YOOSOMA 55

Mukhaliheryeke Muloko Anyu

Edição Impressa

Olumwenku wootheene, atthu imilyau sinceene, annimukokhorela Yehova miloko sinceene sa Anamoona a Yehova. Atthu awo annivaha efaita yinceene itthu aniixuttihiwa aya ni anniphavela okhaliherya muloko aya. Niireke nyuwo munoonela siiso muloko anyu?

1. Munrowa orumeela sai okathi ni ikuru sanyu wira mukhaliherye muloko anyu?

Otheene ahu nnoowerya okhaliherya mmulokoni. Mwa ntakiheryo, niireke nyuwo pooti omukuxa munna aahiiso murokora oowuuluvala wala mutthu mukina onireerela okhaliheriwa wira orowele mithukumano? Woonasa wene, nyuwo pooti okhaliherya mwa inamuna sinceene ntoko othuma mireerelo saya aahiiso orattela empa aya. (Mmusome Yakobo 1:27.) Nave hiyo pooti wiivahererya wira nirattele ni olokiherya Empa ya Omwene. Khuuvo mutthu onikhanyereriwa opaka itthu iyo. Masi omphenta wahu Muluku ni anna ni arokora onniniiriha wiivahererya ‘votthuna vahu’.—Esalimo 110:3.

Ale apatisiwe akhala Anamoona a Yehova, annikhaliherya muloko mwa inamuna soovirikana. Nto anna pooti wiimananiha wira aphwanelele okhala arumeyi ookhaliherya aahiiso axitokweene. Nave anna ni arokora pooti okhaliherya muteko woolaleerya akhalaka mapioneero. Anamoona a Yehova akina anniwerya okhaliherya otekiwa ipa ninrumeela ahu wira nimukokhorele Yehova. Masi akina anniwerya othaamela mittetthe soothowa anamalaleerya, wira akhaliheryeke miloko sa mittetthe iyo.

2. Ninrowa orumeela sai musurukhu ahu ni mireerelo sahu sikina wira nikhaliherye muloko?

Nnoowerya onvuwiha Yehova ‘ninvahaka sorera sahu’. (Miruku 3:9) Tthiri eparakha yuulupale ovaha musurukhu ahu wira nikhaliherye muloko ni muteko woolaleerya onivariwa olumwenku wootheene. (Mmusome 2 aKorinto 9:7.) Musurukhu ninvaha ahu onnirumeeliwa wira akhaliheriwe anna ni arokora aphwanyiwe ihasara sa ephattu. Khula esumana aahiiso khula mweeri, anna ni arokora anceene annisuka musurukhu aya wira avahe mmulokoni. (Mmusome 1 aKorinto 16:2.) Hiyo nnoowerya opaka eyo nivahaka musurukhu ahu ikaaxa siri Empa ya Omwene aahiiso esaiti donate.jw.org. Enamuna ninrumeela ahu musurukhu ahu ni mireerelo sahu ninnooniherya wira ninnimphenta Yehova ni itthu nrina ahu.

MWIIXUTTE ITTHU SIKINA

Nwehe inamuna mukhanle anyu ookhaliherya muloko anyu.

3. Mukhaliheryeke muloko nvahaka musurukhu anyu

Yehova onnaaphenta vanceene ale anivaha ni murima wootheene. Mwa ntakiheryo, Yesu aahimuttottopela muthiyana naamukhweli aavanhe musurukhu awe. Mmusome Luka 21:1-4, nuumala-vo mwaakhule makoho anittharelana:

Niireke nihaana ovaha musurukhu munceene wira nimuhakalaliheke Yehova?
Yehova ni Yesu anoonela sai musurukhu ninvaha ahu ni murima wootheene?

Wira nwehe moota musurukhu ninvaha ahu onirumeeliwa awe, nwehe EVIIDIYU. Nuumala-vo mwaakhule nikoho.

EVIIDIYU: ‘Omureerela Murima Yehova’ (4:47)

Musurukhu ninvaha ahu onirumeeliwa sai wira sikhaliheriwe miloko sa olumwenku wootheene?

Murokora oowuuluvala ovahaka musurukhu awe mukaaxani ya Empa ya Omwene.

