni aahimana maasi a muro Nilo. Vano muro owo waahipakeya ephome. Waahipacerya wunkha, ihopa saahikhwa, vano maasi a muro Nilo khiyaareerela-tho owuriwa. Hata vari siiso, Farawo aahivikaniha okhootta waahiya aIsarayeli erowaka.

Nuuvira mahiku 7, Yehova aahimuruma Moise otthikela wa Farawo ni omuleela so: ‘Okhala wira khamuniphavela waahiya atthu aka, elapo yotheene ya wEjiitu enoosareya anaphulu’. Aroni aahiteexerya musulu ekopo awe ni yaahikhumelela anaphulu anceene mpakha osarya elapo ele. Atthu yanaaphwanya anaphulu mpaani, vakhaamani, ni mparathoni. Nto anaphulu awo yaaniphwanyaneya mapuro otheene! Farawo aahimuleela Moise wira anvekele Yehova wira amalihe ehukhumu ele. Farawo aahihimya wira aamwaahiya aIsarayeli eroweke. Nto Yehova aahimaliha, vano atthu a wEjiitu yaahiwuukela anaphulu ookhwa, mapuro manceene. Elapo yotheene yaahipacerya wunkha. Masi hata vari siiso, Farawo kaatthunne-tho waahiya aIsarayeli erowaka.

Nuumala-vo, Yehova aahimuruma Moise wira: ‘Aroni ohaana omana etthaya ni ekopo awe, nto ntthupi nnoopakeya apwilimwithi’. Moohipisa yaahikhumelela apwilimwithi anceene. Arumeyi akina a Farawo yaahihimya so: ‘Ehukhumu ela enikumiheriwa ni Muluku’. Masi hata vari siiso, Farawo aahivikaniha waakhoottiherya aIsarayeli okhuma wEjiitu.

Moise ni Aroni yaahirowa omuleela Farawo wira: ‘Mwaahiphavele waahiya atthu aka erowaka, kinimwaaruuha aphuure anceene. Nto atthu otheene a wEjiitu yaahaakhumelela aphuure owannyeya. Elapo yotheene yaahisareya aphuure. Masi muttetthe wa oGoseni weiwo yaakhala aya aIsarayeli, khiyaakhanle aphuure. Okhuma vaavo, ihukhumu sotheene saakhumelela, saaphwanya paahi atthu a wEjiitu. Farawo aahimuleela Moise wira: ‘Munvekele Yehova wira aamalihe aphuure ala. Vano murowaseke!’ Masi nuumala Yehova waamaliha aphuure ale, Farawo aahirukunuxa murima awe. Niireke ihukhumu iye saahimwiixuttiha etthu Farawo?

Yehova aahihimya wira: ‘Farawo akhootta-tho waahiya atthu aka, axinama otheene a wEjiitu anoowereiwa ni animookhwa’. Mmeeloni mwaya, axinama a atthu a wEjiitu yaahipacerya okhwa. Masi axinama a atthu a wIsarayeli khiyaakhwiiye. Farawo aahivikaniha okhootta omwiiwelela Yehova.

Yehova aahimuruma Moise otthikela wa Farawo ni oyeeherya ettuurwa musulu. Ettuurwa eyo yaahipakeya ntthupi khumwareela mulaponi motheene mwa wEjiitu. Ntthupi nlo nahaakumiherya atthu a wEjiitu makhwatta oowereya vamosa ni axinama aya. Hata vari siiso, Farawo aahikhootta waahiya aIsarayeli erowaka.

Yehova aahimuruma-tho Moise orowa wa Farawo omuleela so: ‘Xeeni munikhootta anyu waahiya atthu aka? Meelo enoorupa epula ya maralala maalupale elapo ela’. Mmeeloni mwaya Yehova aahiiriha omora epula ya maralala ni itari sowoopiha ni mooro. WEjiitu khiyaatonko okhumelela etthu yootikiniha ntoko ele. Miri ni imatta sotheene saahihononeya, masi sa oGoseni khisaahononeyale. Farawo aahihimya wira: ‘Munvekele Yehova wira omaalihe itari iya! Nuumala-vo, murowaseke’. Moohipisa okathi epula ni itari saamanle aya, Farawo aahirukunuxa murima awe.

