“Muhivelavelé! Miyo ki Muluku Anyu”

1-2. (a) Moolumo ari Yesaya 41:10, yaamukhalihenrye sai murokora Yoshiko? (b) Tani-tho anttottela mureerelo moolumo ari Yesaya 41:10?

MUROKORA oororomeleya iihaniwa Yoshiko, aahileeliwa itthu sooriipiha murima. Meedika awe, aahimuleela wira aarowa okhala mukumi myeeri vakhaani paahi. Nto oonenle sai? Yoshiko aahuupuwela yoolepa ya Yesaya 41:10. (Mmusome.) Moomaaleleya, aahimuleela meedika awe wira khoova etthu, mwaha woowi Yehova aaninvarela ntata.b Moolumo oolipiha aniphwanyaneya eveersu ela, yaahimulipiha murokora ole omuroromela Yehova moomalela. Eveersu eyo, pooti onikhaliherya omaaleleya okathi ninkumana ahu mixankiho suulupale. Wira nisuwele moota woopaka eyo, nrowe nthokorerye etthu yaamwiirinhe Muluku omuleela Yesaya olepa masu awo.

² Wanipacerya, Yehova aahimuleela Yesaya waalepela aYuda moolumo ala oolipiha, maana muhoolo mwaya yaamuroihiwa weepotthani oBabilonia. Masi, Yehova aahiiriha olempwa moolumo ala wira aakhaliherye ohiya paahi aYuda ale, masi-tho hiyo olelo-va. (Yes. 40:8; aRom. 15:4) Okhala wira ninkhala “mahiku òxanka” ni oovila okhala, masu aniphwanyaneya eliivuru ya Yesaya anninlipiha vanceene.—2 Tim. 3:1.

3. (a) Sooleiherya xeeni tthaaru siniphwanyaneya Yesaya 41:10? (b) Xeeni nintthuneya ahu osuwela sooleiherya iyo?

³ Mwaha ola, ninrowa othokorerya sooleiherya tthaaru sa Yehova sinnikhaliherya olipiha waamini wahu, seiyo siri Yesaya 41:10: (1) Yehova onookhala ni hiyo, (2) Owo Muluku ahu ni (3) owo onoonikhaliherya. Ninnitthuneya osuwela sooleiheryac iyo, mwaha woowi, othene ahu sinniniphwanya mixankiho ntoko sa Yoshiko. Nave sinninikhumelela mixankiho mwaha woowi ninkhala olumwenku ola wootakhala. Anna akina annivilela olupatthiwa ni makhulupale a guvernu. Vano, nrowe nthokorerye khula yooleiherya Yehova onivanhe awe.

“MIYO KIRI NI NYUWO”

4. (a) Yooleiherya xeeni yoopacerya ninrowa ahu othokorerya? (Nwehe enoota.) (b) Mwa inamuna xeeni Yehova onooniherya awe oniphenta? (c) Munoonela sai moolumo awo oolipiha a Muluku?

⁴ Etthu yoopacerya Yehova oleihenrye awe tiila: “Muhové! Miyo kiri ni nyuwo”.d Yehova onnooniherya wira ori ni hiyo onikhaliheryaka ni onikhapelela moophenta. Nkahaya moone moota onooniherya awe oniphenta wawe vaavo aahimmye awe wira: “Nyuwo munniphwanelela vamaithoni vaka: miyo kinnolemelihani vanjene, kinnophentani vorera”. (Yes. 43:4) Khiivo etthu molumwenkuni ekhanle oomwiiriha Yehova ohiya waaphenta ale animurumeela. Tthiri, ororomeleya wawe ti woolipa ntoko mwala. (Yes. 54:10) Nto ophenta ni ororomeleya wawe onninlipiha murima. Olelo-va, Yehova onninikhapelela ntoko aamukhapelenle awe mpatthani awe iihaniwa Abrahamu. Yehova aahimuleela wira: “Nyuwo Abrahamu, muhové! Miyo kinimokhapelelani”.—Maph. 15:1.

5-6. (a) Ninsuwela sai wira Yehova onniphavela onikhaliherya okathi wa mixankiho? (b) Ntakiheryo na Yoshiko, ninniixuttiha exeeni?

⁵ Noosuwela wira Yehova onniphavela onikhaliherya okathi wa mixankiho mwaha woowi aahaaleiherya atthu awe wira: “Mwalapuwaka miró sosareya màsi, miyo kiri ni nyuwo: mwavirá mmàsini mowixa, màsi awo khanosamihani. Mwaviraka eriyari ya moro, khamumpahiwa: malumi a moro khaniwirelani sotakhala”. (Yes. 43:2) Moolumo ala antaphulela exeeni?