4. Niivahereryeke wira nikhaliherye

Arumeyi a khalai a Yehova, waanaasivela vanceene olokiherya mapuro yaamukokhorela aya Yehova. Nto wira apake eyo, khahiyo paahi waatthuneya musurukhu. Mmusome 2 Wahala 34:9-11, nuumala-vo mwaakhule nikoho ninttharelana:

Aisarayeli yaakhaliherya sai okhapelela etemplo?

Wira nwehe moota Anamoona anitthara aya ntakiheryo na aisarayeli, nwehe EVIIDIYU. Nuumala-vo mwaakhule makoho.

EVIIDIYU: Nikhapeleleke Mapuro Ahu a Okokhorela (3:31)

Itthu sinooniherya eviidiyu, ‘Okhapelela Opuro Nimmukokhorela Ahu Muluku’. Alopwana, athiyana, ni anamwane arattelaka Empa ya Omwene.

Xeeni vari aya vooloka okathi wootheene orattela ni olokiherya Empa ya Omwene?
Nyuwo munrowa okhaliherya sai?

Ekrupu ya Anamoona oowiivahererya akhaliheryaka oteka Empa ya Omwene.

5. Anna ahaana wiimananiha wira akhalane iparakha mmulokoni

Biibiliya onnaatumererya alopwana makristau wiimananiha wira akhaliheryeke muloko. Wira nwehe ntakiheryo nimosa, nwehe EVIIDIYU. Nuumala-vo mwaakhule nikoho.

EVIIDIYU: Anna—Anivara Muteko wa Yehova (5:19)

Eviidiyu niwenhe ahu, Ryan aapanke exeeni wira okhaliherye muloko?

Biibiliya onnilavula mikhalelo anna anireerela aya okhalana wira aphwanelele okhala arumeyi ookhaliherya ni axitokweene. Mmusome 1 Timootheyo 3:1-13, nuumala-vo mwaakhule makoho anittharelana:

Mikhalelo xeeni anna anireerela aya okhalana wira aphwanelele okhala arumeyi ookhaliherya ni axitokweene?
Mikhalelo xeeni atthu a etthoko aya anireerela aya okhalana?—Nwehe eversiikulu 4 ni 11.
Okathi anna aniimananiha aya okhalana mikhalelo iya atthu otheene a mmulokoni anittottela sai mureerelo?

Munna mmiravo oxovaka ekhatera ya maroota ya munna oowuuluvala okathi anilaleerya aya empa ni emapa.

ATTHU AKINA POOTI WOOKOHANI WIRA: “Musurukhu Anamoona a Yehova anirumeela aya wira avare miteko saya aniphwanya woowi?”

Mwaarowa waakhula sai?

IPONTO SUULUPALE

Yehova onnivaha efaita yinceene vaavo ninrumeela ahu okathi, ikuru sahu, musurukhu ni mireerelo sahu sikina wira nikhaliherye muloko.

Wuuluula

Ninrowa orumeela sai okathi ni ikuru sahu wira nikhaliherye muloko ahu?
Ninrowa orumeela sai musurukhu ni mireerelo sahu wira nikhaliherye muloko?
Nto nyuwo mwaaphavela okhaliherya sai muloko anyu?

Yoosoma ela kimalinhe nihiku:

Yoolakela aka

Okhaliherya orattela ni olokiherya Empa ya Omwene muloko aka.

Ekina:

Soolukama sanyu sikina

NWEHE ITTHU SIKINA

Nwehe nthowa naya Muluku ohinnikhanyererya awe onvaha tiisimu.

“Biibiliya Onihimya Exeeni sa Tiisimu?” (Mwaha ori va jw.org)

Nwehe ele enitaphulela aya wiimananiha wira nikhalane iparakha mmulokoni.

“Niireke Nyuwo Munniphavela Okhalana ‘Miritti Mmulokoni’?” (Owehaweha, 15 a Setembro, 2014)

Nwehe moota Anamoona a Yehova aniimananiha aya oroiha iliivuru mapuro oorakamela.

Okaiwa Iliivuru Sinimutthokiherya Biibiliya oCongo (4:25)

Moota ninrumeela ahu musurukhu ninvaha ahu woovirikana vanceene ni itiini sikina.

“Musurukhu Onirumeeliwa Wira Sivariwe Miteko sa Anamoona Onikhuma Woowi?” (Mwaha ori va jw.org)