Mukhaleleke Nthiti Owiixuttiha Atthu
1. Exeeni enitthuneya wira atthu anceene yoopowe?
1 Erelatoorio ya muteko ya 2014 ennooniherya nthiti na atthu a Muluku wira alaleerye ihapari sooreera sa Omwene. (Math. 24:14) Nivaraka muteko empa ti empa, ikampaanya sa vameekhaaya wira nikawe itratato ni ipaphelo sa nlattulo ni olaleerya mapuro oowaatta atthu, noowerya waalaleerya atthu anceene muhupi onikhuma mBiibiliyani ovikana khalai. Hata vari siiso, wira atthu anceene yoopowe, hiyo nihaana waakhaliherya wira akhale atthareli a Yesu naasomihaka Biibiliya.—1 Tim. 2:4.
2. Makoho xeeni anrowa onikhaliherya wiimananiha opaceriha soosoma sa Biibiliya?
2 Mpaceriheke Soosoma sa Biibiliya Khula Okathi: Vakhala wira mutthu owo onnooniherya osiveliwa ekeekhai, niireke nyuwo munniimananiha onvekela nummuru nawe ni ephiro ya owannyawe wira mutthikele olavulana mphavelaka opaceriha yoosoma ya Biibiliya? Mukisenrye liini omooniherya mutthu moota siniiriwa aya yoosoma ya Biibiliya mukwaha onipacerya anyu omuxukurya? Mukisenrye silini weererya opaceriha yoosoma ya Biibiliya ni mutthu yoole oninvaha anyu irevista? Mootoko owooniherya eviidiyu eni Xeeni Vanitthuneya Ahu Omusoma Biibiliya? ni Enipakiwa Sai Yoosoma ya Biibiliya? apatthani anyu a omutekoni, oxikola, anamwaattamanani anyu, amusi ni atthu akina anaasuwela anyu? Okathi onilaleerya anyu murumeelaka meesa ari iliivuru wala ikarinyu, niireke munnaaleela ale anihavula iliivuru wira iliivuru iyo sinnirumeeliwa wira osommwe Biibiliya moohiliva?
3. Exeeni enitthuneya wira niixuttihe ekeekhai oratteene?
3 Nikhaliheryo Ninkhuma wa Yehova ni Yesu: Mwaha wa opacerya yooruma awe ya “owixuttiha atthu” ni masu oowi “murowé”, Yesu ooniherya wira hiyo nintthuneya wiilipiherya ni okhalana ankhili okathi onivara ahu muteko owo. Hata vari siiso, owo khonihin’ye mekhihu aahileiherya wira aarowa okhala ni hiyo. (Math. 28:19, 20) Ohiya-vo, Yehova oonivaha munepa awe wootteela, ikaruma ni ooniiniha nikuruta ninnikhaliherya owiixuttiha atthu ekeekhai. (Zak. 4:6b; 2 aKor. 4:7) Hiyo nihaana onvekela Muluku wira onivahe “otthuna n’umaliherya” muteko owo wootepexa otthuneya.—aFil. 2:13.
4. Xeeni vanitthuneya ahu okhalela nthiti owiixuttiha atthu?
4 Olaleerya ihapari sooreera onniniphwanyiha ohakalala wuulupale. Masi, ohakalala wahu onnincerereya vaavo vanimukhaliherya ahu mutthu mpakha wiixutta ekeekhai nto anapacerya ovira ni hiyo “mukhora onikeliha mwekumini”. (Math. 7:14; 1 aTes. 2:19, 20) Etthu ekina yuulupale, enniiriha okhalela nthiti muteko wa owiixuttiha atthu ti ophavela omuhakalaliha Yehova yoowo ohiniphavela wira “mutthu apweteye, nnákhala mmosá. Ontthunexawe wira atthu othene erukunuxe murima”.—2 Ped. 3:9.