Biibiliya onnooniherya wira okumi wa apinaatamu ti wa ‘okathi vakhani ni ti wosareya ohawa’. (Yobi 14:1) Niireke okumi yoola Muluku aaphavela awe wira nikhalane? Akhala wira khahiyo, etthu xeeni emwiirinhe Muluku waapattuxa apinaatamu? Niireke ele Muluku oniphavela awe enimwiiraneya? Vanimoosivelani osuwela moota Biibiliya onaakhula awe makoho awo.

1. Yehova aaphavela wira nikhalane okumi xeeni?

Yehova oniphavela wira nikhalane okumi wooloka. Okathi aapattunxe awe apinaatamu oopacerya, Adamu ni Eva, owo aahaapweha eparayiisu yooreera valaponi aahiiso exardim ya wEdeni. Nuumala-vo, “Muluku aharèriha, àhimeryaka wira: Mwayareke an’inyu, munjerereyeke: musareyeke mulaponi mothene. Mwettiheke elapo yothene”. (Maphattuwelo 1:28) Tthiri Yehova aaphavela wira yaayareke anamwane, yiiriheke elapo yotheene okhala eparayiisu ni okhapelela inama. Nave Muluku aaphavela wira atthu otheene akhalane okumi wooloka ni akhaleke mahiku otheene.

Ekeekhai wira itthu khasiiraneyale ntoko Muluku aaphavela awe.a (Nwehe enoota.) Masi yoolakela ya Muluku kheturukeyale. (Yesaya 46:10, 11) Nlelo Muluku oniphavela wira apinaatamu oowiiwelela akhalane okumi wooloka ni makhalelo ooloka.—Mmusome Wiisuupulula 21:3, 4.

2. Ninrowa okhalana sai okumi woohakalaliha niinaano-va?

Yehova aapattunxe apinaatamu ni yoophavela ya ‘omusuwela’ ni omukokhorela. (Mmusome Matheyo 5:3-6.) Nave Yehova oniphavela wira nikhalane waataana wooloka ni yena, ‘nitthareke iphiro sawe sothene nimphenteke’ ni ‘nimurumeeleke ni murima ahu wotheene’. (Otumererya 10:12; Esalimo 25:14) Akhala wira nnoopaka eyo, nnoophwanya ohakalala wekeekhai hata nirina ene mixankiho. Tthiri vaavo nimmukokhorela ahu Yehova, ninnoona wira okumi ahu wookhalana yoolakela aya, maana ninnikhala moovarihana ni ele oniphavela awe.

3. Yehova oniphavela wira apinaatamu akhalane okumi wooloka

Nwehe EVIIDIYU, nuumala-vo mwaakhule nikoho.

EVIIDIYU: Xeeni Muluku Opattunxe Awe Elapo?—Eviidiyu yaamukhaani (1:41)

• Etthu xeeni emwiirinhe Muluku opattuxa elapo?

Mmusome Musuweli 3:11, nuumala-vo mwaakhule nikoho ninttharelana:

• Yoolepa ela ewiixuttinheni exeeni voohimya sa Yehova?

4. Ele Yehova oniphavela awe enimwiiraneya

Musome Esalimo 37:11, 29 ni Yesaya 55:11, nuumala-vo mwaakhule nikoho ninttharelana:

• Ninsuwela sai wira ele Yehova oniphavela awe kheturukeyale?

5. Omukokhorela Yehova onniiriha okumi ahu okhalana yoolakela

EVIIDIYU: Koosuwela Yoolakela ya Okumi (5:03)

• Okumi wa Terumi waaturukeyale sai nuumala osuwela yoolakela ya okumi?

Mmusome Musuweli 12:13, nuumala-vo mwaakhule nikoho ninttharelana:

• Yehova oonivaha itthu sinceene, ninrowa wooniherya sai wira ninnimuxukhurela?

IPONTO SUULUPALE

Yehova oniphavela wira nikhalane okumi woohimala ni makhalelo ooloka. Vaavo nimmukokhorela ahu Yehova ni murima wotheene, okumi ahu onnikhalana yoolakela aya.

Wuuluula

• Tiivi yaari yoolakela ya Yehova wa Adamu ni Eva?

• Ninsuwela sai wira ele Yehova oniphavela awe kheturukeyale?

