Nyuwo Munniweha Itthu Siri Vakwaaduruni va Soohimmwa?

Axitokweene, arummwa oorumeela ni akina arina miritti mmulokoni, okathi wotheene anniweha soohimmwa siri vakwaaduruni va soohimmwa wira asuwele nihiku arina aya mwaha. Masi, atthu otheene mmulokoni anirowa ophwanya soohimmwa sootthuneya vakwaaduruni. Niireke munnisuwela nihiku nanyu na oreeriha Esalau ya Omwene? Wala mutokweene a esirkwitu aahiiso efiliyaali yooruha epaphelo yootthuneya mmulokoni? Niireke moosuwela muru wa mwaha wa atthu otheene wa esumana ela wira mmulattule ole onimusomiha anyu Biibiliya? Wala aakhala marukunuxo apakiwe voohimya sa mithukumano wala egrupu anyu ya muteko woolaleerya? Sinceene sa soohimmwa iya khasinilavuliwa-tho okathi wa mithukumano, ni pooti ohiweryaneya wira axitokweene amuleele khuta namalaleerya myaha iya. Tivonto, nihaana owehaka itthu siri vakwaaduruni va soohimmwa khula okathi. Akhala wira nnoosuwela itthu sinikhumelela, nto itthu sotheene sinoopakiwa mwa “nttittimiho ni wiwanana”.​—1 aKor. 14:40.