Muuru Wa Neethanu Neexexe

Niireke wira Ninkhala “Okathi Wokiserya”?

Itthu xeeni sa mahiku ahu ala saahimmwale vahinatthi ni Biibiliya?

Nuulumo na Muluku ninhimya wira atthu yaarowa okhala a mukhalelo xeeni “okathi wokiserya”?

Voohimya sa “okathi wokiserya”, itthu xeeni sooloka Biibiliya saahimmya awe vahinatthi wira saarowa wiiraneya?

MONTOKO wiiwa ihapari muraadioni aahiiso mutelevisau, nto muniikoha wira: ‘Exeeni enrowa okhumelela mulaponi?’ Ihasara sinniiraneya mootutuxa ni moohilipeleleya nto khuuvo pinaatamu onwerya ohimya vahinatthi ele enrowa wiiraneya muhoolo. (Yakobo 4:14) Hataa vari siiso, Yehova onnisuwela ele enrowa wiiraneya muhoolo. (Yesaya 46:10) Khalai, Nuulumo nawe Biibiliya, naahihimya vahinatthi ohiya sootakhala paahi siniiraneya mahiku ahu ala masi-tho itthu sooreera saarowa wiiraneya muhoolo moohipisa.

² Yesu Kristu aahihimya sa Omwene wa Muluku, yoowo onrowa omaliha otakhala ni opaka elapo okhala eparayiisu. (Luka 4:43) Atthu yaaphavela osuwela okathi Omwene vaarowa aya orwa. Mwekeekhai, awiixutti a Yesu yaahimukoha wira: “Ethonyeryo y’orwa [“okhala”, NM] wanyu ni y’omala [“wanikisa wa”, NM] olumwenku t’ivi?” (Matheyo 24:3) Yesu aawaakhunle wira paahi Yehova Muluku tonisuwela okathi ene vaavo wanikisa wa mukhalelo ola wa itthu vanrowa aya orwa. (Matheyo 24:36) Nnaamwi Yesu ahaaleelale awiixutti okathi ene vaavo wanikisa vanrowa aya orwa, owo aahaaleela itthu saarowa wiiraneya valaponi, Omwene ohinatthi oruuha murettele wekeekhai ni ovareleleya wa apinaatamu. Ele yaahimmye awe vahinatthi vano enniiraneya!

³ Nihinatthi ovarerya ele enooniherya wira ninkhala wanikisa wa elapo yootakhala ya Satana, nrowee nthokorerye mowaakuveya ekhotto yeeyo pinaatamu ohitonko awe woona. Ela yiiranen’ye mmapuro ahinooneya wirimu, nto yookhumelela aya enninivara hiyo.

EKHOTTO YIIRANEN’YE WIRIMU

⁴ Muruu ovinre a eliivuru ela ootthokiherya wira Yesu Kristu oopacerya olamulela wirimu ntoko Mwene mu eyaakha ya 1914. (Daniyeli 7:13, 14) Moohipisa nuumala waakhela owerya wa Omwene, Yesu aahiwana ekhotto. Biibiliya onihimya wira: “Yahikhumelela ekhotto wirimu. Nlaikha Mikhayeli [nsina nikina na Yesu] ni makhw’aya nahiwana n’inow’eyo [Satana Diabo]: vano enowa yakhaliheriwa ni malaikh’aya”.a Satana ni malaikha awe ootakhala, axetwani, yaahixinttiwa ni ariheliwa valaponi. Malaikha oororomeleya a Muluku yaahihakalala mwaha woowi Satana ni malaikha awe yaahoomoliwa wirimu. Hataa vari siiso, ohakalala iwo khiwaarowa waaphwanya apinaatamu. Ohiya vo, Biibiliya aahihimya vahinatthi wira: “Nyuwo elapo . . . motakhaliwa, mana Satana òkhuruwela wa nyuwo ananariwene vanjene, okhala wira òsuwela wira orina okathi vakhani pahi”.—Wisupulula 12:7, 9, 12.

⁵ Xontte nkawehani ele ekhotto ya wirimu yaarowa aya okumiherya. Ni esara awe, Satana aarowa waaruuhela otakhaliwa, aahiiso mixankiho ale anikhala valaponi. Ntoko sinrowa anyu woona, vano hiyo ninkhala okathi ene yoowo wa otakhaliwa. Masi onrowa okhala okathi wooyeveela, “okathi vakhani pahi”. Hataa Satana onnisuwela wira okathi owo wa mixankiho onrowa okhala wooyeveela. Biibiliya onnithoonya mahiku ala okhala “okathi wokiserya”. (2 Timótheyo 3:1) Moota onihakalala ahu mwaha woowi Muluku onrowa omaliha moohipisa yoohapuwela ya Diabo mulaponi! Nrowee nthokorerye itthu sikina saahimmwale mBiibiliyani vahinatthi, seiyo siniiraneya mahiku ahu ala. Iya sinooniherya wira ninkhala mmahiku ookiserya ni wira Omwene wa Muluku moohipisa onrowa waaruuhela mareeliho oohimala ale animphenta Yehova. Wanipacerya, nrowee nthokorerye mikhalelo mixexee sa ekanyeryo yeeyo Yesu yaahimmya awe wira yaarowa wooniherya okathi onikhala ahu.

