OVAANELA VOOHIMYA SA BIIBILIYA

Xeeni Vanitthuneya Ahu Wuupuwelelaka Okhwa wa Yesu?

Moolumo anittharelana, ori ovaanela okhanle owiiraneya eriyari ya Namoona a Yehova ni mwaneene etthoko. Nilikanyihe wira Namoona oniitthaniwa Linda oophiya owannyawe muthiyana oniitthaniwa Levela.

“MWIREKE IYA, MUKUPUWELAKA MIYO”

Linda: Ehaali? Kaahihakalala woowehani omuthukumanoni wa Wuupuwelela Okhwa wa Yesu esumana evinre.a Moonenle sai?

Levela: Mm, kaahisiveliwa. Masi, wooleelani ekeekhai, nkaiwale saana itthu sotheene saahimmwale. Kimmakela owoona atthu yuupuwelelaka oyariwa wa Yesu okathi wa Natali ni ohihimuwa wawe okathi wa Paasikha, masi nkitonko owoona yuupuwelelaka okhwa wawe.

Linda: Eyo ekeekhai. Natali ni Paasikha onniiriwa olumwenku wotheene. Masi Anamoona a Yehova anikupali wira ti vootthuneya wuupuwelela okhwa wa Yesu. Akhala wira mookhalana okathi vakhaani, kinoowooniheryani mathowa aya.

Levela: Khiva mwaha.

Linda: Wira nipacerye, Anamoona a Yehova annuupuwelela okhwa wa Yesu, maana owo aahaaruma awiixutti awe opaka eyo. Muthokorerye ele yiiraneyale ohiyu wookiserya Yesu ohinatthi wiiviwa. Kiireke munnuupuwela yoolya ya vameekhaaya aapanke awe ni awiixutti awe?

Levela: Kiira munihimya Yoolya ya Ohiyu ya Apwiya?

Linda: Aayo. Okathi aapaka awe niira nlo, Yesu aahaavaha awiixutti awe malakiheryo oowiiweya saana. Xontte, mmusome Luka 22:19.

Levela: Oniira so: “Nave ahikuxa ephau, ahimuxukhuru Muluku, ahikawanya ephau iyo, khwavaha, ahimyaka wira: ‘Ela erutthu aka, evaheriwe nyuwo. Mwireke iya, mukupuwelaka miyo’”.

Linda: Kooxukhuru. Mooweha masu ookiserya a eveersu eyo? Yesu iirale so: “Mwireke iya, mukupuwelaka miyo”. Nave ohinatthi waaruma awiixutti awe omuupuwelela yena, aahihimya ele yaatthuneya aya wuupuwelelaka. Aahimyale wira ekumi awe yaarowa ovahereriwa mmureerelo wa awiixutti awe. Yesu aahooniherya muupuwelo mmosaru va Matheyo 20:28. Eveersu eyo eni: “Mwana a Mutthu kharwenle orumeliwa: orwenlé warumela atthu n’uleva ekumi awe, wira awopole atthu othene”. Ti maana aya Anamoona a Yehova anithukumana aya khula mwaakha ekwaha emosa wira yuupuwelele okhwa wa Yesu, eyo piiyo, wuupuwelela mukuttho awe. Okhwa wawe onimwaavaha okumi atthu otheene oowiiwelela.

XEENI VAATTHUNEYA AHU WOOPOLIWA?

Levela: Kinniwiiwa atthu ahimyaka wira Yesu aahikhwa wira onoopole. Masi ohimya ekeekhai, nkitonko wiiwexexa mwaha owo.

Linda: Muhixanke. Khahiyo nyuwo paahi muhiniiwexexa mwaha ola. Ola mwaha muulupale. Masi-tho onniirela mpantta ikeekhai sooreera sa mBiibiliyani. Mm, kiireke pooti ovaanela-tho vakhaani?

Levela: Aayo, nlelo kookhalana minutu vakhaani.

Linda: Vaareera. Kisomme niinano mwaha owo, nto kinoomananiha wootthokiheryani mwa enamuna yookhweya.

