Musuweleke Muteko Muluku Onvanhe Awe Kristu

“WOPAJERYANI, Muluku opattunxe erimu n’ilapo ya vathí” ni aahoona wira “sothene sari sorera sana”. (Maph. 1:1, 31) Yehova ohaapattuxa apinaatamu ni nlipelelo nooloka na muhoolo. Masi, okhala wira khiiweleliwe ojardim wa wEdeni, eyo yaahihonona ohakalala wekeekhai wa apinaatamu. Masi yoolakela ya Yehova wa apinaatamu ni elapo kheturukeyale. Nto Muluku ooleiherya wira onrowa owoopola anamwane oowiiwelela a Adamu. Nave okokhorela wekeekhai waamuttikiheriwa ni onrowa waapwetexa atakhali ni miteko saya sootakhala. (Maph. 3:15) Okathi owo itthu sotheene sinootthikela okhala “sorera sana”. Yehova aarowa opaka eyo omurumeelaka Mwanawe mmoseene, Yesu Kristu. (1 Yoh. 3:8) Nto ti vooloka osuwela muteko Muluku onvanhe awe Kristu.—Mit. 4:12; aFil. 2:9, 11.

MUTEKO XEENI KRISTU OVAHIWE AWE?

² Vaavo nnuupuwelela ahu muteko Muluku onvanhe awe Kristu, ninnoona wira muteko owo wookhalana mipantta sinceene. Yesu, Moopoli a apinaatamu, Mukhulupale Aanamukuttho, Muhooleli a muloko wa Ekristau ni mpakha-va onirumeela ntoko Mwene a Omwene wa Muluku. Wuupuwelela itthu iyo, onimuncererya oxukhurela wahu enamuna Muluku onitthokiha awe itthu ni onimuncererya omphenta wahu Kristu Yesu. Biibiliya onnihimya miteko iyo soovirikana Kristu ovahiwe awe ni Muluku.

³ Okathi wa muteko woolaleerya wa Kristu valaponi, vaahooneya wira omurumeelaka Kristu, Muluku onootthikela waataana ni apinaatamu oowiiwelela. (Yoh. 14:6) Owo Moopoli aapinaatamu, maana Yesu oovaha okumi awe wira owoopole atthu anceene. (Math. 20:28) Eyo enooniherya wira khahiyo paahi Yesu onivanhe ntakiheryo nooloka na omuhakalaliha Muluku. Masi owo tonirumeeliwa wira yiiraneye yoolakela ya Yehova wa apinaatamu. Nave tonnikhaliherya otthikela weemereriwa ni Muluku. (Mit. 5:31; 2 aKor. 5:18, 19) Okhwa wa Yesu ni ohihimuxiwa wawe onnaakhaliherya apinaatamu oowiiwelela waakhela mareeliho anrowa okumiheriwa ni Omwene wa Muluku.

⁴ Okhala wira Yesu Mukhulupale a Anamukuttho, onnisuwela sootteettheya sahu ni oovaha mukuttho wira sileveleliwe itampi sa atthareli awe valaponi. Murummwa Paulo aatthokihenrye so: “Vekekhai, khanikhalanne namukuttho mulupale ohinwerya ohawa ni hiyo mwaha w’olosowa wahu: tthiri Kristu ahehereriwa ntoko hiyo mwa sothene, nto khatthenke”. Moottharelana, Paulo aahitumererya wira nihaana omwaamini Yesu Kristu wira nitthikele waataana ni Muluku. Owo aahimmye so: “Vano, nimwattameleke Muluku n’uroromela, okhala wira owo ti mwanene eparakha. Siso nnomoreliwa ikharari, nnophwanya eparakha ennikhaliherya okathi wophwanelela”.—aHéb. 4:14-16; 1 Yoh. 2:2.

⁵ Yesu tori Muhooleli a Muloko wa eKristau. Ntoko atthareli a Kristu a eseekulu yoopacerya yahaarina aya muhooleli pinaatamu, olelo-va hiyo nave khanrina muhooleli pinaatamu. Yesu onninivaha malakiheryo orumeelaka munepa wowaarya wa Muluku ni aarumeelaka amakampusi oophwanelela, yaawo arina muritti ohoolo wa Muluku ni wa Kristu wa okhapelela ipwittipwitthi sa Muluku avahereriwe aya. (aHéb. 13:17; 1 Ped. 5:2, 3) Omuhimyaka Yesu, Yehova aahimmye so: “Miyo komukhaliha mwanene eriyari y’amalapo: komukhaliha mukhulupale ni mwené a ilapo”. (Yes. 55:4) Yesu aahooniherya wira eprofesia ela yaahiiraneya vaavo aalenle awe atthareli awe wira: “Hatá mukhotteke wireliwa muholeli, okhala wira Muholeli anyu mmosá pahi: ti Kristu”.—Math. 23:10.

⁶ Okhala wira ookhalana moonelo wooloka ni oniphavela onikhaliherya, Yesu onninlattula oriki: “Nyuwo othene mukhulumunwe, mulemeliwene muritti mulupale, mukirwele miyo: komumuliheni. Mwireye muritti aka: mukihiye kolakeni, mana miyo ka mutthu òmàla ni òwiyeviha. Mwirá siso, munophwanya murettele murohoni mwanyu. Tthirí, muritti onoreyakani ti woveya: olemela onotexihakani ti wokhweya”. (Math. 11:28-30) Yesu Kristu onnihoolela muloko wa eKristau mooreerela murima ni mwa enamuna ennihakalaliha vanceene, nto eyo ennooniherya wira Yesu Kristu “makampusi òrera murima”, maana onnimutakiha Tiithi awe a wiirimu, Yehova Muluku.—Yoh. 10:11; Yes. 40:11.