Moise aahihimya wira: ‘Vano isoope sinrowa okhuura makukhu otheene ahiiwale ni etari ni epula ya maralala’. Nto saahikhumelela isope ni sahikhuura makukhu otheene a miri. Farawo aahimuleela Moise wira: ‘Munvekele Yehova wira amalihe isoope iya’. Masi hata nuumala Yehova opaka eyo, Farawo khaapanke ele yaahimmye awe.

Yehova aahimuleela Moise wira: ‘Mookolele ntata nanyu musulu’. Okathi ene yoowo, yaahikhumelela epiphi. Yaahivira mahiku mararu atthu a wEjiitu ehiweryaka owehana. Masi owannyeya aIsarayeli khiyaakhumelenle epiphi.

Farawo aahimuleela Moise wira: ‘Mwaakuxe atthu anyu murowaseke. Masi axinama anyu muhaana waahiya’. Moise aahaakhula wira: ‘Nihaana waakuxa axinama ahu wira nanvahe mukuttho Muluku ahu’. Nto Farawo aahinanariwa vanceene khumoomola Moise ohimyaka so: ‘Mukhume-va! Muhitthikele-tho orwa okilavuliha, mwatthika-vale kinoowiivani!’

Moise aahimuleela Farawo wira khaarowa-tho otthika. Masi ahinatthi Moise okhuma, aahimuleela Farawo wira: ‘Ohiyu eriyari anamwane otheene oopacerya a wEjiitu animookhwa, okhuma mwaana a Farawo mpakha mwaana oopacerya a epottha yeeyo muteko aya ori oxila’.

Yehova aahaaruma aIsarayeli opaka yoolya ya vameekhaaya. Owo aahaaleela so: ‘Muhite epwittipwitthi wala epuri yoolopwana erina eyaakha emosa, nto ephome aya muttikitthele mukerekhere mwa mukhora anyu. Vano enama aya mukhuureke ni ephaawu yoohiheliwa miropo. Nware ixapattho sanyu ni mwiilokiherye wira muroweke. Ohiyu yoola miyo kinimookumihani wEjiitu’. Niireke munnoona moota aIsarayeli yaahakalanle aya?

Ohiyu eriyari, nlaikha na Yehova naahivira inupa sotheene sa atthu a wEjiitu. Inupa sotheene sahaattikittheliwe ephome vamukhora, aahikhwa mwaana oopacerya. Masi nlaikha nle, khinaakenle inupa seiye saaheliwe ethoonyeryo ya ephome. Itthoko sotheene sa wEjiitu, iye soothaaciri ni iye soohaawa, saahikhweliwa mwaana. Masi khuuvo mwaana a wIsarayeli aakhwiiye.

Hata mwaana a Farawo aahikhwa. Etthu eyo yaahinwereya vanceene Farawo, nto moohipisa aahimuleela Moise ni Aroni wira: ‘Mukhumase elapo aka. Muroweke mwamurumeeleke Muluku anyu. Mukuxeke inama sanyu!’

Ohiyu ene yoole, mweeri waaryaka, aIsarayeli yaahikhuma wEjiitu. Vano atthu yaahitthokihiwa moovarihana ni imusi saya ni maloko aya. Yaari alopwana 600.000, ni athiyana ni anamwane anceene a nloko na Isarayeli. Nave-tho, atthu akina anceene yaawo yaamukupanli Yehova, yahaatthara aIsarayeli. Vano aIsarayeli yahoopowa!

Wira yuupuweleleke moota Yehova aawooponle awe, awo yaahaana opaka yoolya emosaru khula eyaakha. Eyo yaitthaniwa Paasikha.

