Moota Woohakalala Hata Mutthu Uuluvanle Ene
EXEENI munuupuwela anyu vaavo munoona anyu wira munnuuluvala? Anamunceene annixanka ni woova. Eyo enniiraneya mwaha woowi wuuluvala onnilikanyihiwa ni itthu soohiloka ntoko ohoona saana, otteettheya wa erutthu, waakuva oliyala, ni iretta sihinivoniwa.
Masi, atthu annivirikana mmwaha ola. Akina annikhalana okumi wooloka wa werutthuni ni mmuupuweloni okathi anuuluvala aya. Orowa vahoolo wa medicina onnaakhaliherya akina owehaweha iretta sihinivoniwa. Nto eyo enniiriha wira ilapo sikina atthu anceene ekhaleke iyaakha sinceene ni okumi wooloka.
Masi vaavo onaaphwanya aya muxankiho wa wuuluvala, anamunceene anniphavela wuuluvala moohakalala. Eyo eniweryaneya sai? Eyo enlipa ni moonelo ahu, makhalelo ahu, ni owerya wahu olimalela makhalelo awo masya a ekumi. Nrowe noone malakiheryo makina a Biibiliya oovareleya muteko akhanle oonikhaliherya.
MWIIYEVIHEKE: “Vari wiyeviha, ankhili ari vavo”. (Miruku 11:2) Mmwaha ola, atthu “ankhili” anihimmwa atthu oowuuluvala yaawo anisuwela wira khanwerya opaka itthu sotheene maana ahuuluvala. Charles, orina iyaakha 93 oBrasil, onihimya so: “Ole onikhala iyaakha sinceene, onimuuluvala. Khivaniweryaneya otthikeliha ottuli okathi”.
Masi, wiiyeviha khontaphulela okhalana muupuwelo woohiloka woowi: “Miyo kihuuluvala-tu, nkirina-tho efaita”. Muupuwelo owo pooti omwiiriha mutthu ohihakalala. Miriku 24:10 onihimya so: “Mojeyá movelavelani, ikuru sanyu ti sivukunwe”. Ohiya vo, mutthu oowiiyeviha onnooniherya miruku ni onnimananiha opaka eniwerya awe.
Corrado, orina iyaakha 77 wItalia, onihimya so: “Vaavo munuuluvala anyu, muhaana opaka itthu vakhaani-vakhaani”. Moohaaniherya vannitthuneya opaka marukunuxo vaavo mutthu onuuluvala awe. Corrado ni mwaarawe ahiixutta othuma itthu sa vatthokoni ni ephoole, ni opaka eprograma enaakhaliherya ohikhala ookhulumuwa wanikisa wa nihiku. Mariana orina iyaakha 81 oBrasil onnipaka itthu sinimukhaliherya oriki: “Kihiixutta wiivaha okathi woomumula vaavo kinivara aka muteko. Kinnikilaathi wala orupaathi wira kisome etthu wala owiriyana muusika. Kihiixutta weemya wira nkinwerya opaka itthu sotheene”.
MUKHALANEKE MOONELO WOOLOKA: “Athiyana ewareke ikuwo sinaphwanela, yireriheke vohùliha muru”. (1 Timótheyo 2:9) Masu oowi ‘ikuwo sophwanela’ antaphulela ikuwo sooreerela. Barbara orina iyaakha 74 oCanada, oni: “Kinnimananiha okhala ooratta, ni oowiitthokiha. Nkimphavela owara moohikhalela, ntoko akina sinuupuwela aya wira: ‘Aah kihuuluvala, khuuvo onrowa okiweha!’” Fern orina iyaakha 91 oBrasil onihimya so: “Kinnithuma ikuwo isya seiyo sinikitteeliha murima”. Ankhi alopwana oowuuluvala? Antônio orina iyaakha 73 oBrasil onihimya so: “Kinniimananiha ophwaneliwa, owara ikuwo sooloka ni sookatthiwa”. Voohimya sa wiirattela, owo oni: “Kinnirapa ni omettha ereru aka khula nihiku”.
Masi-tho ti vootthuneya osyaka wiithokorerya mootepana ni ohikhala a miruku. Bok-im orina iyaakha 69 oCoreia, ookhalana moonelo wooloka voohimya sa mawarelo. Owo onihimya so: “Kinoona wira khahiyo vookhalela owara ikuwo sikina seiye kaawara aka kiri ene mmiravo”.
MUUPUWELEKE ITTHU SOOLOKA: “Mw’ale aripiwe murima mahiku othene t’òtakhala: òtteliwa murima onnipuha vohimala”. (Miruku 15:15) Nto vaavo munuuluvala anyu pooti okhalana miyuupuwelo sooriipiha murima vaavo munuupuwela anyu omiravo anyu, okathi mwaapaka anyu itthu sinceene mwaaphavela anyu. Masi, mwiimananiheke oxintta miyuupuwelo iyo soohikhalela. Othipelela wuupuwelela okumi anyu wa khalai pooti owiirihani okhumuwa ni ohiwerya opaka ele muniphavela anyu. Joseph orina iyaakha 79 oCanada, onihimya so: “Kinnisiveliwa itthu siniwerya aka opaka, nave nkinthanana mwaha wa iye sihiniwerya aka”.
