Yesu Aahinvoniha Mmiravo Aavariwe Nlaikha Nootakhala

Okathi Yesu, Pedru, Yakobo ni Yohani yaakhurunwe aya omwaako, awo yaahiphwanya muttitthi muulupale. Masi yookhala yahaalonke. Maana alipa-oolepa yaahaarukurerya awiixutti, anavaanyihana. Atthu yaahitikinihiwa vaavo yanwenhe aya Yesu, nto yaahirowa omulavuliha. Masi Yesu aahaakoha wira: “Munivanyihana-ni?”​—Marko 9:16.

Mulopwana mmosa aahikokhora ohoolo wa Yesu onahimya wira: “Mwixuttihi, koruhenleni mwan’aka ovariwe ni nlaikha nihinlavula. Nanvará vale, nnimmoroxela vathí: ola onnikhuma nipheru mwano n’olumanyiha maino: erutthu awe ennùma. Kihavekela awixutti anyu wira yomole nlaikha nlo: masi ahojela”.​—Marko 9:17, 18.

Woonasa wene, alipa-oolepa yaanaatheya awiixutti ale mwaha woohiwerya woomola nlaikha nanvanre mmiravo ole. Tivonto ohiya omwaakhula paapa ole aaxankale, Yesu aahileela muttitthi ole wira: “Nyuwo, nloko nohamini ni notakhala murima! Kinokhala ni nyuwo mpakha lini? Kinimovilelani mpakha lini?” Moolumo ala yaahimya alipa-oolepa yaawo yaavaanyiha arummwa mwaha woohiwerya omukhaliherya mmiravo ole. Olavulaka ni paapa ole aaxankale, Yesu aahimmye wira: “Mukiruhele mwan’owo”.​—Matheyo 17:17.

Vaavo mmiravo ole aamwaattamenle awe Yesu, nlaikha nootakhala naahimurihela vathi onapacerya wuupuruwa ni okhuma nipheru mwaano. Yesu aahimukoha tiithi awe mwaana ole wira: “Opajenrye lini wira sisa?” Paapa ole aahimwaakhula wira: “Opajenrye ari mwamukhani. Imara sinjene nnimurihela vaikho walá mmàsini, wira nimwìve”. Ni aahimuxonttela wira: “Masi nyuwo, mwaweryaka, munikhaliherye. Munimorele ikharari!”—Marko 9:21, 22.

Paapa ole aahixanka okhala wira awiixutti a Yesu, khiyaawenrye omukhaliherya. Omwaakhulaka paapa ole aamuxonttela ni aariipiwe murima, Yesu aahimmye wira: “Munìrela-ni wira: ‘Nyuwo mwaweryaka’? Sothene sinoweryaneya w’ale anamini”. Moohipisa, paapa ole aahikhuwela iiraka: “Miyo kinnamini. . . mukikhaliherye ohamini waka!”—Marko 9:23, 24.

Yesu aahoona wira muttitthi ole waanimutthimakela. Vaavo atthu otheene yanweha aya, Yesu aahipwapwela nlaikha nne nootakhala iiraka: “We, nlaikha ohinlavula, ohinìwa, kinoruma ti mi: omuhiye mwan’ola. Ohikelé-tho mwa yowo!” Okathi nlaikha nootakhala naamukhuma aya mwaana ole, owo aahikhuwela ni wuupuruwa vanceene. Nuumala-vo mmiravo ole aahimmaathi vathi khukhala ntoko aahikhwa. Vano atthu anceene yaahimya wira: “Ohòkhwa!” (Marko 9:25, 26) Vaavo Yesu aavarenle awe ntata na mwaana ole, aahimweemexa, nto “okathi ene yowo mwanamwane ahivona”. (Matheyo 17:18) Atthu ale yaahitikinihiwa mwaha wa ele Yesu aapanke awe.

Okathi Yesu aarumme awe awiixutti awe orowa olaleerya, awo yaahiwerya woomola malaikha ootakhala. Nto vano, ari ene ni Yesu mpaani, yaahimukoha wira: “Hiyo nojelenle-ni womola nlaikha nle?” Yesu aahiwaakhula wira mwaha wa othoiwa waya waamini, oriki: “Mulok’ola wa malaikha khivo enwerya womola ohikhanle olompa”. (Marko 9:28, 29) Waamini woolipa ni onvekela Muluku waamwaakhaliherya woomola malaikha ale ootakhala ni oowerya.

Yesu aahimaliha mwaha ole, oriki: “Mwaha wo wamini wanyu vakhani. Kinohimeryani ekhweli wira: mwariná wamini ntoko enuku yamukhanixa, mwamwirelaka mwak’ola wira: ‘Okhumé vo, orowé iwe!’, mwak’owo wamukhuma. Khivo mwarowanyu wojelaka”. (Matheyo 17:20) Tthiri iwo waamini wuulupale!

Mixankiho ni soovelaveliha pooti omukhoottiherya mutthu orowa vahoolo mmuteko wa Yehova. Nave itthu iyo pooti okhalaka ntoko khasiniweryaneya oxintta. Tthiri, nakhalana waamini woolipa, nnoowerya oxintta itthu iyo sinkhala ntoko mwaako, niire so, mixankiho ni soovelaveliha.