MURUU WA NAMULOKO NENLI

Yootaphulela ya Obatizo Anyu

1. Nthowa xeeni obatiziwa mmaasini ory’aya mwaha wootthuneya wa khuta mmosaa a hiyo?

MWAAKHA wa 29 E.C., Yesu aahibatiziwa ni Yohani Mbatiza, opwinihiwaka mmaasini mMuroo Yordani. Mwaneene Yehova iira owehaka ni aahihimya wira aanimweemererya. (Matheyo 3:16, 17) Tivoo, Yesu oovaha ntakiheryo wira awiixutti awe otheene atthareke. Nuuvira iyaakha tthaaru nnimeya, Yesu aahivaha malakiheryo ala wa awiixutti awe: “Kovahiwa owerya wothene wirimu ni vathí. Vano, murowé, mwawixuttiheke atthu a maloko othene, mwabatizaka ni nsina n’Atithi ni na Mwana ni n’Eroho Yowarya [“munepa wootteela”, NM]”. (Matheyo 28:18, 19) Niireke wira nyuwo moobatiziwa ntoko siiso Yesu sirumme awe? Akhala wira khambatiziwe, niireke wira munniilokiherya wira mbatiziwe?

2. Moovarihana ni obatizo, makoho xeeni anitthuneya waakhuliwa?

² Hataa mbatiziwe ene aahiiso mwiilokiheryaka wira mbatiziwe, osuwela oratteene yootaphulela ya obatizo ti wootthuneya wa khuta mutthu yoole oniphavela omurumeela Yehova ni okhala elapo awe esyaa ya xariya. Nto makoho yaawo anitthuneya waakhuliwa taala: Niireke wira obatizo wa eKristau olelo va onitaphulela etthu emosaa ni obatizo wa Yesu? Onitaphulela exeeni obatiziwa “ni nsina n’Atithi ni na Mwana ni n’Eroho Yowarya [“munepa wootteela”, NM]”? Etthu xeeni eniheliwa muhina okhala moovarihana ni yootaphulela ya obatizo wa mmaasini wa eKristau?

Obatizo Waapakiwe ni Yohani

3. Atthu a nloko xeeni yaabatiziwa ni Yohani?

³ Miyeeri sowiiraka mithanuu na mosaa Yesu ohinatthi obatiziwa, Yohani Mbatiza aahirowa olaleerya mothakoni oYudeya, oriki: “Murukunuxe mirima sanyu, mana omwene wa wirimu ori vakhiviru”. (Matheyo 3:1, 2) Atthu yaahiiwa ele yaahimmye Yohani ni yaahivarihela muteko. Awo yaahuupulula soottheka saya, attharuwaka, nto yaahirowa wa Yohani wira abatiziwe mMuroo Yordani. Obatizo owo waari wa aYuda paahi.​—Luka 1:13-16; Miteko s’Arummwa 13:23, 24.

4. Nthowa xeeni aYuda a eseekulu yoopacerya yaatthuneya aya ottharuwa mowaakuveya?

⁴ AYuda ale yaatthuneya ottharuwa mowaakuveya. Omwaako Sinayi mwaakha wa 1513 A.E.C., nloko notheene naamuhavinre aya naahipaka nivarihano, eyo piiyo, natiri oottittimiheya yoowo yampakenle aya Yehova Muluku. Masi, mwaha wa ottheka waya wuulupale, awo khiyaakhanle moovarihana ni miritti sa wataana waya, nto awo yaahuulumeliwa mwaha wa eyo. Mmahiku a Yesu itthu saahitepa ohikhala saana. “Nihiku n’Apwiya, nihiku nulupale ni nowopiha” nenno naahimmwale vahinatthi ni Malakhiya naari vakhiviru. Mu 70 E.C., “nihiku” nne naahiphiya okathi anakhotto ooRoma yaamunyaanyale aya Yerusalemu, ni empa awe, ni yaapwetenx’aya aYuda oovikanaka emilyau emosaa. Yohani Mbatiza, yoowo aari ooluttuweliwa ni okokhorela wekeekhai, aahirummwa ohinatthi ophiya okathi owo woopwetexa, “wira àlikanyiherye Apwiya nloko n’atthu òloka”. Awo yaahaana ottharuwa otthekela Nlamulo na wataana na Moise ni okhala oolikana wira amwaakhele Mwaana a Muluku, Yesu, yoowo Yehova aarumihenle awe.​—Malakhiya 3:22-24; Luka 1:17; Miteko s’Arummwa 19:4.