⁷ Ewarakha yoopacerya aalepenle awe aKorinto, murummwa Paulo aahihimya muteko mukina wa Yesu Kristu, oriki: “Vekekhai Kristu ohana okhala mwené, mpakha Muluku wapweha awanani othene vathí va inawu sawe. Nave itthu sothene samwìwelelakaru Kristu, vano Kristu yowo, Mwana a Muluku, onomurumela Tithi awe, onvaherenrye sothene. Siso Muluku onomaliherya oruma sothene”. (1 aKor. 15:25, 28) Ohinatthi orwa valaponi, Yesu aavara vamosa ni Muluku ni topacenrye opattuxiwa ni Muluku. (Mir. 8:22-31) Okathi Muluku aamurumme awe orwa valaponi, okathi wotheene Yesu aanipaka otthuna wa Muluku. Owo aahivilela mixankiho sinceene. Nave aahiroromeleya wa Tiithi awe mpakha wiiviwa. (Yoh. 4:34; 15:10) Okhala wira Yesu aahiroromeleya mpakha wiiviwa, Muluku aahimuhihimuxa Mwanawe wira akhaleke wiirimu ni onvaha eparakha ya okhala Mwene a Omwene wa wiirimu. (Mit. 2:32-36) Okhala wira Mwene, Kristu oovahiwa ni Muluku muritti woohoolela malaikha manceene wiirimu, opwetexa ikuvernu sotheene sa apinaatamu ni omaliha otakhala wotheene valaponi. (Mir. 2:21, 22; 2 aTes. 1:6-9; Wis. 19:11-21; 20:1-3) Okathi owo, Omwene wa wiirimu paahi, yoowo onilamuleliwa ni Kristu tonrowa olamulelaka olumwenku wotheene.—Wis. 11:15.

ONITAPHULELA EXEENI OSUWELA MUTEKO WA YESU?

⁸ Yesu Kristu, ntakiheryo nahu noomalela. Owo oovahiwa muritti woonikhapelela. Nto, wira nittottele mureerelo enamuna yooloka ni yoophenta onnikhapelela awe, nihaana wiiwelela malamulo a Yehova ni weetta vamosa ni mutthenkeso awe.

⁹ Atthareli a eseekulu yoopacerya a Yesu, yaanisuwela oratteene muteko Kristu ovahiwe awe ni Muluku. Awo yaahooniherya eyo avaraka moowiirana ahooleliwaka ni Kristu ni yiiwelelaka malakiheryo yaavahiwa aya ni munepa wowaarya wa Muluku. (Mit. 15:12-21) Murummwa Paulo aahihimya wiiraana nrina ahu mmulokoni, vaavo aalempe awe wira: “Ohiya vo, nettelaka ekekhai n’uphenta, nnimunnuwa wa inamuna sothene, mpakha olikana ni Kristu, ori murú [wala muhooleli]. Mwaha wa Kristu, itthu sothene s’erutthu sikhomanyiwe ni silutteliwe orattene, sinthukumanyiwa n’itthu sothene sinrumela. Siso, khul’etthu y’erutthu yavaraka miteko saya orattene, erutthu yothene enninnuwa mpakha ophiyerya omalela waya mophentani”.—aÉf. 4:15, 16.

¹⁰ Ntoko siisaale erutthu erina aya mipantta sinceene masi sivaraka vamosa, muloko wotheene, niire so, maKristau oothanliwa ni ipwittipwitthi sikina, sookhalana mipantta soovirikana. Vaavo khula mutthu mmulokoni onivara awe moowiirana ni atthu akina ottharaka malakiheryo a Kristu, eyo ennikhaliherya wunnuwa ni onnikhala ophentana weiwo “ommaleliha orera murima”.—Yoh. 10:16; aKol. 3:14; 1 aKor. 12:14-26.

¹¹ Itthu siniiraneya olumwenku wotheene, sinnimaliherya iprofesia sa mBiibiliyani seiyo sinooniherya wira Yesu Kristu ookhalihiwa Mwene mwaakha wa 1914. Nto eyo enooniherya wira Yesu onnilamulela eriyari ya awanani awe. (Esal. 2:1-12; 110:1, 2) Eyo eniwooniherya exeeni ale anikhala valaponi olelo-va? Enooniherya wira, moohipisa Yesu onrowa okhala Mwene a mamwene, Pwiya a mapwiya othene vaavo onrowa awe waapwetexa awanani awe otheene. (Wis. 11:15; 12:10; 19:16) Nto okathi owo, yooleiherya Yehova aapanke awe ojardim wa wEdeni vaavo aahiiweleliwe awe enimwiiraneya wira aaphwanyihe mireerelo ale ari moono woolopwana wa Kristu ni anipaka otthuna wawe. (Math. 25:34) Ninnihakalala vanceene mwaha woowi ninnisuwela muteko Muluku onvanhe awe Kristu! Nto mahiku ala ookiserya, nihihiye wiiraana vaavo ninlaleerya ahu olumwenku wotheene nihooleliwaka ni Kristu.