Levela: Kihiiwa.

Linda: Wanipacerya, nihaana othokorerya ele yaakhumelenle vaavo Adamu ni Eva yaatthenke aya ojardim ya wEdeni. Wira niiwexexe saana mwaha ola, nrowe niwehe yoolepa ya aRoma 6:23. Xontte pooti osoma eveersu ela?

Levela: Aayo. Eni: “Ale anvarela muteko etampi anniliviwa n’ukhwa: vano eparakha Muluku ennivahawe enniphwanyiha ekumi ehinimala, mwa Yesu Kristu Pwiy’ahu”.

Linda: Kooxukhurela. Nrowe nithokorerye masu ala. Moone wira eveersu ela enipacerya so: “Ale anvarela muteko etampi anniliviwa n’ukhwa”. Nla nlamulo nenlo Muluku aakumihenrye awe okathi aapattunxe awe apinaatamu, niire so, etampi enniphwanyiha ehukhumu wala okhwa. Wanipacerya khiyaakhanle anamattheka. Adamu ni Eva yaapattuxiwe aryeene oomalela, ni anaaya otheene yaarowa oyariwaka oomalela. Awo khiyaarowa okhwaaka. Adamu ni Eva ni osuulu aya yanwerya okhalana ekumi yoohakalaliha ni ehinimala. Masi ntoko ninsuwela ahu, ehaavo etthu yoohiloka yaakhumelenle, kiira?

Levela: Aahe. Adamu ni Eva yaahilya muhokorokho waakhoottihiwe.

Linda: Ekeekhai. Nto vaavo Adamu ni Eva yaathanlale aya ohimwiiwelela Muluku, yaahittheka. Okathi ole yaahithanla okhala atthu oohimalela ni anatampi. Yoothanla eyo yookumiherya mixankiho sinceene, ohiya paahi wa Adamu ni Eva masi-tho osuulu aya wotheene.

Levela: Muniphavela ohimya exeeni?

Linda: Nipake nlikanyiho nla. Kiireke onnoosivelani opaka iboolo?

Levela: Aayo!

Linda: Vano nilikanyihe wira nyuwo moothuma niformo nnooxiwa iboolo. Nto muhinatthi orumeela niformo nlo ninnimora nto khiyahononeya. Exeeni yaarowa wiiraneya ni iboolo sotheene saarowa opakiwa ni niformo nno? Kiireke saamukhuma saana?

Levela: Nnaari.

Linda: Moolikanasa, okathi Adamu ni Eva yaamutthekenle aya Muluku, yaahikhala “oohononeya” wala oohimalela, mwaha wa etampi. Nave, mwaha woowi awo yaatthenke ahinatthi waayara anamwane, nto anaaya otheene yaayariwe “oohononeya” wala oohimalela, aahiiso oottheka. MBiibiliyani, nuulumo noowi “etampi” khinintaphulela paahi etthu yoohiloka, masi-tho mukhalelo oranve ahu. Okathi Adamu ni Eva yaatthenke aya, niira nlelo nihiyariwe. Nto awo aaniraviha hiyo ni osuulu ahu okumi woohimalela ni woottheka, nave wanikisa waya ninnookhwa. Ntoko nisomme ahu va aRoma 6:23, “ale anvarela etampi anniliviwa n’ukhwa”.

Levela: Eyo enikhala ntoko etthu yoohixariya. Xeeni atthu otheene anihaawa aya mwaha wa yoottheka ya Adamu ni Eva?

Linda: Nno nikoho nookhalela. Masi ehaavo etthu ekina. Muluku mwaha wa exariya awe yoomalela aahaalamula Adamu ni Eva wira akhwe, masi hiyo nookhalana nlipelelo. Muluku oopaka mareheryo wira omalihe muxankiho owo. Eyo ti etthu yaamwiirinhe Yesu ovaha yowoopola. Nkahaya mutthikele-tho onweha aRoma 6:23. Nuumala ohimya wira “ale anvarela etampi anniliviwa n’ukhwa”, eveersu eyo ennihimya-tho so: “Vano eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiy’ahu”. Nto okhwa wa Yesu onnihula ephiro wira noopoliwe voohimya sa etampi ni okhwa.b

YOWOOPOLA: YOOVAHA YUULUPALEXA YA MULUKU

Linda: Ehaavo-tho etthu ekina mwa eveersu ela eniphavela aka owooniheryani.