⁶ Yehova khonnileiherya okumiha mixankiho sahu, masi khonkhala-khala eemereryaka “moro”, eyo piiyo, mixankiho ‘sinipahaka’ aahiiso oniiriha ohiya omurumeela. Yehova onninlipiherya wira onookhala ni hiyo wira onikhaliherye ‘olapuwa’ aahiiso oxintta mixankiho sahu. Nto Yehova onrowa opaka exeeni? Owo onoonikhaliherya okhala oomaaleleya ni ohitepa woova wira nivikanihe ororomeleya wa yena hata nihalaka okhwa. (Yes. 41:13) Yoshiko, yoowo nimulavunle ahu wanipacerya, aahoona wira moolumo awo teekeekhai. Mwanawe mwaamuthiyana onihimya so: “Tthiri omaaleleya wa Maama ahu waahinikuxa murima. Nave ninnikupali wira Yehova aahinvaha murettele wekeekhai. Mpakha nihiku okhwiiye awe, Maama ahu aanaaleela sooleiherya sa Yehova mameedika awe”. Ntakiheryo na Yoshiko, ninniixuttiha exeeni? Vaavo ninkupali ahu yooleiherya ya Yehova yoowi “Miyo kiri ni nyuwo”, ninnilipa murima ni ovilela okathi sinniphwanya aya mixankiho.

“MIYO KI MULUKU ANYU”

7-8. (a) Yooleiherya xeeni ya nenli ninrowa ahu othokorerya ni entaphulela exeeni? (b) Xeeni Yehova aalenle awe aYuda yaari weepotthani wira ‘ahivelavelé’? (c) Moota xeeni moolumo ari Yesaya 46:3, 4 anaakhaliherya aya atthu a Muluku ohoova?

⁷ Nwehe yooleiherya ya nenli eniphwanyaneya yoolepa ya Yesaya yeeyo eni: “Muhivelavelé! Miyo ki Muluku anyu”. Yooleiherya ela enitaphulela exeeni? Eveersu ela, nttaava noopacerya, nuulumo noowi “muhivelavelé” ninnuupuxerya “mutthu onimakela oweha ottuli mwaha woowi onoova etthu wala mutthu wira ohimukumiherye ehasara”, aahiiso “mutthu oxankale mwaha woowi orootuthuwa”.

⁸ Xeeni Yehova ohalaka waaleela aYuda yaari weepotthani wira ‘ahivelavelé’? Mwaha woowi, Yehova aanisuwela wira atthu a elapo ele yaarowa woovaka. Exeeni yaarowa owiiriha woova? Wanikisa wa iyaakha 70 aYuda ari ene weepotthani, aBabilonia yaarowa otupheliwa ni anakhotto ootupa oMedo-Persia. Yehova aarowa waarumeela aMedo-Persia wira yaakumihe atthu awe weepotthani oBabilonia. (Yes. 41:2-4) Vaavo aBabilonia ni atthu a maloko makina yaakhala okathi ole yaasuwela aya wira awanani aya yaanirwa, awo yaaniimananiha olipihana mukina ni mukhwaawe ahimyaka wira: Mulipe “murimá”. Nave yaanapaka amuluku anceene yuupuwelaka wira yaamwaakhaliherya oxintta. (Yes. 41:5-7, Biblya Exirima) Okathi ene yoowo, Yehova aahaalipiha aYuda yaari weepotthani, oriki: “Nyuwo, atthu a Isarayeli, arumeyi aka . . . Muhivelavelé! Miyo ki Muluku anyu”. (Yes. 41:8-10) Moone wira Yehova aahimmye wira: “Miyo ki Muluku anyu”. Ni moolumo ala, Yehova aahaakhaliherya atthu awe oororomeleya wira ahooveke, maana nlelo khaaliyanle, aanivikaniha okhala Muluku aya ni awo yaarowa okhalaka atthu awe. Nave aahaaleela wira: “Kinimokhapelelani-tho . . . kinowopolani”. Moolumo ala oomaaliha, yahaalipiha aYuda ale yaari weepotthani.—Mmusome Yesaya 46:3, 4.

9-10. Xeeni nihintthuneya ahu otepa woova? Nvahe ntakiheryo.