5. (a) Vaavo Yesu vaarwiiye awe wira obatiziwe, exeeni yaamwiirinhe Yohani okoha? (b) Obatizo wa Yesu waathoonyerya xeeni?

⁵ Eriyari ya ale yaarwiiye wa Yohani wira abatiziwe aari Yesu mwaneene. Nthowa xeeni? Okhala wira Yohani aahisuwela wira Yesu khaarina soottheka wira uupulule, Yohani aahikoha oriki: “Ti miyo kiphwanenle obatiziwa ni nyuwo: vano nyuwo munkirwela miyo?” Masi obatizo wa Yesu waarowa othoonyerya etthu ekina yoovirikana. Siiso Yesu aahaakhula oriki: “Muhikhotté vano: ti siso sinrerelaya wettela sothene sintthunawe Muluku”. (Matheyo 3:13-15) Okhala wira Yesu khaarina yoottheka, obatizo awe khiwaataphulela ottharuwa soottheka; hataa khaatthuneya wiivahererya wa Muluku, mwaha woowi owo aari mutthu a nloko nenno naari noowiivahererya ene wa Yehova. Tivonto, obatizo awe orina ene iyaakha 30 waari wa vameekh’aya, ni waathoonyerya wiiveleela wa Tiithi awe a wirimu wira opake yootthuna ekina ya tiithi Awe.

6. Yesu oonela sai opaka yootthuna ya Muluku?

⁶ Yootthuna ya Muluku wa Kristu Yesu yaahela muhina ovara muteko onivarihana ni Omwene. (Luka 8:1) Nave-tho, yootthuna ela yaavekela ovaha okumi awe wooloka woomutthu ntoko mukuttho ni mathipelo a wataana wa niinano. (Matheyo 20:28; 26:26-28; aHéberi 10:5-10) Yesu aahivaha efaita yuulupale yootaphulela ya obatiziwa wawe mmaasini. Owo kheemerenrye wira itthu sikina saakanyerye ephoole awe. Mpakha wanikisa wa okumi awe valaponi, moororomeleya aahipaka yootthuna ya Muluku, iirihaka olaleerya Omwene wa Muluku okhala muteko wootepa otthuneya.​—Yohani 4:34.

Obatiziwa Mmaasini wa Awiixutti eeKristau

7. Okhuma mu Pentekoositi 33 E.C., etthu xeeni maKristau yaarummwale aya opaka moovarihana ni obatizo?

⁷ Awiixutti oopacerya a Yesu yaahibatiziwa mmaasini ni Yohani, ni moottharelana owo aahaathoonyerya wa Yesu ntoko ale yaarowa okhala n’uwo Momweneni wa wirimu. (Yohani 3:25-30) Ahooleliwaka ni Yesu, awiixutti ala yaahaabatiza-tho atthu akina, obatizo yoowo waarina yootaphulela emosaru ya obatizo wa Yohani. (Yohani 4:1, 2) Masi, okhuma mu Pentekoositi 33 E.C., awo yaahipacerya waakhwaniherya yooruma ya obatiza “ni nsina n’Atithi ni na Mwana ni n’Eroho Yowarya [“munepa wootteela”, NM]”. (Matheyo 28:19) Munrowa woona wira ti vooloka othokorerya yootaphulela ya masuu awo.

