Ninrowa Waavara Sai Murima Ale Anaasomiha Ahu?
1. Yoonela sai atthu yaaxuttihiwa ni Yesu?
1 Yesu aaniwerya waavara murima atthu yanwiriyana. Wookhala okathi mmosa, mirima sa arummwa awe ‘saviha’ aya nuumala otthokiheriwa oratteene Soolempwa. (Luka 24:32) Okhala wira omwiiwelela Muluku onikhuma vamurimani, nto ninrowa owerya sai waavara murima ale anaasomiha ahu wira awerye orukunuxa ekumi aya?—aRom. 6:17.
2. Muteko xeeni onivara aya ankhili ni masu oothanliwa saana wira naavare murima atthu akina?
2 Mulavuleke Masu Ooreerela ni a Ankhili: Anamunceene khivanaaphiyerya oleeliwa wira etthu emosa ekeekhai wala khahiyo. Tthiri, akina waananara ovaanyihiwa sookupali saya hata nimurumeelaka Biibiliya. Wira ninvare murima mutthu nihaana osuwela etthu enimwiiriha okupali ni opaka itthu mwa enamuna eniira awe. Nto mwa miruku mmukohe makoho othanliwa saana wira ohimye moonelo ni muupuwelelo awe. (Mir. 20:5) Nuumala owo ohimya enimwiiriha, nto nnoowerya othanla mBiibiliyani masu anrowa onvara murima. Okathi wotheene nihaana waareerela ni waapixerya murima. (Mir. 25:15) Musuweleke wira munnuwelo wa omunepani wa khula mutthu ti woovirikana. Nvaheke okathi wira munepa wootteela wa Yehova ovare muteko ni omwiirihe mutthu owo wuupuwelela ni ottharihela ele eniixutta awe.—Mar. 4:26-29.
3. Ninrowa waakhaliherya sai ale anaasomiha ahu wira akhalane mikhalelo sooloka?
3 Mwaakhaliheryeke Okhalana Mikhalelo Sooloka: Mipantta sa Biibiliya sinilavula sa oreera murima wa Yehova, sinimwaakhaliherya awo okhalana mikhalelo sooloka. Hiyo pooti orumeela soolepa ntoko Esal. 139: 1-4 wala Luka 12:6, 7, wira nimooniherye enamuna Yehova onaakhapelela awe atthu awe. Okathi atthu awo anipacerya aya osiveliwa oreera murima wa Yehova, omphenta waya Yehova onrowa wuncerereya. (aRom. 5:6-8; 1 Yoh. 4:19) Vamosaru, okathi oniixutta aya wira mweettelo aya onnooniwa ni Yehova, eyo enimwaakhaliherya opaka itthu sinrowa onvuwiha.—Esal. 78:40, 41; Mir. 23:15.
4. Ninrowa wooniherya sai wira ninnittittimiha soothanla sa mutthu okathi onilaleerya ahu?
4 Yehova khonimukhanyererya mutthu wira iiweleleke sooruma sawe. Ohiya-vo, owo onaavara murima atthu owooniheryaka wira otthara malamulo awe onimwaaphwanyiha mireerelo. (Yes. 48:17, 18) Hiyo nnoomutakiha Yehova vakhala wira ninwiixuttiha atthu naakhaliheryaka wira aweryeke wiiwexexa. Okathi atthu awo aniiwexexa aya mmensaya ele eniixuttihiwa aya, vannaakhweyerya opaka mirukunuxo, nto anoophwanya ekumi yoohimala. (aRom. 12:2) Eyo enoowiiriha awo omwaattamela ole onivarerya “mirima” sa atthu, Yehova.—Mir. 17:3.