Arummwa yaahiiwelela yooruma ya Yesu ya olaleya ihapari sooreera elapo yotheene. Eyaakha 47 EC, axinna a wAntiyokiya yaahimuruma Paulo ni Baarnaba opaka mikwaha soolaleerya. Anamalaleerya awo anli ooluttuweliwa yaahirowa ilapo sotheene sa wAsia Menor, ntoko oDerbe, oListra, ni wIkonio.

Paulo ni Baarnaba yanaalaleerya atthu otheene, athaaciri, amasikhini, amiravo ni atthu aalupale. Atthu anceene yaaheemererya ekeekhai voohimya sa Yesu Kristu. Okathi Paulo ni Baarnaba yaamulalenrye aya guvernatoro a esisiro ya oKípero, Serjio Paulo, namaxitta mmosa aahimananiha waakhoottiherya. Paulo aahimuhimeerya so: ‘Yehova onimoohukhumuni’. Okathi ene yoowo, namaxitta ole aahipacerya ohoona. Vaavo guvernatoro oonale ele yaakhumelenle, aahaamini.

Paulo ni Baarnaba yaanilaleerya mapuro otheene, mmawaani, mapuro iiriwa nakoso, mphironi ni musinagoga. Okathi yampenunxe aya mulopwana mmosa oorakala a oListra, atthu yoonale etthu ele, yuupuwela wira Paulo ni Baarnaba yaari amuluku; tivonto yaahiphavela waakokhorela. Masi Paulo ni Baarnaba yahaahiiha atthu ale ehimyaka so: ‘Mmukokhoreleke Muluku paahi. Hiyo naatthu, ntoko nyuwo’. Okathi ene yoowo, yaahiphiya aYuda akina ni yaahiwoototha atthu ale wira emwiive Paulo. Muttitthi ole wa atthu waahinvonyakasa maluku Paulo, khumpurulela ota wa muttetthe, ni yaahimuhiya yuupuwelaka wira aahikhwa. Masi Paulo khaakhwiiye. Moohipisa, axinna yaahirwa onvenxa khumuroiha mmuttettheni. Nuumala-vo, Paulo aahitthikela wAntiyokiya.

Eyaakha 49 EC, Paulo aahipaka mukwaha mukina. Nuumala otthika wira aaxukurye anna a wAsia Menor, Paulo aahiroiha ihapari sooreera mapuro oorakamela, wEuropa. Owo aahirowa wAthena, wEfeso, oTesalonika, ni ilapo sikina. Sila, Luka ni mmiravo aitthaniwa Timootheyo, yaahipacerya weetta ni Paulo. Awosa yaanivara muteko hoothe wira epake miloko sa eKristau ni olipiha miloko iyo. Paulo aahihala oKorinto eyaakha emosa nnimeya, aalipihaka axinna. Owo aanilaleerya, wiixuttiha, ni olepela ipaphelo miloko sinceene. Paulo aanipaka iheema. Nuuvira okathi, aahihokolowela wAntiyokiya.

Muhoolo mwaya, eyaakha 52 EC, Paulo aaheetta mukwaha awe wa neeraru, opaceryaka wAsia Menor. Owo aahirowa mittetthe soorakamela sa epantte enikela epheyo ya oFilipi ni aahirowa wIkonio. Paulo aahiviriha iyaakha sinceene ori ene wEefeso, owiixuttihaka atthu, aapenuxaka aretta, ni okhaliherya muloko. Nave-tho owo aaniwiixuttiha atthu khula nihiku esaala yuulupale ya oxikola. Nto atthu anceene yaahiiwelela ihapari sooreera ni yaahituruka mweettelo aya. Nuumala olaleerya ihapari sooreera ilapo sinceene, Paulo aahirowa oYerusalemu.

Aahikhala murumeyi mmosa muthiyana yoowo aarina munepa wootakhala mwerutthuni mwawe aakhala oFilipi. Munepa owo waanimurumeela mwali ole wira ohimyeke itthu saarowa okhumelela muhoolo. Nto mapwiya awe yaaniphwanya musurukhu munceene mwaha wa muteko awe. Okathi Paulo ni Sila yaaphiyale aya oFilipi, mwaaruusi ole aanaatthara mahiku manceene. Munepa ole waanimwiiriha okhuwela ohimyaka so: ‘Alopwana ala, arumeyi a Muluku Muulupalexa’. Wanikisa waya, Paulo aahileela munepa ole wootakhala wira: ‘Kinooruma mwa nsina na Yesu: omuhiye muthiyana ola!’ Munepa ole waahimuhiya mwaaruusi ole.

