Niireke Ohaavo Onisuwela Itthu sa Muhoolo?

Hiyo ninnuupuwela itthu sa muhoolo. Ninniikoha moota okumi ahu onirowa aya okhala vamosa ni ale anaaphenta ahu. Ninnipaka makoho ntoko ala: ‘Kiireke anaaka anookhala elapo yooreera? Elapo ela khenrowa opwetexiwa ni ehasara ya ephattu? Kipake exeeni vano wira ekumi aka ya muhoolo ekhale yooloka?’ Makoho ala anooniherya soophavela sahu. Hiyo ninniphavela olipiheriwa, ororomeleya, otthokiheya, ni okhala saana. Vaakhanle wira mwaamusuwela saana itthu sa muhoolo, mwanwerya tthiri wiitthokiha mmukhalelo wa werutthuni ni mmuupuweloni.

Nto, exeeni enrowa owiiraneelani muhoolo? Niireke ohaavo onisuwela? Asuweli aneehererya ohimya itthu sa muhoolo, annihimya itthu sikina siniiraneya, masi sinceene nnaari. Masi, Muluku onniwerya ohimya saana itthu sinrowa wiiraneya muhoolo. Nuulumo nawe ninhimya so: “Okhuma wopajeryani, miyo kinnilaleya sinrowa wiraneya; okhuma khalai, kinnilaleya sihinatthi okhumelela”. (Yesaya 46:10) Niireke itthu sinihimya awe sinniiraneya tthiri?

SOOLEIHERYA SA MULUKU SINNIIRANEYA TTHIRI

Xeeni varyaaya vootthuneya osuwela wiiraneya wa iprofesia sa khalai sa Muluku? Mwa ntakiheryo, vaakhanle wira moomusuwela meteorologista yoowo khuta nihiku onihimya okathi wookhalela, nyuwo mwaammuroromela. Tthiri, mwanvaha ephoole ele enirowa awe ohimya sa meelo. Moolikanasa, wiixutta moota Muluku aaleiherya awe itthu siiraneyale khalai, onoowiirihani ophavela osuwela itthu sinilaiherya awe sa muhoolo.

OPWETEXIWA WA EPOOMA YUULUPALE:

Mwa ntakiheryo, ohimya wira epooma yuulupale yeeyo yaari yoowerya mwa iseekulu sinci yaarowa opwetexiwa moohipisa, yaarowa okhala etthu yoovila. Masi Muluku omurumeelaka profeta awe, aahihimya wira eyo yaamwiiraneya: opwetexiwa wa oNiinive. (Sofoniya 2:13-15) Exeeni myaha sa mulaponi sinihimya aya? Eseekulu 7 AEC, nuuvira iyaakha 15 vaavo Muluku aahimyale awe, aBabilonia ni aMedia yaahituphela ni opwetexa oNiinive. Muluku aahihimya-tho wira Niinive aarowa “opwetexiwa, ntoko etthu yowuma, ntoko mothakoni”. Niireke masu awo ahiiraneya? Aayo. Nnaamwi epooma eyo ni mittetthe saya saarina ikiloomo sowiiraka 518, anamatuphela ale khiyaahiyale epooma eyo wira ekhaleke memmo ntoko suupuweliwa aya. Masi yaahipwetexa. Niireke ohaavo namatokosa a epoliitika owenrye ohimya itthu iyo ni khiiraneya siiso?

MAKHUVA A ATTHU ANOOPAHIWA:

Ti pani aarowa weererya ohimya itthu saarowa wiiraneya iyaakha 300 muhoolo? Niire so: oohimya nsina na mutthu aarowa opaha makhuva a atthu va altari, ni nsina na epooma ene altari owo aarowa awe okhala? Aakhanle wira yooleiherya eyo yaamwiiraneya, tthiri yammwiiriha ole oleihenrye okhala oovuwa. Profeta a Muluku aahihimya wira: ‘Vatthokoni va Davidi onoyariwa mwana mwamulopwana, onrowa wihaniwa Yosiya. Owo onoopaha makhuva àtthu’ va altari ari epooma ya oBetheli. (1 Mamwene 13:1, 2) Nuuvira iseekulu 3, mwene Yosiya, (tthiri nsina navameekhaaya mBiibiliyani), aahiyariwa mweemusini ya mwene Davidi. Ntoko saahimmwale aya, Yosiya ‘aahikumiha makhuva yaari mmahiye ni opaha valtari’ aari oBetheli. (2 Mamwene 23:14-16) Ti pani aarowa owerya ohimya itthu iyo saana ohikhanle wira onihooleliwa ni ikuru sa Muluku?