8. Onitaphulela exeeni obatiziwa “ni nsina n’Atithi”?

⁸ Onitaphulela exeeni obatiziwa “ni nsina n’Atithi”? Onitaphulela waakhulela nsina nawe, okhulupale awe, owerya wawe, yoolakela awe, ni malamulo awe. Muthokorerye yootaphulela ya masuu ala. (1) Voohimya sa nsina nawe, Esalimo 83:18, NM, enihimya wira: “Nyuwo, nsina nanyu ti Yehova, nyuwo paahi ti mukhanle a Vasuluxa a elapo yotheene”. (2) Voohimya sa okhulupale awe, Yeremiya 10:10 onihimya so: “Apwiya ti Muluku èkekhai”. (3) Voohimya sa owerya wawe, Wisupulula 4:11 onnileela wira: “Pwiy’ahu ni Muluku ahu! Nyuwo mophwanela wakhela ovuwa ni nttittimiho n’uwerya. Tthiri ti nyuwo mpattunxe itthu sothene: mwaha w’otthuna wanyu seiyo sinnikhala, khukhalana ekumi”. (4) Hiyo nohaana-tho weemererya wira Yehova tokhanle Maphattuwelo Eekumi, yoowo olakenle onoopola mu yoottheka ni okhwa: “Oxintta onikhuma w’Apwiya”. (Esalimo 3:9; 36:10) (5) Hiyo nintthuneya weemererya wira Yehova tokhanle Namavaha Muulupale a Malamulo: “Apwiya t’annilamula: awo t’annivaha ikano. Apwiya ti mwené ahu”. (Yesaya 33:22-23) Okhala wira itthu sotheene ti sawawe, hiyo nintumereriwa so: “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene”.​—Matheyo 22:37.

9. Onitaphulela exeeni obatiziwa “ni nsina . . . na Mwana”?

⁹ Onitaphulela exeeni obatiziwa “ni nsina . . . na Mwana”? Onitaphulela weemererya nsina, okhulupale, ni owerya wa Yesu Kristu. Nsina noowi Yesu, nintaphulela “Yehova Moopoli”. Yesu ti mukhulupale mwaha woowi ti Mwaana mmoseene a Muluku, yoowo ori oopacerya opattuxiwa ni Muluku. (Matheyo 16:16; aKolosi 1:15, 16) Wa Mwaana ola, Yohani 3:16 onnileela wira: “Vekekhai, Muluku ohaphentexa atthu [anoopoleya] mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”. Okhala wira Yesu aakhwiiye oororomeleya, Muluku aahimuhihimuxa mwaalipa-ookhwa ni aahincererya owerya wawe. Moovarihana ni murummwa Paulo, Muluku “ònvuwiha [Yesu] vanjene” vasuluu va olumwenku, khukhala a nenli nuumala Yehova. Ti mulattu aya ‘sothene sinnikokhorela nsina na Yesu . . . ni wira atthu othene elaleye wira: ‘Yesu Kristu ti Pwiya’, ni siso envuwihe Muluku Tithi’. (aFilipi 2:9-11) Ela enitaphulela wiiwelela sooruma sa Yesu, seiyo sinikhuma wa mwaneene Yehova.​—Yohani 15:10.

10. Onitaphulela exeeni obatiziwa “ni nsina . . . n’Eroho Yowarya [“munepa wootteela”, NM]”?

¹⁰ Onitaphulela exeeni obatiziwa “ni nsina . . . n’Eroho Yowarya [“munepa wootteela”, NM]”? Onitaphulela osuwela muritti ni muteko onivara aya munepa wootteela. Munepa wootteela exeeni? Ti ikuruu soowerya sa Yehova, seiyo onivarihela awe muteko wira aakhwaniherye soolakela sawe. Yesu aahaaleela atthareli awe wira: “Miyo kinimwavekela Atithi, yovaheni Mulipa-òkhaliherya mukina, wira akhaleke ni nyuwo mahiku othene: owo t’Iroho y’Ekekhai [“munepa wekeekhai”, NM]”. (Yohani 14:16, 17) Munepa ola waarowa waakhaliherya opaka exeeni? Moowuncererya, Yesu aahimenrye wira: “Nyuwo munimwakhela ikuru s’Eroho Yowarya [“munepa wootteela”, NM] enrowa wokhuruwelani; siso munrowa okhala anamon’aka oYerusalemu ni oYudeya wothene ni oSamariya, mpakha omalenle elapo”. (Miteko s’Arummwa 1:8) Orumeelaka munepa wootteela, Yehova aahuupuxerya-tho olempwa wa Biibiliya: “Vekekhai, masu awo khatonko okumihiwa n’utthuna w’atthu: masi atthu ale, yalavunle ni nsina na Muluku, yanettihiwa n’Iroho Yowarya [“munepa wootteela”, NM]”. (2 Pedru 1:21) Siiso, hiyo ninnisuwela muteko wa munepa wootteela vaavo vanimwiixutta ahu Biibiliya. Enamuna ekina ya waakhulela munepa wootteela ti onvekela Yehova wira onikhaliherye wooniherya sowiima sa munepa, seiyo siri: ‘ophenta, otteliwa murima, murettele, ovilela, othunku, orera murima, ororomeleya, wiyeviha, wisumaliha’.​—aGalasia 5:22, 23.