• Okumi anyu onrowa okhalana sai yoolakela aya?

NWEHE ITTHU SIKINA

Nwehe itthu sinooniherya wira exardim ya wEdeni yaahikhala.

“Exardim ya wEdeni, Ekeekhai Wala Etthu Yowoothiwa?” (Owehaweha, 1 a Janero, 2011)

Nwehe itthu sinooniherya wira elapo khenrowa opwetexiwa ni enrowa okhalaka mahiku otheene.

“Niireke Elapo Enoopwetexiwa?” (Mwaha ori va jw.org)

Nwehe itthu sinooniherya wira okumi wookhalana yoolakela aya.

“Tiivi Eri Yoolakela ya Okumi?” (Mwaha ori va jw.org)

John uupuwela wira aahikhalana itthu sotheene mookumini mwawe. Masi nwehe moota oonale awe wira yaahikhala etthu yaamuhaleela.

Vano Okumi Aka Wookhalana Yoolakela (3:55)

2. Atthu xeeni anrowa olamulelaka ni Yesu?

Yesu khonrowa olamulelaka mekhawe. “Atthu a mahimo otheene, ni a mattaava otheene, ni a makhuli otheene ni a maloko otheene . . . anrowa okhala mamwene wira elamuleleke elapo” ni Yesu. (Wiisuupulula 5:9, 10) Atthu akavi anrowa olamulelaka ni Kristu? Okhuma okathi Yesu aarwiiye awe valaponi, imilyau sinceene sa atthu yaahikhala atthareli awe, niire so, makristau. Niireke makristau otheene anrowa olamulelaka ni Yesu? Nnaari. Maana makristau oothanliwa 144.000 paahi, tanrowa wiirimu wira yalamuleleke ni Yesu. (Mmusome Wiisuupulula 14:1-4.) Makristau makina anrowa okhalaka valaponi.—Esalimo 37:29.

Omwene wa Muluku woopacerya olamulela. Moohipisa, Omwene wa Muluku onoopaka marukunuxo manceene valaponi. Yoosoma ela, nnooweha itthu vakhaani sooloka Omwene wa Muluku onrowa awe opaka.

1. Omwene wa Muluku onrowa okumiherya sai murettele ni exariya valaponi?

Yesu, yoowo ori Mwene a Omwene wa Muluku, onimwaapwetexa atthu otheene ootakhala ni ikuvernu sa apinaatamu okathi wa ekhotto ya Armagedoni. (Wiisuupulula 16:14, 16) Okathi Yesu onrowa awe opaka eyo, enimwiiraneya yooleiherya ya mBiibiliyani enihimya wira: “Atakhali anorimela nananoru: nyuwo munimwaphavela, muhaphwanyé”. (Esalimo 37:10) Orumeelaka Omwene wa Muluku, Yesu onooruuha murettele ni exariya elapo yootheene.—Mmusome Yesaya 11:4.

2. Okumi onrowa okhala sai nuumala wiiraneya ele Muluku oniphavela awe valaponi?

Nkahaya muupuwele okhala elapo atthu otheene ari aya a xariya ni ooreera murima, animphenta Yehova ni aniphentana mukina ni mukhwaawe! Eyo ti etthu enrowa wiiraneya okathi Omwene wa Muluku onrowa aya olamulelaka. Maana “Anaxariya animwakhela elapo yohiyeriw’aya: anrowa okhalaka-mo mahiku othene”. (Esalimo 37:29) Okathi owo, khuuvo mutthu onrowa owereiwaka ni otheene ahu ninrowa okhalaka mahiku otheene.

3. Omwene wa Muluku onrowa opaka exeeni nuumala atakhali opwetexiwa?

Nuumala atakhali otheene opwetexiwa, Yesu onrowa olamulelaka iyaakha 1.000. Okathi owo, Yesu ni makristau oothanliwa 144.000, yaawo anrowa olamulelaka ni Yesu, anrowa waakhaliherya atthu otheene valaponi okhala oomalela, niire so, ohikhalana etampi. Nuumala iyaakha iyo 1.000, elapo yotheene enrowa okhala eparayiisu yooreera ni atthu otheene anrowa ohakalalaka, maana animwiiwelelaka malamulo a Yehova. Nto Yesu onoomuttikiherya omwene Tiithi awe, Yehova. Nave okathi owo ‘nnootteelihiwa nsina’ na Yehova moomalela. (Matheyo 6:9, 10) Ohiya-vo, okathi owo vanimooneya oratteene wira Yehova tori namalamulela oolokexa onaakhapelela ale onaalamulela awe. Nuumala-vo, Yehova onompwetexa Satana, minepa sootakhala ni atthu otheene ahinrowa ophavela omwiiwelela. (Wiisuupulula 20:7-10) Omwene wa Muluku onooruuha makhalelo ooloka ni anrowa okhala a mahiku otheene.

