MWAHA WA VAKAAPANI | NIIREKE NINNIVIKANIHA OKHALA AKUMI NUUMALA OKHWA?

Exeeni Eniireya Nuumala Mutthu Okhwa?

“Miyo kuupuwela wira wookhwaani aakhala mapuro mararu: wiirimu, omooroni ni opurgatoorio. Masi, kuupuwela wira nkihiyo ooreera murima wira kirowe wiirimu wala ootakhala wira kirowe omooroni. Nkaasuwela ele yaataphulela aya opurgatoorio. Nkitonko woona nuulumo nlo mBiibiliyani; masi ti yeeyo atthu yaahimya aya”.​—Lionel.

“Kiixuttihiwe wira atthu otheene anirowa wiirimu nuumala okhwa, masi miyo nkaakupali. Kuupuwela wira okhwa omala wa itthu sotheene, kiire so, alipa-ookhwa kharina nlipelelo”.​—Fernando.

Niireke mootoko wiikoha so: ‘Exeeni tthiri eniireya wookhwaani? Niireke amusi ahu akhwiiye anoohaaxiwa? Nnimwaaweha-tho? Ninrowa osuwela sai ekeekhai?’ Nrowe niwehe ele Biibiliya oniixuttiha awe. Wanipacerya nithokorerye ele Biibiliya onihimya awe sa okhwa. Moottharelana nnooweha waakhuliwa wa makoho makina.

Tuuvi okhanle mukhalelo wa alipa-ookhwa?

WAAKHULIWA WA MBIIBILIYANI: “Atthu akumi annisuwela wira anrowa okhwa, masi alipa-òkhwa khansuwela-tho etthu. Awo khanwerya olipelela etthu: àliyaliwa pahi. Sothene sinweryanyu wira ni matat’anyu, mwireke vorera n’ikuru sanyu sothene, okhala wira elapo y’alipa-òkhwa khuvo-vo muteko nnákhala osuwela walá otthokelela nnákhala ankhili. Ni ti weiwo ontthunanyu orowa”.a​—Musuweli 9:5, 10.

“Elapo y’alipa-òkhwa”, ti opuro anirowa aya atthu yakhwa, weiwo ahinsuwela aya etthu wala ovara muteko. Mulopwana oowaamini Yobi oonela sai mwaha owo? Nihiku nimosa paahi Yobi aahipweteiwa mihakhu sawe sotheene ni anaawe, ni yaahimurweela makhwatta erutthu awe yotheene. Owo aahinvekela Muluku wira: “Kaphavela wira nyuwo mukivithe mmahiye, [“omoroni” Version Douay católica] mukihiyaka memmo mpakha omala oviruwa wanyu”. (Yobi 1:13-19; 2:7; 14:13) Tthiri, Yobi khahiyo uupuwela mahiye ntoko omooroni wowoopiha, weiwo aarowa awe otepa ohaawa. Masi, uupuwela okhala opuro woophumurya.

Moota mukina woosuwela mukhalelo wa ale akhwiiye, ti osoma soolepa sa Biibiliya sinaaromola atthu 8 yaattikiheriwe okumi. Moone ekaaxa eni: “Matakiheryo 8 a ohihimuxiwa aniromoliwa mBiibiliyani”.

Eriyari ya atthu ala 8, khaavo aalavunle sa ohakalala wala ehukhumu. Vaakhanle wira yaaronwe opuro mukina, niireke awo khiyarowa ohimya sa opuro owo? Niireke eyo khiyaarowa olempwa mBiibiliyani wira atthu otheene esuwele? Biibiliya khonilavula sa mwaha owo. Atthu ale khiyoona yoohimya maana khiyaasuwela etthu, ntoko mutthu onrupa. Tthiri Biibiliya ikwaha sikina onnirumeela nuulumo noowi orupa oromolaka okhwa. Mwa ntakiheryo, mwene Davidi ni mwiixutti Siteefano ‘yaahirupa mookhwaani’.​—Miteko 7:60; 13:36, Tradução do Novo Mundo.

Okhala wira awo ahookhwa, niireke aamala-mala tu? Anoowerya ovenya woorupani iwo?

[Enoota]

[Ekaaxa epaaxina 4]

MATAKIHERYO 8 A OHIHIMUXIWA ANIROMOLIWA MBIIBILIYANIb

Mwaana a naamukhweli: Profeta Eliya aahimuhihimuxa mwaana mwaamulopwana a naamukhweli, oSarepta, epantte onikela epheyo ya wIsarayeli.​—1 Mamwene 17:17-24.

Mwanamwane a muthiyana oXunemi: Eliseyo yoowo aamuranttenle profeta Eliya, aahimuhihimuxa mwanamwane epooma ya oXunemi ni aahaattikiherya anamuyari awe.​—2 Mamwene 4:32-37.

Mulopwana aavithiwe: Murutthu wa mulopwana mmosa waahivithiwa mmahiye mamosaru yaari makhuva a Eliseyo. Vaavo murutthu awe waaphiteeryale aya makhuva a profeta owo, mulopwana ole aaheemela.​—2 Mamwene 13:20, 21.

Mwaana a naamukhweli oNayini: Yesu aahaattikiha atthu oNayini, yaarowa onvitha mmiravo aakhwiiye, nto khumuhihimuxa mmiravo ole.​—Luka 7:11-15.

Mwaana mwaamuthiyana a Jairo: Jairo yoowo aari muulupale a musinagoga, aahimuxonttela Yesu wira amukhaliherye mwanawe mwaamuthiyana yoowo aawereiwa. Yesu aahimuhihimuxa mwaana owo okathi vakhaani nuumala okhwa.​—Luka 8:41, 42, 49-56.

Laazaro, mpatthani awe Yesu: Okathi Yesu aamuhihimunxe awe Laazaro ohoolo wa atthu anceene, iira Laazaro ovirinhe ene mahiku maxexe nuumala okhwa.​—Yohani 11:38-44.

Tabithá: Murummwa Pedru aahimuhihimuxa muthiyana mmosa oophentiwa, yoowo aasuweliwa ni anamunceene mwaha wa oreera wawe murima.​—Miteko 9:36-42.

Eutiko: Mmiravo Eutiko, aahikhwa vaavo aamonre awe vajanelani enupa ya osulu; nto murummwa Paulo aahimuttikiherya okumi.​—Miteko 20:7-12.

[Enoota]