11. (a) Tiivi ekhanle yootaphulela yekeekhai ya obatizo wa mahiku ahu ala? (b) Moota xeeni obatizo onlikana aya ni okhwa ni ovenya?

¹¹ Oopacerya obatiziwa moovarihana ni soolakiherya sa Yesu, yaari aYuda ni ale yaakenle eYuda, opacerya mwaakha wa 33 E.C. Vahipinse, aSamariya yaahivahiwa eparakha ya okhala awiixutti a Kristu. Nuumala vo, mwaakha wa 36 E.C., eparakha eyo yaahivahiwa Amalapo oohithikiliwa. Ahinatthi obatiziwa, aSamariya ni Amalapo yahaana wiivahererya wa Yehova wira amurumeeleke ntoko awiixutti a Mwanawe. Mpakha mahiku ahu ala, ela ennivikaniha okhala yootaphulela ya obatizo wa mmaasini wa eKristau. Opwinihiwa mmaasini moomalela nthoonyeryo noophwanelela na wiivahererya, mwaha woowi obatiziwa onithoonyerya ovithiwa. Opwinihiwa wanyu mmaasini onitaphulela okhwa mmweettelo anyu wa khalai. Okumihiwa mmaasini onitaphulela okhala akumi wira mpakeke yootthuna ya Muluku. “Obatizo [ola] ori omosaru” onnivareleya muteko wa otheene yaale anikhala maKristau eekeekhai. Okathi wa obatizo, awo annikhala Anamoona eeKristau a Yehova, arumeyi oorummwa a Muluku.—aÉfeso 4:5; 2 aKorinto 6:3, 4.

12. Obatizo wa mmaasini wa eKristau onlikana ni exeeni, ni moota xeeni?

¹² Obatizo owo wookhalana esisapo yuulupale ohoolo wa Muluku. Mwa ntakiheryo, nuumala ohimya wira Nowee aahipaka ekalawa, yeeyo yaarumeeliwe wira oopoliwe owo ni emusi awe mu Epula ya Mutaaseke, murummwa Pedru aalempe so: “Màsi ala ethonyeryo y’obatizo, weiwo vano oniwòpolani. Obatizo khahiyó orapihiwa w’erutthu pahi: ti wivahererya wa Muluku ni murima woloka. Obatizo onniwòpolani mwaha w’ohihimuwa wa Yesu Kristu mokhwani”. (1 Pedru 3:21) Ekalawa yaari ethoonyeryo yoowooneya yoowi Nowee aahivara moororomeleya muteko aarummwale awe ni Muluku. Nuumala amalihiwa muteko wa oteka ekalawa, “elapo ya khalai yahipwetexiwa ekhuneliwaka ni màsi a mutaseke”. (2 Pedru 3:6) Masi Nowee ni emusi awe, “atthu vakhani, athanu n’araru pahi, yahikela mukalawani-mmo, khòpoliwa mmàsini”.​—1 Pedru 3:20.

13. Obatizo wa mmaasini onimoopola exeeni muKristau?

¹³ Olelo va, ale aniivahererya wa Yehova mwaha wa waamini ohihimuwa wa Kristu annibatiziwa ntoko ethoonyeryo ya wiivahererya waya. Awo annivikaniha opaka yootthuna ya Muluku mahiku ahu ala ni annoopoliwa mu elapo ela yootakhala. (aGalasia 1:3, 4) Awo khanrowa-tho opwetexiwa vamosaa ni mukhalelo ola wootakhala wa itthu. Awo ahoopoliwa opwetexiwa iwo ni aavahiwa ni Muluku yowuupuxerya ya vamurimani yooloka. Murummwa Yohani onnaalipiherya arumeyi a Muluku wira: “Makhalelo ala anomala vamosá n’itthu simphavelexaya: nto ole onettela otthuna wa Muluku onokhala mahiku othene”.​—1 Yohani 2:17.

