Nipakeke Exeeni Wira Muluku Eemererye Enamuna Nimmukokhorela Ahu?

Yoosoma evinre, nihoona wira Muluku khoneemererya itiini sootheene. Masi hiyo nihaana omukokhorela Mpattuxa ahu mwa enamuna onoona awe okhala yooloka ni enimusivela. Enamuna xeeni ya ‘okokhorela [wala etiini] yooloka’ Muluku oneemererya awe? (Yakobo 1:27, enoota) Nrowe niwehe ele Biibiliya oniixuttiha awe.

1. Okokhorela wahu ohaana ovarihana ni exeeni?

Okokhorela wahu ohaana ovarihana ni Biibiliya. Yesu aahimuleela Muluku wira: “Nuulumo nanyu ti neekeekhai”. (Yohani 17:17) Ohiya otthara ele Nuulumo na Muluku ninhimya aya, itiini sinceene sinitthara soolema ni sowiixuttiha sa apinaatamu. Masi Yehova khonaaphavela atthu ale ‘anikhootta sooruma’ sawe. (Mmusome Marko 7:9.) Ohiya-vo, hiyo ninnihakalaliha murima wa Yehova vaavo nniiwelela ahu ele Biibiliya onihimya awe.

2. Nimukokhoreleke sai Yehova?

Hiyo nihaana omukokhorela Yehova paahi, mwaha woowi owo tori Mpattuxa. (Wiisuupulula 4:11) Eyo enitaphulela wira nihirumeeleke ilatarato, mwaha woowi ophenta wahu ni okokhorela wahu ti wa Yehova paahi.—Mmusome Yesaya 42:8.

Okokhorela wahu ohaana okhala “woowaarya ni onimusivela” Yehova. (aRoma 12:1) Eyo enitaphulela wira nihaana wiiwelela malamulo awe. Mwa ntakiheryo, atthu animphenta Yehova anniiwelela malamulo awe voohimya sa ekasamento. Nave awo khanipaka itthu sootakhala ntoko ompaha soona, olya mirette soohapala ni ohapaliwa.a—Nwehe enoota.

3. Xeeni vari aya vooloka omukokhorela Yehova hoothe ni atthu akina?

Yehova onninivekela wira nihaana orowela mithukumano mwaha woowi onniniphenta ni onnisuwela wira mithukumano sinninikhaliherya ohakalala mahiku otheene. Okathi ninthukumana ahu mmulokoni ninnikhalana eparakha ya onvuwiha wala omukokhorela Yehova. Enamuna emosa yoopaka eyo ori omwiipela Yehova. (Musome Esalimo 104:33.) Nave wiipa onninivaha eparakha ‘yowatthapela Apwiya [Yehova] . . . mmutthukumanono mw’atthu aya’. (Esalimo 111:1, 2) Ohiya-vo, vaavo ninrowela ahu mithukumano ninnaalipiha atthu akina ni hiyo ninnilipihiwa.

MWIIXUTTE ITTHU SIKINA

4. Nihirumeeleke ilatarato wira nimukokhorele Muluku

EVIIDIYU: Niireke Muluku Onneemererya Orumeela Ilatarato Naamukokhorelaka? (3:26)

• Okathi wa khalai arumeyi akina a Muluku yaaheererya omukokhorela arumeelaka ilatarato. Etthu xeeni yaakhumelenle mwaha woopaka eyo?

Atthu akina anihimya wira annirumeela ilatarato wira saakhaliheryeke omwaattamela Muluku. Masi niireke eyo enamuna yooloka ya omwaattamela Muluku? Mmusome Okhuma 20:4-6 ni Esalimo 106:35, 36, nuumala-vo mwaakhule makoho anittharelana:

• Ilatarato xeeni nyuwo munaawehana anyu atthu akina arumeelaka okathi animukokhorela aya Muluku?

• Niireke Yehova onnisiveliwa vaavo atthu anirumeela aya ilatarato wira amukokhorele?

• Nyuwo munoonela sai, niireke ti vooloka orumeela ilatarato wira nimukokhorele Muluku?

5. Omukokhorela Yehova paahi onninikhaliherya otaphuwa sowiixuttiha sowoothiwa

EVIIDIYU: Ekeekhai Yaahimutaphula (5:16)

Esalimo 91:14, nuumala-vo mwaakhule nikoho ninttharelana:

• Ninnooniherya wira ninnimphenta Yehova, vaavo nimmukokhorela ahu yena paahi. Yehova onileihenrye exeeni akhala wira nnoopaka eyo?

6. Hiyo ninnimukokhorela Yehova okathi wa mithukumano Empa ya Omwene

Hiyo ninninvuwiha Yehova ni ninnilipihana mukina ni mukhwaawe vaavo nniipa ahu ni okomentari okathi wa mithukumano. Musome Esalimo 22:23, nuumala-vo mwaakhule makoho anittharelana:

• Niireke onnoosivelani owiriyana ikomentaario okathi wa mithukumano?

• Niireke munniphavela wiilokiherya wira nvahe ekomentaario okathi wa mithukumano?

7. Yehova onnihakalala vaavo nnaaleela ahu atthu akina ele niixuntte ahu

Hiyo pooti waaleela atthu akina itthu Biibiliya oniixuttiha awe mwa inamuna soovirikana. Musome Esalimo 9:1 ni 34:1, nuumala-vo mwaakhule nikoho ninttharelana:

• Nyuwo muhiixutta itthu Biibiliya oniixuttiha awe. Itthu xeeni mwaaphavela anyu waaleela atthu akina?

IPONTO SUULUPALE

Ninnimuhakalaliha Mpattuxa ahu vaavo nimmukokhorela ahu yena paahi, nninvuwiha ahu okathi wa mithukumano ni nnaaleela ahu atthu akina ele niixuntte ahu.

Wuuluula

• Ninrowa wiixutta sai omukokhorela Muluku mwa enamuna onoona awe okhala yooloka?

• Xeeni vanireerela aya omukokhorela Yehova paahi?

• Xeeni vari aya vooloka omukokhorela Muluku vamosa ni atthu aniphavela omusiveliha Muluku?

NWEHE ITTHU SIKINA

Musome etthu yaamwiirinhe muthiyana mmosa ohakalala nuumala ohiya okokhorela ilatarato.

“Kohiya Okokhorela Ilatarato” (Owehaweha, 1 a Julyo, 2011)

Nwehe itthu sinrowa wookhaliheryani ovaha ikomentaario okathi wa mithukumano mmulokoni.

“Munvuwihe Yehova Mmuthukumanoni” (Owehaweha, Janero 2019)

Nwehe moota mithukumano saamukhalihenrye aya mmiravo mmosa hata wanvila orowela mithukumano Empa ya Omwene.

Yehova Onnikikhapelela (3:07)

Atthu anceene anuupuwela wira maKristau ahaana orumeela mwiikimanyo wira amukokhorele Muluku.

“Xeeni Anamoona a Yehova Ahinirumeela Aya Mwiikimanyo Wira Amukokhorele Muluku?” (Mwaha ori va jw.org)