Nuumala Farawo oleeliwa wira aIsarayeli yaahikhuma wEjiitu, aahirukunuxa muupuwelo awe mwaha wa waahiya aIsarayeli arowaka. Owo aahihimya wira: ‘Naahiyenryeni erowaka? Mulokiherye ikaaro saka sotheene sa ekhotto ni anakhotto aya wira naatthimakele aIsarayeli!’ Vano Farawo ni anakhotto awe yahaatthimakela aIsarayeli.

Othana Yehova aaniweettiha atthu awe orumeelaka neeku, vano ohiyu aarumeela mooro. Aahaahoola mpakha Ephareya Yooxeerya ni ahaaleela wira akhale vaavale.

Nuumala-vo, aIsarayeli yaahinweha Farawo ni anakhotto awe arwaaka. Vano awo yaari eriyari, mpantta mmosa yaari ephareya, nto mpantta mukina yaari anakhotto a wEjiitu. Awo yaaninla amuleelaka Moise wira: ‘Hiyo nnimookhwa. Phataari mwahaanikuminhe wEjiitu’. Nto Moise aahiwaakhula wira: ‘Muhoovase. Mulipeleleke wira nwehe moota Yehova onrowa awe onoopola’. Tthiri Moise aanimuroromela Yehova.

Yehova aahaaleela aIsarayeli wira ahoove etthu. Ohiyu ene yoole, Yehova aaheettiha neeku nawe khupweha eriyari ya aIsarayeli ni atthu a wEjiitu. Mpantta yaakhala atthu a wEjiitu yaahikhala epiphi. Masi mpantta yaakhala aIsarayeli khiyaakhanle epiphi.

Yehova aahimuleela Moise wira ookolele moono awe vasulu va ephareya. Nto Yehova ahikumiherya epheyo yuulupale ohiyu wotheene. Ephareya yaahuuma khukawanyeya ipantte piili. AIsarayeli imilyau sinceene yaahilapuwela epantte ekina yeettaka vasulu va etthaya yowuuma eriyari ya ixiri sa maasi.

Anakhotto a Farawo yaahaatthara aIsarayeli vaavo yaalapuwa aya ephareya yowuuma. Moottharelana, Yehova aahiwaakanyerya anakhotto a wEjiitu. Ikaaro saya saahipacerya okhuleya maroota. Anakhotto awo yaanikhuwela yiiraka: ‘Nrowe nitthyawe, Yehova oniphavela oniiva wira owoopole aIsarayeli’.

Yehova aahimuleela Moise wira: ‘Mookolele moono anyu mphareya’. Nto okathi owo ixiri sa masi saahipacerya waamorela anakhotto a wEjiitu. Farawo ni atthu awe yaahikhwa. Khuuvo nakhotto ooponwe.

Nto mwa mpantta mukina wa ephareya, atthu yaaninvuwiha Yehova ehimyaka so: ‘Mmwiipele Yehova okhala wira ohooniherya owerya wawe. Anakhavalo ni ikhavalo saya ahookhwa ephareya yooxeerya’. Vaavo atthu yiipa aya, athiyana yaaniina ni woopa malapa. Otheene yaahihakalala okhala wira vekeekhai yahoopoliwa.

Sivinre ene myeeri miili nuumala aIsarayeli okhuma wEjiitu, yaahiphiya oMwaako Sinayi ni yaahimaka weiwo. Yehova aahimwiitthana Moise vamwaako khumwiirela so: ‘Miyo kiwooponle aIsarayeli. Yaiwelela moolumo aka, anrowa okhala nloko naka’. Moise aahikhuruwa va mwaako, ni aahaaleela aIsarayeli itthu sotheene Yehova aamuhimenrye awe. Awo yaakhunle sai? Yaakhunle so: ‘Sotheene Yehova sinihimenrye awe, nnimweettela’.

Moise aahihokolowela omwaako. Yehova aahimuleela so: ‘Murotto miyo kinimoorwa okumana ni nyuwo. Mwaahimeerye atthu wira yiikasoope ehiwele mwaako ola Sinayi’. Moise aahikhuruwa ni aahaaleela atthu otheene wira yiiwe nsu na Yehova.