Okathi yoonale aya wira khiyaawerya-tho ophwanya musurukhu amurumeelaka mwaaruusi ole, mapwiya awe yaahinanariwa vanceene. Awo yaahimpurulela Paulo ni Sila wa makhulupale yaaphuka milattu epooma ele, khuhimya so: ‘Alopwana ala annitthekela nlamulo ni annikumiherya ohiiwanana epooma yotheene’. Makhulupale awo yaahiruma wira Paulo ni Sila yuuputthiwe ni eriheliwe mukhatteya. Guarda aahaarihela mukhattteya mooriipela, khwaatthukwa inawu saya, aalipihaka ni miri.

Okathi owo, anamutthukiwa akina yaanimwiiwa Paulo ni Sila emwiipelaka ni omuttottopela Yehova. Mootutuxerya, ohiyu eriyari yaahikhumelela etetere yuulupale, yeeyo yaahanle vakhaani opwexa ekhatteya. Mikhora sa ekhatteya saahihuleya, nave ikwirinti saatthukaniwe Paulo ni Sila saahitthukuwa. Guarda aahitthimakela mukhatteya ni aahiphwanya mikhora sotheene sihuleyale ene. Atthokelelaka wira anamutthukiwa ootheene yaahitthyawa, aahikumiha ekatana awe wira iixiive.

Okathi ene yoowo, Paulo aahimukhuwelela so: ‘Muhiixiive! Othene ahu niri muumu!’ Vano guarda aahitthimaka, aahikokhora ohoolo wa Paulo ni Sila. Nuumala-vo, aahaakoha wira: ‘Kipake exeeni wira koopowe?’ Vano awo yaahimwaakhula so: ‘Nyuwo ni atthu otheene anikhala vatthokoni vanyu muhaana omwaamini Yesu’. Paulo ni Sila yaahimwiixuttiha nuulumo na Yehova, nto guarda ole ni atthu otheene yaakhala owannyawe yaahibatiziwa.

Timootheyo aari mmiravo a muloko wa oListra. Apapawe yaari muGriki, amamawe, yaari muYuda. Amamawe yaitthaniwa Eunisi, nto apiipi awe yaitthaniwa Loide. Awo yaahimwiixuttiha Timootheyo voohimya sa Yehova okhuma onamwane awe.

Okathi Paulo aaxukunrye awe oListra mukwaha wa nenli, aahiweha wira Timootheyo aanaaphenta axinna vanceene ni aaniphavela waakhaliherya. Paulo aahimulattula Timootheyo wira omuhooleke mikwaha sawe. Paulo aahimwiixuttiha Timootheyo olaleerya saana ni wiixuttiha ihapari sooreera.

Munepa wootteela waanimuhoola Paulo ni Timootheyo khula opuro waaphavela aya. Ohiyu omosa, moolohani, Paulo aahimoona mulopwana mmosa anvekelaka wira orowe oMacedonia aakhaliherye atthu a weiwo. Nto Paulo, Timootheyo, Sila ni Luka yaahirowa olaleerya elapo ele ni yaahipaka miloko.

oMacedonia, epooma ya oTesalonika, alopwana anceene ni athiyana yaahikhala maKristau. Masi aYuda akina yaahimukhalela nrima Paulo ni akhwaawe. Awo yahaathukumanya atthu ootakhala ni yaahaavara anna khwaaroiha ohoolo wa makhulupale a muttetthe, ekhuwelaka so: ‘Atthu ala khaniiwelela yooruma ya mwene a oRoma’. Paulo ni Timootheyo yaari mmaxakhani, nto yaahitthyawela oBereya ohiyu.

Atthu a oBereya yaaniphavela wiixutta ihapari sooreera, nto aGriki ni aYuda yaahikhala atthareli. Masi okathi yaaphiyale aya aYuda akina yaakhuma oTesalonika ni enakumiherya ohiiwanana, Paulo aahirowa wAthena. Timootheyo ni Sila yaahihala elapo ya oBereya wira yaalipiheke axinna. Nuuvira okathi, Paulo aahimuruma Timootheyo otthikela oTesalonika wira aakhaliherye anna mwaha wa olupatthiwa wuulupale. Muhoolo mwaya, Paulo aahimuruma-tho Timootheyo orowa oxukurya ni olipiha miloko sikina sinceene.

Paulo aahimuleela Timootheyo wira: ‘Othene ale antthuna omutthara Muluku anoolupatthiwa’. Timootheyo aahilupatthiwa ni otthukweliwa mukhatteya mwaha wa waamini wawe. Owo aanihakalala mwaha wookhalana eparakha ya wooniherya ororomeleya wawe wa Yehova.

Paulo aahaaleela maKristau a oFilipi wira: ‘Kinoomuruma Timootheyo wira orwe weiwo. Owo onoowiixuttihani weettela ekeekhai ni olaleerya’. Paulo aahisuwela wira aahaana omuroromela Timootheyo. Paulo ni Timootheyo yaari apatthani, ni yaahivara muteko hoothe iyaakha sinceene.

Ekwaha ya neeraru ya olaleerya wa Paulo yaamalenle oYerusalemu. Nuumala ophiya, aahivariwa khuriheliwa mukhatteya. Moolohani, Yesu aahimuhimeerya wira: ‘Muhaana orowa oRoma, wira mwalaleerye wuuwu’. Paulo aahikuxiwa oYerusalemu ni aahiroihiwa oKesareya, weiwo aamalinhe awe iyaakha 2 oryeene mukhatteya. Okathi aaphukeliwa awe ni Guvernatoro Festo, Paulo aahimmye so: ‘Mukiroihe wa Seesari, mwene a oRoma’. Festo aahimuhimeerya so: ‘Okhala wira muniphavela ophukeliwa ni Seesari, munoorowa wa yoowo tthiri’. Paulo aahiwelihiwa ekalawa yaarowa oRoma, nave axinna anli maKristau, Luka ni Aristarko yaahimuhoola.

Yeettaka siiso mphareya, yaahoopa epheyo yuulupale, yeeyo yaamalinhe mahiku manceene. Atthu otheene yaari mukalawani yaatthokelela wira yaarowa okhwa. Masi Paulo aahaahimeerya so: ‘Alopwana! Nlaikha nookihimeerya moolohani wira: Nyuwo Paulo, muhoove. Munooroihiwa oRoma, ni atthu otheene ari ni nyuwo mukalawani animoopowa’. Nuumala-vo Paulo aahihimya-tho so: ‘Mulipihe murima, khaninkhwa’.

Epheyo ele yaahimaliha mahiku 14 yoopaka. Nuumala-vo, yaahipacerya oweha etthaya. Eyo yaari esisiro ya oMalta. Ekalawa yaahisama ni khuphweeya, masi atthu otheene 276 yaahoopowa, khurowa esisiro yoowaattamela. Atthu akina yaahikatelela, masi akina yaahivarela ithaapwa sa ekalawa ni yaahoopowa. Atthu a oMalta yaahaakhapelela ni yaahiiseela mooro wira yooreke.

Sivinre ene myeeri miraru, anakhotto yaahimukuxa Paulo amuroiha oRoma ni ekalawa ekina. Vaavo Paulo aaphiyale awe, axinna yaahirwa okumana ni yena. Awoonakaru, aahimuxukhuru Yehova ni aahiphwanya ikuru. Nnaamwi Paulo aari namutthukiwa, aaneemiheriwa okhalaka enupa emosa mekhawe, memmo aalipeleliwa awe ni nakhotto mmosa. Owo aahikhala empa eyo mpakha iyaakha piili. Vano atthu yaanirwa onweha, owo aanaalaleerya Omwene wa Muluku ni aaniwiixuttiha sa Yesu. Nave-tho Paulo aanilepela ipaphelo miloko sa eKristau sa wAsia Menor ni oYudeya. Tthiri Yehova aahimurumeela Paulo wira alaleye ihapari sooreera ilapo sinceene.