OMALA WA OMWENE:

Vaamutikiniha aakhanle wira pinaatamu aamuhimya nsina na mutthu, yoowo aarowa opwetexa omwene muulupale waalamulela olumwenku, ni ohimya saana moota aarowa awe opaka eyo okathi munceene ohinatthi oyariwa. Muluku aahihimya wira mulopwana iihaniwa Kiro taarowa opwetexa omwene owo. Nave Kiro anwoopola aYuda yaari weepotthani ni waakhaliherya oteka empa ya Muluku. Ohiya-vo, Muluku aahihimya wira Kiro aarowa oweleliha maasi a miro, nave mikhora khisaarowa owaliwa; eyo yaamukhweiherya oxintta epooma eyo. (Yesaya 44:27–45:2) Niireke eprofesia ya Muluku yahiiraneya ttthiri? Alipa oolepa sowiiraneya annikupali wira otuphela wa Kiro waahiiraneya tthiri. Anakhotto a Kiro yaahirumeela enamuna ya miruku wira ahapuxe maasi a muro woBabilonia, nto khuwelelihaka. Nave-tho, anakhotto yaahikela mpooma orweela wa mikhora sahaawaliwe. Moottharelana, Kiro aahiwoopola aYuda ni aahaaleela orowa otthikela oteka etemplo oYerusalemu. Eyo khahiyo yaari yoolema ya Kiro maana khaamurumeela Muluku aaYuda. (Ézira 1:1-3) Ti pani ohikhanle Muluku, aarowa owerya ohimya itthu iyo saarowa wiiraneya muhoolo?

Noolavula matakiheryo 3 anooniherya moota Muluku onikhumela awe saana vaavo onihimya awe itthu sa muhoolo. Arumeyi a khalai a Muluku yaanisuwela itthu iyo. Muhooleli a aYuda Yoxuwa aahihimya etthu yoosuwelexiwa ni anamunceene yanwiriyana iiraka: ‘Nyuwo mosuwelexa ni murim’anyu wothene n’ikuru sanyu sothene wira Apwiya Muluku anyu àmaliherya molumo othene yahimyalyaya, yorerihakani. Muhìreliwa sothene: khanivo nulumo nihimalelihiwe, nnákhala nimosa’. (Yoxuwa 23:1, 2, 14) Atthu a nloko na Yoxuwa yaanikupali wira sooleiherya ni iprofesia sa Muluku sahiiraneya tthiri. Masi Muluku onipaka sai eyo? Wookhala ovirikana wuulupale eriyari ya iphiro sa Muluku ni apinaatamu. Ti vootthuneya wira nyuwo musuwele waakhuliwa waya maana Muluku ooleiherya itthu sinrowa orukunuxa okumi anyu.

IPROFESIA SA MULUKU SINNIVIRIKANA NI SA ATTHU

Ikwaha sinceene, sooleiherya sa apinaatamu sinivarihana ni siensia, sootokosa sa itthu sikhumelenle, wala onamminepani. Nuumala apinaatamu ohimya etthu, ikwaha sinci awo anookilaathi paahi ni khiyalipelela wira yoone ele enrowa wiiraneya.​—Miruku 27:1.

Moovirikana ni atthu, Muluku onnisuwela itthu sotheene. Owo onnisuwela mukhalelo ni soophavela sa apinaatamu. Nto vaavo Muluku onithanla awe opaka etthu, onnisuwela saana ele khula mutthu wala nloko enrowa aya opaka. Masi Muluku onniwerya opaka itthu sikina. Owo onoowerya orukunuxa itthu wira ele ehimmye awe yiiraneye. Owo onihimya so: “Molumo ankhuma mwano mwaka khantthikela-tho wa miyo ehivanre muteko aya, . . . ehimalihenrye sarumalyaka”. (Yesaya 55:11) Ikwaha sikina, iprofesia sa Muluku sinninleela ele onrowa awe opaka muhoolo. Tthiri owo oomaleliha iprofesia sinceene saahimyale awe.

OKUMI ANYU WA MUHOOLO

Niireke ohaavo mutthu onihimya itthu sa muhoolo soororomeleya sinihela muhina okumi anyu ni ale munaaphenta anyu? Vaakhanle wira moosuwela wira ennaattamela ehasara ya ephattu, nyuwo mwampaka etthu wira moopowe. Moolikanasa, nyuwo pooti opaka etthu emosaru ni iprofesia sa Biibiliya. Muluku oohimya wira moohipisa itthu sinooturukeya molumwenkuni. (Moone ekaaxa eni: “Itthu Muluku Oleihenrye Awe sa Muhoolo”.) Itthu iyo sinnivirikana ni iye sinihimmwa ni asuweli a olumwenku ola.

Nto nyuwo pooti okupali wira itthu sinrowa wiiraneya ni olumwenku ola soohimmwa khalai. Iprofesia sa Biibiliya sinninsuweliha ele enirowa wiiraneya wanikisa. Muluku onihimya so: “Okhuma wopajeryani, miyo kinnilaleya sinrowa wiraneya; . . . Miyo kohimya wira: ‘Itthu sintthunaka sinokhala: itthu sinkisivela, kinimwira’”. (Yesaya 46:10) Nyuwo ni emusi anyu munoowerya okhalana ekumi ya muhoolo yoohakalaliha. Xontte, mwaakohe Anamoona a Yehova wira musuwele ele Biibiliya onihimya awe sa itthu sinrowa wiireya muhoolo. Anamoona khahiyo akulukhana; khaniiwa moolumo a minepa, hata kharina ikuru sa vameekhaaya wira ahimye itthu sa muhoolo. Awo animusoma Biibiliya yoowo okhanle oowooniheryani itthu sooreera Muluku onirowa awe opaka muhoolo mmureerelo anyu.