Okhala Moovarihana ni Miritti Sahu

14. Nthowa xeeni obatizo paahi ohintaphulela aya woopowa wa mutthu?

¹⁴ Vaarowa okhala vootthekeya wuupuwela wira obatizo paahi onitaphulela woopowa wa mutthu. Obatizo wookhalana efaita akhala wira paahi mutthu ohiiveleela mwekeekhai wa Yehova orweela mwa Yesu Kristu ni nuumala vo onnivikaniha opaka yootthuna ya Muluku, ni okhala oororomeleya mpakha wanikisa. “Ale anrowa okhalela nthiti [ovilela] mpakha womaliheryani, animòpowa”.—Matheyo 24:13.

15. (a) Tiivi ekhanle yootthuna ya Muluku olelo va wa maKristau oobatiziwa? (b) Moota xeeni okhala mwiixutti a Kristu ory’aya wootthuneya mookumini mwahu?

¹⁵ Yootthuna ya Muluku wa Yesu yaahela muhina moota saarumenle awe okumi awe ntoko pinaatamu. Owo aahaana okhwa ntoko mukuttho. Wa hiyo, irutthu sahu sohaana oveleeliwa wa Muluku, ni hiyo nohaana wiikhootta nipakaka yootthuna ya Muluku. (aRoma 12:1, 2) Tthiri, hiyo khinaarowa opakaka yootthuna ya Muluku akhala wira moolakelela ninnitthara elapo enrukurenrye, aahiiso akhala wira okumi ahu onitthara soohakalaliha sa erutthu, nimurumeelaka Muluku moophavela wooniherya paahi. (1 Pedru 4:1-3; 1 Yohani 2:15, 16) Vaavo muYuda mmosaa vaamukonha awe Yesu ele yaatthuneya awe opaka wira ophwanye okumi woohimala, Yesu aahisuwela otthuneya waya okhalana mweettelo wooloka wa okumi. Masi, moottharelana, Yesu aahimooniherya etthu yootepa otthuneya, eyo piiyo, okhala mwiixutti a Kristu, ole onimutthara Yesu. Eyo yohaana okhala etthu yootthuneya mookumini. Okhala mwiixutti a Yesu khontthuneya okhala nipuro na nenli, nikuhaka itthu sa werutthuni nipuro noopacerya.​—Matheyo 19:16-21.

16. (a) Muritti xeeni orina aya maKristau otheene voohimya sa Omwene? (b) Ntoko sinooniherya aya ipaaxina 116 ni 117, tisivi sikhanle iphiro sikina sooreerela sa olaleerya Omwene? (c) Olaleerya wahu ni murima wotheene onithoonyerya exeeni?

¹⁶ Vaahaana ottittimiheriwa-tho wira yootthuna ya Muluku wa Yesu yaanihela muhina muteko wootthuneya moovarihana ni Omwene wa Muluku. Yesu aahoottihiwa ntoko Mwene. Masi ori valaponi, owo aahivaha-tho onamoona mwa nthiti voohimya sa Omwene. Hiyo nookhalana muteko mmosaru woovaha onamoona, nto nookhalana mathowa manceene wira nivare muteko ola ni murima wotheene. Niira siiso, hiyo nnimooniherya oxukhurela wahu olamulelo muulupale wa Yehova ni waaphenta wahu apinaatamu akhw’ihu. (Matheyo 22:36-40) Nave-tho, hiyo ninnooniherya wira nrii oowiiraana ni anamakokhorela akhw’ihu elapo yotheene, yaawo ari anamalaleya a Omwene. Mowiiraana elapo yotheene, hiyo ninneetta nrowaka ohoolo wira niphwanye okumi woohimala valaponi mu olamulelo wa Omwene owo.

Makoho Oowuuluula

• Olikana xeeni ni ovirikana xeeni okhanle eriyari ya obatizo wa Yesu ni obatizo wa mmaasini wa olelo?

• Onitaphulela exeeni obatiziwa “ni nsina n’Atithi ni na Mwana ni n’Eroho Yowarya [“munepa wootteela”, NM]”?

• Exeeni eniheliwa muhina okhala moovarihana ni miritti sa obatizo wa mmaasini wa eKristau?

[Ilatarato siri epaaxina 116, 117]

INAMUNA SIKINA SA OLALEYA OMWENE

Ntthikelaka waaxukurya ale anooniherya ophavela

Wa amusi

Wa apatthani a muteko

Wa apatthani a oxikola

Mphironi

Empa ni empa

Niirihaka soosoma sa Biibiliya vatthokoni