Nuuvira mahiku mararu, aIsarayeli yaahoona neeku nooriipa ni overunya va mwaako. Nave yaahiiwa-tho okukutteya wa etari ni oruma wa nlope. Nuumala-vo, Yehova aahikhuruwela vamwaako ntoko mooro. AIsarayeli othene yaahithukumela ni woova. Mwaako wotheene waanitetereya ni waahisareya mwiixi. Oruma wa nlope waahitepa wiiwanyeya. Vano Muluku aahihimya wira: ‘Miyo ka Yehova. Muhikhalané amuluku akina, kihikhanle miyo’.

Moise aahiwela-tho vamwaako, ni Yehova aahinvaha sooruma sa moota atthu yaarowa aya omurumeelaka Yehova. Moise aahilepa sooruma iyo ni aahisoma ohoolo wa aIsarayeli. Awo yaahileiherya so: ‘Moolumo otheene onrumale awe Yehova nnimweettelaka yaawo’. Awo yaahimuleiherya Muluku. Masi niireke yaahivara ele yaaleihenrye aya?

Yehova aahimuleela Moise wira: ‘Nwele mwaako ola mpakha opuro ori aka. Kinoolepa Sooruma saka vamalukuni ni kinimoovahani’. Moise aahiwela mwaako khukhala weiwo mpakha ovira mahiku 40, othana ni ohiyu. Yehova aahilepa Sooruma 10 va malukuni manli oophapateya ni aahinvahererya Moise.

Nuuvira okathi, aIsarayeli yahuupuwela wira Moise aahaahiya. Nto yaahimuleela Aroni wira: ‘Nnimphavela mutthu wira okhale muhooleli ahu. Munipakele muluku ahu!’ Aroni aahaakhula wira: ‘Mukivahe eweero’. Nto owo aahitotoxa eweero ni aahimpaka mwaanyompe a eweero. Atthu yaahihimya so: ‘Mwaanyompe ola ti muluku ahu onikumihale wEjiitu!’ Atthu awo yaahipacerya omukokhorela mwaanyompe a eweero, ni yaahipaka efesta. Niireke eyo yaari etthu yooloka? Nnaari, maana atthu ale yaahileiherya wira yaarowa omukokhorelaka Yehova paahi. Masi vano awo khiyaapanke ele yaaleihenrye aya.

Yehova aahiweha ele yiiraneya ni aahimuleela Moise wira: ‘Mukhuruwe mwakumane ni atthu. Awo aahiya okiiwelela ni animukokhorela muluku eethiru’. Moise aahikhuruwa okunxe ene maluku manli oophapateya.

Okathi Moise aattamenle awe opuro waari atthu ale, aahiwiiwa yiipaka. Nto aahaaweha yiinaka ni emukokhorelaka mwaanyompe. Moise aahinanariwa vanceene. Aahirihela maluku ale manli vathi ni yaahiphweeya. Nave aahimpaha mwaanyompe ole. Nuumala-vo, aahimukoha Aroni wira: ‘Atthu ala awenrye sai woowokani opaka etthu ela yootakhala?’ Aroni aahaakhula wira: ‘Muhinanariwe ni miyo. Nyuwo moosuwela saana wira atthu ala tootakhala. Yaaphavela okhalana muluku aya, miyo kahaavekela eweero, kitotoxa ni kimpaka mwaanyompe ola’. Vekeekhai, Aroni aahipaka etthu yoohiloka. Moise aahitthikela omwaako ni aahinvekela Yehova wira aalevelele atthu.

Yehova aahaalevelela atthu yaale yaamwiiwelela. Mooweha nthowa naya aIsarayeli yaatthuneya aya omwiiwelela Moise?

Okathi Moise aari awe omwaako Sinayi, Yehova aahimuruma opaka eheema wala etenda yeeyo yaitthaniwa etabernaakulu. AIsarayeli yaanirumeela etabernaakulu eyo wira emukokhoreleke Muluku. Awo yanwerya okuxaka etabernaakulu eyo okathi yaathaama aya.

