Niireke Mwiri Woowiikitthiwa Onniphuwa-tho?

MOOVIRIKANA ni miri sooreera ni suulupale sa oLíbano, mwiri wa olivera onikhala woohasuwasa ni woovya nsuwa, nave khonireera oweha. Masi mwiri wa olivera okhalana owerya wa ovilela ohaawa wa khula enamuna. Sookhala miri sa olivera sinihimmwa wira soophiyeriha iyaakha 1.000. Mitathaari soorakama ni sowaatta sa mwiri wa olivera sinnikhaliherya mwiri owo ophuwa hata wiikitthiwaka. Mitathaari sa mwiri owo sakhalaru sikithi, nto onoowerya ophuwela-tho.

Muhavinre Yobi aanisuwela wira hata okhwaaka, aamutthikela okhala mukumi. (Yob 14:13-15) Owo aahirumeela mwiri, woonasa wene mwiri wa olivera wira wooniherye ororomela wawe wira Muluku ookhalana ikuru sa omuhihimuxa yena. Yobi aahimmye so: “Mwiri wokhalana ororomela, waikittheliwa miritta saya, onophuwa vakina”. Okathi onipacerya aya orupa epula ya eyiita, exa ya mwiri wa olivera enninaanihiwa ni epula eyo, nto khiyapacerya ophuwa mmitathaarini mwaya “iritta sa nanano”.​—Yob 14:7-9.

Ntoko siisaale mulimi oniwehererya awe woona exa ya mwiri wa olivera woowiikitthiwa ephuwelaka, Yehova Muluku onniwehererya okathi onrowa awe waattikiherya ekumi arumeyi awe akhwiiye ni atthu akina. (Math. 22:31, 32; Yoh. 5:28, 29; Mit. 24:15) Tthiri vanrowa okhala voohakalaliha oowaakhelela atthu ale yaakhwiiye okathi onirowa aya otthikela okhala akumi!