YOOSOMA 51
Munrowa Omuhakalaliha Sai Yehova ni Moolumo Anyu?
Yehova onivaha etthu ya faita yinceene, etthu ene tiila: Olavula. Niireke Yehova onnivaha efaita moota ninlavula ahu? Aayo! (Mmusome Yakobo 1:26.) Nto ninrowa owerya sai olavula mwa enamuna enimusivela Yehova?
1. Nirumeeleke sai moolumo ahu?
Biibiliya onnintumererya otheene ahu oriki: “Mulipihaneke ni mukhaliheryaneke mukina ni mukhwaawe”. (1 aTesaloonika 5:11) Niireke ookhala mutthu munoona anyu wira onnireerela olipihiwa? Munoonela sai omulipiha mutthu owo? Mmooniheryeke wira munninvaha efaita ni munnimuthokorerya ni murima anyu wootheene. Woonasa wene, nyuwo pooti omuttottopela mwaha wa mikhalelo sooloka mutthu owo orina awe. Nave nyuwo pooti osoma yoolepa ya mBiibiliya wira mmulipihe. Sookhala soolepa sinceene sa mBiibiliyani nyuwo mukhanle anyu oorumeela. Masi muhiliyale ela: Moota munrowa anyu olavula pooti omulipiha aahiiso omukhulumula mutthu owo. Nto okathi munrowa anyu olavulanaka, mulavuleke moomaaleleya ni mooreerela murima.—Miruku 15:1.
2. Moolumo xeeni ninreerela ahu okhootta?
Biibiliya onihimya wira: “Mwaano mwanyu, ahikhume moolumo ootakhala”. (aEefeso 4:29.) Moolumo ala antaphulela exeeni? Antaphulela wira nihaana osyaka olavula moolumo oohiloka aahiiso olavula itthu sooveeha sinaariipiha murima atthu akina. Nave nihaana osyaka waapa ni ohankawaani.—Musome Miruku 16:28.
3. Etthu xeeni enrowa onikhaliherya olavula moolumo anaalipiha atthu akina?
Okhala wene, itthu ninlavula ahu sinnooniherya ele nnuupuwela ahu ni eri vamurimani vahu. (Luka 6:45) Tivonto nihaana wiimananiha wuupuwela itthu soolipiha, seekeekhai, sirina efaita yuulupale, sa xariya, sooloka, soophenteya, soottittimiheya, sookhalela ni soottottopeleya. (aFilipi 4:8) Nave ti vooloka othanla mwa miruku matthekulelo ahu ni apatthani ahu. (Miruku 13:20) Ohiya-vo, nihaana wuupuwela nihinatthi olavula. Ohiya opacerya olavula nnahala nuupuwelaka. Nave muupuweleke moota atthu akina anrowa aya woonela moolumo anyu. Biibiliya onihimya wira: “Okakaruwa mwano tukuthi [xoowa] onvulaliha: nlumi na musuweli ninnivoliha makhwatta”.—Miruku 12:18.
MWIIXUTTE ITTHU SIKINA
Nwehe moota woolavula mwa enamuna enimusivela Yehova. Nave moone moota moolumo anyu akhanle aya oowaalipiha atthu akina.
4. Mukhalaneke ephoole ni itthu munilavula anyu
Okathi mukina ninnilavula etthu muhoolo mwaya nnathanana. (Yakobo 3:2) Mmusome aGalasia 5:22, 23, nuumala-vo mwaakhule makoho anittharelana:
Iversiikulu iya sinnilavula mikhalelo sinrowa onikhaliherya okasoopa nlumi nahu. Mukhalelo xeeni muniphavela anyu onvekela Yehova wira oovaheeni? Mikhalelo iya sinrowa wookhaliheryani sai?
Mmusome 1 aKorinto 15:33, nuumala-vo mwaakhule nikoho ninttharelana:
Apatthani ni matthekulelo ahu anivarihana sai ni moota ninlavula ahu?
Moota ninlavula ahu onivarihana ni exeeni?
Mmusome Musuweli 3:1, 7, nuumala-vo mwaakhule nikoho ninttharelana:
Okathi xeeni ninreerela ahu omaala aahiiso olavula?
5. Mwaalavuleke saana atthu akina
Ninrowa osyaka sai waariipiha murima atthu akina ni moolumo ahu? Nwehe EVIIDIYU, nuumala-vo mwaakhule makoho.
Eviidiyu niwenhe ahu, munna ole vaanimusivela waalavula moohiloka atthu akina. Nto xeeni ohalaka opaka marukunuxo?
Etthu xeeni yaamukhalihenrye opaka marukunuxo?
Mmusome Musuweli 7:16, nuumala-vo mwaakhule nikoho ninttharelana:
Akhala wira muniphavela waalavula moohiloka atthu akina muhaana wuupuwela exeeni?
Mmusome Musuweli 7:21, 22, nuumala-vo mwaakhule nikoho ninttharelana:
Iversiikulu iya sinrowa wookhaliheryani sai ohinyoonyiheya akhala wira atthu akina annoolavulani moohiloka?
6. Mwaareereleke murima atthu a etthoko anyu okathi munilavulana anyu
Yehova oniphavela wira okathi ninlavula ahu ni atthu a etthoko ahu, nirumeeleke moolumo ooloka ni niwooniheryeke wira ninnaaphenta. Nwehe EVIIDIYU, nuumala-vo mwaakhule nikoho.
Etthu xeeni enrowa wookhaliheryani waareerela murima atthu a etthoko anyu okathi munilavulana anyu?
Mmusome aEefeso 4:31, 32, nuumala-vo mwaakhule nikoho ninttharelana:
Nihaana olavula mwa enamuna yooloka wira atthu a etthoko ahu yooneke wira ninnaaphenta. Nto ninrowa opaka sai eyo?
Yehova aahimuleela Mwanawe wira aanimphenta vanceene. Mmusome Matheyo 17:5, nuumala-vo mwaakhule nikoho ninttharelana:
Munrowa omutakiha sai Yehova okathi munilavula anyu ni atthu a etthoko anyu?
Mwaattottopeleke atthu akina
ATTHU AKINA ANIHIMYA WIRA: “Miyo kinlavula ele kinuupuwela aka, nto akhala wira mutthu owo khemmusivela miyo nkinanaata”.
Niireke nyuwo munnikupali eyo? Mwaha wa xeeni?
IPONTO SUULUPALE
Moolumo ahu pooti waalipiha aahiiso waariipiha murima atthu akina. Nto nihaana okhalana ephoole ni moolumo ahu. Otepexa wene etthu ninlavula ahu, okathi ninlavula ahu ni moota ninlavula ahu.
Wuuluula
Munrowa waakhaliherya sai atthu akina ni moolumo anyu?
Moolumo xeeni nyuwo muhimphavela anyu olavula?
Etthu xeeni enrowa onikhaliherya okathi wootheene olavula moolumo ooreerela murima ni anaalipiha atthu akina?
NWEHE ITTHU SIKINA
Etthu xeeni enrowa onikhaliherya olavula moolumo anaalipiha atthu akina?
Nwehe etthu enrowa wookhaliheryani ohiya olavula moolumo ooveeha.
“Kiireke ti Vootakhala Olavula Moolumo Ooveeha?” (Mwaha ori va jw.org)
Nwehe etthu enrowa wookhaliheryani ohiya owaapa atthu akina.
Nwehe moota Yehova aamukhalihenrye awe mulopwana mmosa ohiya olavula moolumo ooveeha.
“Miyo Kaahipacerya Wuupuwela Saana Weiwo Okumi Aka Waarowa Aya” (Owehaweha, 1 a Agosto, 2013)