Yehova aahihimya wira: ‘Mwaaleele atthu wira ekivahe mihakhu saya wira ekhaliherye otekiwa etabernaakulu’. AIsarayeli yaahivaha eweero, eparatha, eboronze, maluku oowaarya, ni itthu sikina soophwaneliha. Nave-tho, yaahivaha manri ni isapala sa inama, ikuwo sa eliinyu ni itthu sikina. Awo yaahivaha itthu sinceene mpakha Moise waaleela wira: ‘Soophiyerya! Vano pooti ohivaha-tho’.

Alopwana ni athiyana anceene ooratta yaahikhaliherya otekiwa etabernaakulu. Yehova aahaavaha miruku wira evare muteko ole. Akina yaamuttottha, otthava wala oreeriha. Nave akina yaahana maluku, oreeriha eweero aahiiso opattha miri.

AIsarayeli yaahipaka etabernaakulu sintoko Yehova aalenle awe. Awo yaahipaka ekortina yooreera, yeeyo yaakawanya etabernaakulu ipantte piili: Nipuro Noowaarya ni Nipuro Noowaaryexa. Nipuro Noowaaryexa yaahikhala ekaaxa yaitthaniwa nivuku wala ekaaxa ya nivarihano. Eyo yaapakiwe ni miri sa khampiri ni eweero. Nave-tho opuro owo waahikhala muthuko woowaarya wa eweero, meesa, ni altari aapahiwa-vo itthu. Vate va etabernaakulu yaahikhala ebasiya ya ekoopiri ni altari muulupale, yoowo saavahiwa-vo mikuttho. Nivuku wala ekaaxa ya nivarihano yaaniwuupuxerya aIsarayeli yooleiherya yampakenle aya Yehova. Niireke munnisuwela ele enitaphulela aya nuulumo noowi nivarihano. Nintaphulela yooleiherya ya vameekhaaya.

Yehova aahimuthanla Aroni ni anaawe wira avareke muteko otabernaakulu ntoko anamukuttho. Awo yaahaana okhapelela etabernaakulu ni onvahaka mikuttho Yehova. Muulupale aanamukuttho Aroni, teemiheriwa paahi okela Nipuro Noowaaryexa. Owo aanikela opuro owo ekwaha emosa khula eyaakha wira oleveleliwe itampi sawe, sa emusi awe ni itampi sa nloko notheene na aIsarayeli.

AIsarayeli yaamalinhe etabernaakulu nuumala ovira eyaakha emosa yaakhumme aya wEjiitu. Vano awo yaahikhalana nipuro noomukokhorela Yehova.

Yehova aahisariha etabernaakulu ni ovuwa wawe ni naahikhumelela neeku. Vaavo neeku nle naavikaniha aya okhala opuro ole, eyo yaaniwuupuxerya aIsarayeli wira khiyaatthuneya othaama. Masi vaavo neeku naakhuma ya opuro ole, aIsarayeli yaanisuwela wira waahiphiya okathi woothaama. Awo yaahaana okuxaka etabernaakulu ni otthara neeku nle.

AIsarayeli yaahikhuma omwaako Sinayi ni yaaheetta moothakoni mwa oParani mpakha ophiya muttetthe wiitthaniwa oKadexi. Yehova aahimwiirela Moise wira aarume alopwana 12 a khula nihimo, wira yahottele elapo Yehova aarowa awe waavaha. Nto Moise aahaathanla alopwana 12 ni aahaaleela so: ‘Murowase oKanani mwawehe akhala wira etthaya ya weiwo ti yooruwerya. Mwawehe-tho akhala wira atthu a elapo eyo tootupa, anikhala muheemani aahiiso ipa soolipihiwa’. Anamahottela ale 12, omuhela muhina Yoxuwa ni Kalebi yaahirowa oKanani.