⁹ Olelo-va, atthu anootepa woova mwaha woowi mixankiho sinvira sitepaka. Nave, mixankiho iyo sinnaaphwanya arumeyi otheene a Muluku. Masi khanintthuneya otepa woova. Maana Yehova onnileela wira: “Miyo ki Muluku anyu”. Moota xeeni moolumo ala annikhaliherya aya okhala oomaaleleya?

¹⁰ Nrowe nthokorerye ntakiheryo nna: Mmuupuwele Nihaawa ni Kuxiwa yaawo awenle eviyau enveveleya mwaha wa epheyo yuulupale. Vaavo eviyau enthetemana aya erowaka vathi ni osulu, annimwiiwa mutthu ohimyaka wira: “Nware ni mulipihe saana esintu anyu. Maana ninwanana muxankiho mwa okathi vakhaani paahi”. Vano Nihaawa onnixanka vanceene. Masi, moottharelana mulipa-oneettiha eviyau onnihimya-tho wira: “Muhixanke. Ti miyo mulipa-oneettiha eviyau, itthu sotheene sinimweetta saana”. Ottikinyaka muru, Nihaawa onnihimya wira: “Kiireke tthiri itthu sotheene sinimweetta saana?” Masi okathi omosaru, onnoona wira Kuxiwa khoxankale. Nto Nihaawa onnimukoha wira: “Xeeni muhireere anyu omaaleleya, salaama toko?” Otheyaka, Kuxiwa onnimwaakhula Nihaawa wira: “Okhala wira kinnimusuwela saana mulipa-oneettiha eviyau ela. Owo paapa aka!” Moottharelana Kuxiwa onnihimya so: “Kimphavela wooleelani itthu vakhaani voohimya sa paapa aka. Kinnikupali wira nuumala omusuwela, munimoona wira onnisuwela weettiha saana eviyau ni munookhala oomaaleleya”.

11. Ntakiheryo na Kuxiwa ni Nihaawa ninniixuttiha exeeni?

¹¹ Nlikanyiho nla ninniixuttiha exeeni? Nimutakihaka Kuxiwa, ninnikhala oomaaleleya mwaha woowi ninnimusuwela saana Yehova, Tiithi ihu a wiirimu. Ninnisuwela wira mahiku ala ookiserya, Yehova onoonikhaliherya ovilela mixankiho sinlikana ni munamukhaya. (Yes. 35:4) Nave, ninnimuroromela Yehova, nto eyo enninikhaliherya omaaleleya hata atthu akina a moolumwenkuni yoovaka. (Yes. 30:15) Nave-tho, ninnimutakiha Kuxiwa naaleelaka atthu akina itthu sinniiriha omuroromela Muluku. Nto atthu awo, anookupali wira hata saakhumelelaka mixankiho suulupale, Yehova onimwaakhaliherya.

“MIYO KINNOLIPIHANI: KINNOKHALIHERYANI”

12. (a) Yooleiherya xeeni ya neeraru ninrowa ahu othokorerya? (b) Nuulumo noowi “moono” wa Yehova, nnooniherya exeeni?

¹² Vano nrowe nithokorerye yooleiherya ya neeraru, yeeyo eni: “Miyo kinnolipihani: kinnokhaliheryani”. Yesaya aahihimya moota Yehova onaalipiha awe atthu awe, vaavo aahimmye awe wira: “Muluku onrwa n’ikuru wira àlamule atthu n’uwerya [wa moono awe]”. (Yes. 40:10) Ikwaha sinceene, Biibiliya onnirumeela nuulumo noowi “moono”, ophavelaka wooniherya owerya wa Yehova. Tivonto, nuulumo noowi “àlamule atthu n’uwerya wawe” ninnooniherya wira Yehova Mwene ooweryexa. Khalai, Yehova aahirumeela ikuru sawe wira aakhaliherye ni owaakiherya arumeyi awe, ni onnivikaniha waalipiha ni owaakiherya atthu yaale animuroromela olelo-va.—Otum. 1:30, 31; Yes. 43:10.

13. (a) Okathi xeeni Yehova ontepa awe omaleliha yooleiherya awe ya onilipiha? (b) Yooleiherya xeeni ennilipiha ni onnroromeliha?

¹³ Okathi awanani ahu annilupattha aya, Yehova onnitepa omaleliha yooleiherya awe eni: “Miyo kinnolipihani”. Ilapo sikina, awanani ahu anneererya onikhoottiherya olaleerya aahiiso omala-maliha mutthenkeso ahu. Hata vari siiso, hiyo khanintepa oxanka mwaha wa olupatthiwa iwo. Maana Yehova oonivaha sooleiherya sinnilipiha ni onroromeliha. Yehova onihimya wira: “Iyuma sothene sipakeliwe wolupatthani khasinvara-tho muteko”. (Yes. 54:17) Moolumo ala anninuupuxerya itthu tthaaru ninrowa ahu othokorerya.