MWIIXUTTE ITTHU SIKINA

4. Omwene wa Muluku onoopwetexa ikuvernu sootheene sa apinaatamu

Biibiliya onihimya wira “vathí-va àkhala akina arina owerya, àkhala-tho akina anihawa epuheriwaka n’awo”. (Musuweli 8:9) Orumeelaka Omwene awe, Yehova onoomaliha ohixariya wootheene.

Mmusome Daniyeli 2:44 ni 2 aTesalonika 1:6-8, nuumala-vo mwaakhule makoho anittharelana:

• Yehova ni Yesu anrowa wiiriha exeeni ikuvernu sa apinaatamu ni ale anikhaliherya?

• Muupuwelaka itthu sootheene mwiixuntte anyu voohimya sa Yehova ni Yesu, etthu xeeni enookupalihani wira ophukela waya onrowa okhala wooloka ni wa xariya?

5. Yesu ti Mwene ooloka

Okhala wira Mwene a Omwene wa Muluku, Yesu onoopaka itthu sinceene sooloka wira aakhaliherye atthu anrowa okhalaka valaponi. Nwehe EVIIDIYU enooniherya wira Yesu onniphavela waakhaliherya atthu ni Muluku onvaha Yesu owerya wira opake eyo.

EVIIDIYU: Yesu Aahooniherya Ele Omwene wa Muluku Onrowa Aya Opaka (1:13)

Itthu Yesu aapanke awe okathi aari awe valaponi sooniherya itthu onrowa awe opaka ntoko Mwene a Omwene wa Muluku. Mareeliho xeeni ari elista eri vathi-vo munlipelela anyu oweha yiiraneyaka? Musome soolepa sa mBiibiliyani sinivarihana ni mareeliho awo.

6. Omwene wa Muluku onooruuha itthu soohakalaliha muhoolo

EVIIDIYU: Itthu Soohakalaliha Sinrowa Wiiraneya Muhoolo (4:38)

Musome Esalimo 145:16, nuumala-vo mwaakhule nikoho ninttharelana:

• Munsuwela sai wira Yehova onimwaavaha atthu otheene itthu aniphavela aya?

IPONTO SUULUPALE

Omwene wa Muluku onoopaka itthu sootheene Muluku oniphavela awe, wiiriha elapo yotheene okhala eparayiisu ni anrowa okhalaka atthu ammukokhorela Yehova mahiku otheene.

Wuuluula

• Omwene wa Muluku onrowa otteeliha sai nsina na Yehova?

• Etthu xeeni ennikupaliha wira Omwene wa Muluku onoomaliherya sooleiherya sootheene siri mBiibiliyani?

• Omwene wa Muluku onoopaka itthu sinceene sooloka. Nto etthu xeeni muniphavelaxa anyu oweha yiiraneyaka?

NWEHE ITTHU SIKINA

Nwehe etthu nintaphulela aya nuulumo noowi Armagedoni.

“Ekhotto ya Armagedoni Exeeni?” (Mwaha ori va jw.org)

Nwehe itthu Yesu onrowa awe opaka okathi onrowa awe olamulelaka iyaakha 1.000.

“Exeeni Enrowa Wiiraneya Nihiku na Ophukeliwa?” (Owehaweha, 1 a Setembro, 2012)

Nwehe moota nikhanle ahu oowuupuwela niri ene mparayiisu ni atthu akina.

Muupuweleke Muri Ene Mparayiisu (1:50)

Nwehe moota napoliitika aaphwannye awe waakhuliwa wa makoho awe mwaha oni: “Makoho Aka Yaanikixankiha”.

“Biibiliya Onnirukunuxa Mirima sa Atthu” (Owehaweha, 1 a Janero, 2012)