Nuumala mahiku 40, anamahottela ale yaahitthika akunxe ene ifiigu, uva, ni mihokorokho sikina. Nto yaahihimyasa wira: ‘Tthiri elapo ya weiwo ti yooruwerya, masi atthu aya tootupexa, nave ipooma saya ti soolipihiwa ni soorakamela musulu’. Masi Kalebi aahihimya wira: ‘Muhoovase hiyo nnoowerya waaxintta. Haya nrowe!’ Munnisuwela nthowa naya Kalebi aalavunle awe siiso? Nthowa noowi owo ni Yoxuwa yaanimuroromela Yehova. Masi anamahottela akina 10 yaahihimya-tho wira: ‘Animootha, atthu awo tootupexa ni oorakamexa! Niilikanyihaka naawo hiyo naakhala ntoko isoope’.

AIsarayeli yaahitteettheya. Nto yaahipacerya wiikhupanyerya ni oleelana wira: ‘Nimuthanle muhooleli mukina nihokolowele wEjiitu. Ninrowelani opuro ola wira naiviwe?’ Yoxuwa ni Kalebi yaahihimya wira: ‘Muhimurukunuwele Yehova, ni muhoove. Yehova onoonikhapelela’. Masi aIsarayeli khiyaiwelenle. Nto awo yaahiphavela omwiiva Yoxuwa ni Kalebi!

Exeeni Yehova aapanke awe? Owo aahimuleela Moise wira: ‘Mpakha silini aIsarayeli anrowa aya okhootta okiiwelela, kiwiirenle ene itthu sinceene sooloka eriyari aya? Atthu ala anrowa okhalaka moothakoni mpakha ovira iyaakha 40, nave anrowa okhwela muumu. Masi anaaya paahi vamosa ni Yoxuwa ni Kalebi tanrowa okela elapo kaaleihenrye aka’.

Muhoolo mwaya, nlelo aIsarayeli ari ene moothakoni, Koré, Datani, Abirami, vamosa ni atthu 250, yaahihiya omwiiwelela Moise. Awo yaahimuleela wira: ‘Noophweeleya ni nyuwo! Xeeni muniipaka anyu okhala muhooleli ahu, nave munamuthanla Aroni okhala mukhulupale a anamukuttho? Yehova ori ni hiyo otheene ahu, ohiya paahi nyuwo ni Aroni’. Moolumo ale yaahimunanara Yehova. Nto mwa moonelo awe, iwe waari ommwareela yena!

Moise aahimuleela Koré ni ale yaamutthara wira: ‘Meelo vosiisu, mwaruuhe mihasa, muhele-mo makhala a mooro ni erupani. Yehova onoomusuweliha ole omuthanlale awe’.

Mmeeloni mwaya, Koré ni atthu 250 yaahirowa okumana ni Moise otabernaakulu. Awo yaahipaha erupani ntoko wira yaari anamukuttho. Yehova aahimuleela Moise ni Aroni wira: ‘Nvalaane ni Koré ni atthu awe’.

Nnaamwi Koré aaronwe okumana ni Moise otabernaakulu, Datani, Abirami ni imusi saya yaahikhootta orowa. Yehova aahaaleela aIsarayeli wira ahaattamele owannyawe Koré, Datani, ni Abirami. Moohipisa, aIsarayeli yaahiiwelela yooruma eyo. Datani, Abirami ni imusi saya yaaheemela ota wa iheema saya. Mootutuxerya, etthaya yaahihuleya ni yaahaamirya anammwareya ale! Nto waahikhuruwa mooro wiirimu ni waahimpaha Koré ni atthu awe 250 yaari otabernaakulu.

Yehova aahimuleela Moise wira: ‘Mukuxe ikopo sa ahooleli otheene a khuta nihimo, ni mulepe masina aya. Masi ekopo ya nihimo na aLevi mulepe nsina na Aroni. Ikopo sotheene mpwehe mutabernaakulu, vano ekopo ya mutthu omuthanlale aka enoomela ithutu’.

Mmeeloni mwaya, Moise aahiruuha ikopo sotheene ni aahiwooniherya makhulupale. Ekopo ya Aroni yaahimela ithutu ni yaahikhalana amendowa oottokottha. Nto eyo yooniherya wira Yehova aahimuthanla Aroni wira okhale mukhulupale a anamukuttho.