14. Xeeni nihintikinihiwa ahu naawehaka awanani ahu antuphelaka?

¹⁴ Yoopacerya, okhala wira na atthareli a Kristu nilipeleleke onyokhiwa. (Math. 10:22) Yesu aahihimya vahinatthi wira mahiku ookiserya atthareli awe yaarowa otepaka olupatthiwa. (Math. 24:9; Yoh. 15:20) Ya nenli, eprofesia ya Yesaya yaahihimya vahinatthi wira ohiya paahi oninyokha, awanani ahu yaarowa orumeelaka ikapwitthi soovirikana wira anlupatthe. Ikapwitthi iyo sinihela muhina, oninyoonyiha, onootherya itthu sotheene sootakhala ni onlupattha vootakhala. (Math. 5:11) Yehova khonrowa waahiiha awanani ahu orumeela ikapwitthi iyo wira awane ni hiyo. (aÉf. 6:12; Wis. 12:17) Masi khanintthuneya woova. Nthowa xeeni?

15, 16. (a) Etthu xeeni ya neeraru nintthuneya ahu wuupuwela? Ni moota xeeni Yesaya 25:4, 5 onikhaliherya awe eyo? (b) Yesaya 41:11, 12 onooniherya sai ele enrowa waakhumelela awanani ihu otheene?

¹⁵ Nrowe nthokorerye etthu ya neeraru nintthuneya ahu wuupuwela. Yehova ohimmye wira “iyuma sothene” sipakeliwe onlupattha “khasinvara-tho muteko”. Yehova onoowerya onikhapelela okathi wa mixankiho seiyo sinlikana ni munamukhaya, nave onookhala ntthyawelo nahu vaavo ninwanana ahu “ikuru sa mamwene”. (Mmusome Yesaya 25:4, 5.) Awanani ahu khanwerya onikumiherya muxankiho okhanle oonihiiha omurumeela Yehova.—Yes. 65:17.

¹⁶ Nave Yehova onnilipiha omuroromela wahu, vaavo onihimya awe itthu sinrowa waakhumelela ale ‘annilupattha’. (Mmusome Yesaya 41:11, 12.) Hata awanani ahu atepaka onlupattha, aahiiso ekhotto ahu etepaka oviha, hiyo ninnikupali wira: Awanani ihu otheene “anrowa oweriwa n’upweteya”.

MULIPIHE OMUROROMELA WANYU YEHOVA

17-18. (a) Moota xeeni omusoma Biibiliya onlipiha aya omuroromela wahu Muluku? Nvahe ntakiheryo. (b) Wuupuwelela yoolepa ya 2019, enrowa wookhaliheryani sai?

¹⁷ Ninnilipiha omuroromela wahu Yehova vaavo nintepa ahu omusuwela. Nto enamuna emosa nikhanle ahu oomusuwela oratteene Muluku, ti omusoma Biibiliya ni wuupuwelela ele ninsoma ahu. MBiibiliyani sookhala soohimmwa sinceene sinooniherya wira Yehova aahaakhapelela atthu awe khalai. Soohimmwa iyo sinninroromeliha wira Yehova onoonikhapelela okathi wa mixankiho.

¹⁸ Nkahaya moone moolumo ooreera Yesaya aarumenle awe wira ooniherye moota Yehova onnikhapelela awe. Owo aahimulikanyiha Yehova ni makampusi, arumeyi a Muluku ni ipwittipwitthi. Omuhimyaka Yehova, Yesaya aalempe so: “Onnakuxa axinama mmatatani mwawe, onnettiha vorera iye siniwamwiha axan’aya”. (Yes. 40:11) Vaavo nnoona ahu wira Yehova oonikuxa mmatatani mwawe, hiyo khannoova ni ninnimaaleleya. Wira onikhaliherye okhala oomaaleleya, hata nikumanaka mixankiho suulupale, murumeyi oororomeleya ni ankhili oothanla yoolepa ya Yesaya 41:10 wira ekhale yoolepa ya mwaakha wa 2019, yeeyo eni: “Muhivelavelé! Miyo ki Muluku anyu”. Khula nihiku, muupuweleleke moolumo ala oolipiha. Mwiira siiso, animookhaliheryani ovilela mixankiho sinrowa wookhumelelani muhoolo.