SOWIIRANEYA SUULUPALE SA MAHIKU OOKISERYA

⁶ “Maloko makina anowana ni maloko makhw’aya, elapo enotuphela elapo ekina”. (Matheyo 24:7) Eseekulu 20 evinre ahiiviwa mukhottoni atthu imilyau sinceene. Namatokosa mmosaa a sowiiraneya sa olumwenku olempe so: “Mu soohimmwa siiranen’ye sinooniherya wira eseekulu 20 yooyiihiwa ephomee yinceene. . . . Owo waari okathi wa ekhotto yahaamala, waarina okathi vakhaani wa murettele”. Erelatoorio ya Instituto Worldwatch enihimya so: “Nalikanyiha ikhotto sotheene sa eseekulu yoopacerya nuumala Kristu oyariwa mpakha 1899 nimphwanya wira eseekulu 20 atthu anceene aaphwanyiwa ni ekhotto”. Atthu oovikanaka imilyau 100 ahookhwa mwaha wa ikhotto okhuma 1914. Hataa ntonko ene woona owereya mwaha wowiiviwa ni ekhotto mutthu onimphenta ahu, ohaawa ni woona owereya waaphwannye atthu imilyau sinceene mwaha wookhweliwa ole onimphenta aya ti wootepa.

⁷ “Enokhumelela etala”. (Matheyo 24:7) Alipa-ootokosa anihimya wira iyaakha 30 sivinre, oruweriwa soolya ohincerereya moolumwenkuni. Masi, othowa wa yoolya onnivikaniha mwaha woowi atthu anceene kharina musurukhu oniphiyerya othuma yoolya aahiiso etthaya yoolima. Mu ilapo soohaawa, atthu ibilyau sinceene annivoliwa etala ehinimala. Organização Mundial da Saúde (mutthenkeso wa ekumi wa elapo yotheene), onihimya wira ohilya saana orii mwaha muulupale oniiriha okhwa anamwane oovikanaka imilyau thanuu khuta mwaakha.

⁸ “Sinokhumelela itetere sulupale”. (Luka 21:11) Nto, Instituto Geológico dos E.U.A. (muteko wa otokosa mukhalelo wa etthaya elapo ya Estados Unidos ya wAmerika), onihimya wira: Okhuma 1990 itetere soowiiraka 17 sinikhumelela khuta mwaakha sookhalana owerya oniphiyerya ohonona ipa ni etthaya. Khuta mwaakha sinniiraneya itetere sootupa siniwerya onyaanya ipa. Soohimmwa sikina sinii: “Itetere soowiiva atthu ikonto imiya sene mu iyaakha 100 sookiserya, nto orowa vahoolo wa etekonologia ya otokosa itetere ovukunle vakhaani paahi okhwa mwaha wa itetere”.

⁹ “Sinokhumelela . . . iretta”. (Luka 21:11) Nnaamwi vakhanle ene orowa vahoolo ilooleliwo iretta, iretta sa khalai ni sa niinano sinnaahaaxa apinaatamu. Erelatoorio emosaa enihimya wira iretta sowiiraka 20 sisuweliwe saana, ohela muhina elapaha, malaria, ni koolera, soopakeya okhala itthu sihintikhiniwa mu iyaakha sookiserya. Nto mithinto sikina sa iretta sinnivikaniha okhala sooxankiha oloola ni murette okhanle. Mwekeekhai, niinanoru sookhumelela iretta sowiiraka 30. Ikina sa seiyo khisinvoniwa ni ti soowiiva.

MUKHALELO WA ATTHU ANIKHALA MAHIKU OOKISERYA

¹⁰ Ohimyaka sowiiraneya sikina suulupale sa elapo, Biibiliya aahihimya vahinatthi wira: Mahiku ookiserya yaarowa osuwanyeihiwa ni ovirikana wa mikhalelo sa apinaatamu. Murummwa Paulo aahitthokiherya mikhalelo saarowa aya wooniheryaka atthu awo. Mu 2 Timótheyo 3:1-5, ninsoma so: “Okathi wokiserya, anophiya mahiku òxanka”. Paulo aahihimya-tho wira atthu yaarowa okhala:

▪ owiisupuwelela mmansaya paahi

▪ anamilili

▪ oohiwiiwelela anamuyari aya

▪ oohittittimiha itthu sowaarya aahiiso oohiroromeleya

▪ oohiphenta

▪ oohiisumaaliha

▪ oowali

▪ oophavela soopuha omuhiya Muluku

▪ antthuna wooneyaka ntoko atthu oowaamini, nto anookhootta ikuruu so waamini weiwo.

¹¹ Niireke wira atthu a muttetthe onikhala anyu annooniherya mikhalelo iyo? Aayo annooniherya tthiri. Mapuro otheene aakhala atthu anooniherya mikhalelo sootakhala. Ela enooniherya wira moohipisa Muluku onrowa waaphukela. Biibiliya onihimya wira: “Mwawoná atthu ahinamini ereriwaka, walá alipa-òtakhala yettaka sana: musuwele wira anrowa opwetexiwa wa mahiku othene”.—Esalimo 92:8.

SOWIIRANEYA SOOLOKA!

¹² Tthiri mahiku ookiserya aasareya otakhaliwa, ntoko siiso Biibiliya saahimmya awe vahinatthi. Nto, elapo ela yoovelaveliha, sookhala sowiiraneya sooloka eriyari ya anamakokhorela a Yehova.

¹³ Eliivuru ya Biibiliya, Daniyeli, yaahihimya vahinatthi wira: Atthu “animwinjererya osuwela waya”. Eyo yaarowa wiiraneya silinii? Eriyari ya “mahiku òkiserya”. (Daniyeli 12:4) Mwa vameekh’aya okhuma 1914, