NYUWO MWAANISUWELA?

Yaarumeeliwa sai maxilo okathi wa khalai?

Khalai atthu yaanirumeela maxilo wira axile etrigo yaapakeliwa iphau. Maxilo yaari etthu yaarumeeliwa mahiku otheene ni ipottha, athiyana, wala arumeyi a vatthokoni. Wisarayeli wa khalai mahiku otheene waniiwanyeya oruma wa maxilo.​—Okhuma 11:5; Yeremiya 25:10.

WEjiitu wa khalai soophwanyiwa ilatarato sinooniherya orumeeliwa wa maxilo. Yaanirumeliwa maluku manli, eyo piiyo, nxilo ni kanaha. Maluku ala manli, yaanirumeeliwa wira epakiwe ephepa. Ole aarumeela nxilo aanikokhora nto anaamweettiha kanaha vanxiloni ni matata awe oomanli. Moovarihana ni eliivuru emosa, akanaha awo, olemela waya waakhala wa ikiilu 2 wala 4. Okathi naarumeeliwa aya ntoko ekaruma ya ekhotto nluku nlo naaniwerya omwiiva mutthu.​—Makhulupale 9:50-54.

Nxilo ni kanaha saari itthu sootthuneya wira emusi ehikhwe etala. Otumererya 24:6 aahimya so: “Mwamukophiha mukhw’inyu, muhimukuxé namaxilo awe walá nxilo nawe ntoko nemexeryo: vamulikana n’ukuxa ekumi awe ntoko nemexeryo”.

Xeeni Biibiliya onihimya awe va Yohani 1:18 wira Yesu “ori [vakhiviru] mw’Atithi”?

Biibiliya onihimya wira Yesu “ori mw’Atithi” [‘vakhiviru va Atiithi’, NM]. (Yohani 1:18) Moolumo ala anooniherya wataana wuulupale Yesu orina awe ni Muluku. Nto eyo enooniherya yoolema aYuda yaatthara aya okathi woolya.

Okathi wa Yesu, aYuda yaanikilaathi vasofani wira alye moorukurerya meesa. Khula muhooleli a meesa aanikilaathi owehaka ohoolo wa meesa nto inawu sawe aaniweha mpantta mukina vaavo aamuhaamela awe almofada ni moono woothiyana. Nto moono woolopwana waanikhala ootaphuwa. Eliivuru emosa enitthokiherya so: “Okilaathi mwa enamuna eyo, waaniiriha muru wa mutthu okhala vakhiviru va epeeto ya mukhwaawe maana aletto yaakhala moono awe woothiyana. Tivonto vaahimmwa aya wira mutthu aakhala ‘vakhiviru’ va mutthu mukina”.

Okilaathi moomwaattamela mutthu aahoolela emusi wala muhooleli a efesta yaari eparakha yuulupale wala ottittimihiwa. Tivonto, okathi Yesu aamuupuwelela awe Paasikha ookiserya, “mwiixutti . . . amphentexawe”, eyo piiyo, murummwa Yohani, aahikilaathi moomwaattamela Yesu. Nto Yohani anwerya omuhaamela Yesu wira amukohe etthu.​—Yohani 13:23-25; 21:20.