Nave-tho, osoma ni wiixutta etthu pooti owiirihani okhala saana ni ohula muupuwelo anyu. Nto vaaweryaneyaka, mwaavyeke okathi wa osoma ni wiixutta itthu sa niinano. Ernesto orina iyaakha 74 oFilipinas, onnaavya mbiibiliotekani iliivuru sinimusivela. Owo onihimya so: “Opaka eyo onlikana ni weetta mukwaha ni orowa mapuro otheene kiniphavela aka”. Lennart yoowo orina iyaakha 75 oSuécia onniimananiha wiixutta nttaava na elapo ekina.
NVAHEKE: “Mwavaheke akhw’inyu: siso [‘atthu anrowa woovahani’, NM]”. (Luka 6:38) Muviriheke okathi muryeene ni atthu akina ni murumeeleke hoothe itthu sanyu. Eyo enoowiirihani ohakalala vanceene. Hosa orina iyaakha 85 oBrasil, onniimananiha waakhaliherya akina nnaamwi orina ene mixankiho sa werutthuni. Owo onihimya so: “Kinnaaligarela apatthani aniwereiwa wala ariipiwe murima ni kinnaalepela ipaphelo. Ikwaha sikina kinnaavaha itthu saamukhaani. Okisivela owaapeela wala waavaha etthu ale aniwereiwa”.
Ovaha onnimwiiriha mutthu ovahiwa. Jan, orina iyaakha 66 oSuécia, onihimya so: “Vaavo munaaphenta anyu akina, awo annoophentani-tho. Tthiri mutthu oovaha onnikhala oopatthaneya, ni atthu akina anniphwanya ohakalala”.
MPATTHANEYEKE: “Mutthu onìsupuwelela pahi, onnìkhalela mmansawe: mwatthuna onvaha miruku, onnoviruwelani”. (Miruku 18:1) Ekeekhai wira ikwaha sikina muhaana okhala mekhinyu, masi muhaana osyaka wiivalaanya. Innocent orina iyaakha 72 oNigéria, yoowo oomusivela ovaanela ni atthu akina oni: “Okisivela wataana ni atthu a miyunnuwelo soovirikana”. Börje orina iyaakha 85 oSuécia onihimya so: “Kinniimananiha okhala ni amiravo. Ikuru saya sinnikivara murima, kinakhala ntoko mmiravo”. Ikwaha sikina mwaalattuleke apatthani anyu. Han-sik orina iyaakha 72 oCoreia oni: “Miyo ni mwaaraka onisivela waalattula apatthani a iyaakha soovirikana oowuuluvala ni anamwane wira nilye hoothe”.
Atthu oopatthaneya annivaanela ni annileelana ele anuupuwela aya. Masi okhala wira ovaanela onihela muhina atthu anli wala ovikana-vo, nto mwiimananiheke okhala mpatthani ooloka. Mwaacaleke atthu akina. Helena orina iyaakha 71, oMoçambique oni: “Miyo ka mutthu oopatthaneya ni kinnaathokorerya akina mwa nttittimiho. Kinniwiriyana ele anihimya aya wira kisuwele ele anuupuwela aya ni ele aniphavela aya”. José orina iyaakha 73 oBrasil, onihimya so: “Atthu waasivela okhala ni ale anaawiriyana, kiire so, atthu yaale anooniherya othunku ni waacalela akina, ottottopela okathi wooreerela ni ohakalala”.
Vaavo munivaanela anyu “molumo anyu ekhaleke òrera ni owèleliwa ni makha”. (aKolosi 4:6) Mwaathokoreryeke akina ni waalipiha.
MUXUKHURELEKE: “Mukhale atthu òxukhuru”. (aKolosi 3:15) Vaavo munikhaliheriwa anyu, muxukhureleke ni ocalela. Mooniheryeke oxukhuru orweela wa wataana ni akina. Marie-Paule, orina iyaakha 74 oCanada onihimya so: “Miyo ni iyaka nithamme niinano enupa yuulupale naakhala ahu nnarowa enupa yaamukhaani. Apatthani ahu anceene yaahinikhaliherya. Nahaaxukhurela vanceene, nto naahimulepela khula mmosa epaphelo nimuxukhurelaka, nuumala-vo nahaalattula akina orwa owannyihu wira nilye hoothe”. Jae-won orina iyaakha 76, oCoreia onnixukhurela vaavo onikuxiwa awe aarowaka Empa ya Omwene. Owo oni: “Nkinliyala waakhaliherya atthu awo ni kinnaavaha musurukhu wira emuthume gasolina. Ikwaha sikina Kinnaalepela ipaphelo wira kaaxukhurele”.
Mwa sotheene, muxukhurele mwaha wa ekumi murina anyu. Mwene Salomoni aalempe so: “Halali mwalapwa mukumi ovikana kharamu òkhwa”. (Musuweli 9:4) Tthiri nakhalana moonelo wooloka ni wuupuwela makhalelo ahu, nnoowerya wuuluvala moohakalala.