Levela: Etthu xeeni?

Linda: Eveersu ela eni: “Eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiy’ahu”. Nto akhala wira Yesu oohaawa ni ohookhwa mwaha wa hiyo, xeeni eveersu ela enilavula aya sa “eparakha Muluku ennivahawe”, ohiya “eparakha Yesu ennivaha awe”?c

Levela: Nkinsuwela nthowa naya.

Linda: Okathi yaamutthekenle aya Muluku, Adamu ni Eva yaahimwareela Mpattuxa aya. Muluku aahiriipiwa murima vaavo yahaamwiiwelenle aya. Masi moohipisa Yehova aahuupuwela etthu yoopaka.d Ahiiriha wira yoopattuxiwa awe emosa ya omunepani erwe valaponi, ekhale ntoko pinaatamu oomalela, ni wanikisa waya evahe okumi aya ntoko yowoopola. Veekeekhai, mareheryo otheene a yowoopola yaari yoovaha ya Muluku. Masi-tho ehaavo enamuna ekina yowoopola eri aya yoovaha ya Muluku. Mootoko wuupuwela moota Muluku aariipiwe awe murima vaavo Yesu aiviwe awe?

Levela: Nnaari nkitonko wuupuwela.

Linda: Kinnoona ibrinkedo opuro ola. Woonasa wene mookhalana anamwane.

Levela: Aayo, kookhalana anamwane anli, mulopwana ni muthiyana.

Linda: Ntoko namuyari, nkuupuwelani voohimya sa Yehova Muluku, Tiithi awe Yesu, oonenle sai nihiku Yesu aakhwiiye awe? Oonenle sai vaavo ari awe wiirimu anamoona mwanawe amphentexa awe aatthukweliwaka, oveehiwa, ni omaniwa? Paapa awe aari sai vaavo mwanawe aakhomeliwe awe ni okhwa mootakhala?

Levela: Kinoona wira yaahimuriipiha murima vanci. Nkitonko wuupulela mwaha owo!

Linda: Tthiri, khivaniweryaneya hiyo ohimya saana moota Muluku aariipiwe awe murima nihiku nle. Masi noosuwela moota oonenle awe, ni noosuwela nthowa naya eemerenrye awe wira itthu iya siiraneye. Eyo ennitthokihereya saana mwa yoolepa yoosuwelexiwa ya Yohani 3:16. Xontte munoowerya osoma?

Levela: Khiva mwaha. Enihimya so: “Vekekhai, Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”.

Linda: Kooxukhuru. Moone-tho masu oopacerya a eveersu ela. Ani: “Muluku ohaphentexa atthu”. Tthiri mukhalelo muulupale wa Muluku ti ophenta. Ophenta waahimwiiriha Muluku omuruma Mwanawe valaponi wira akhwe mmureerelo ahu. Tthiri yowoopola enooniherya ophenta wuulupale. Nto eyo ti etthu eniwiiriha Anamoona a Yehova wuupuwelelaka khula mwaakha niira na okhwa wa Yesu. Niireke wuuluula nlo ohookhaliheryani?

Levela: Aayo, Kooxukhurela orumeela okathi anyu wira nvaanele ni miyo.

Niireke nyuwo muhaana mwaha mukina a Biibiliya onootikinihani? Wala muniphavela osuwela sookupali ni sowiira sa Anamoona a Yehova? Akhala wira ti siiso, muhoovelele omukoha Namoona a Yehova. Owo onrowa osiveliwa othokorerya myaha iyo ni nyuwo.

[Inoota]

[Eponto yuulupale epaaxina 13]

Mukuttho wowoopola onooniherya ophenta wuulupale wa Muluku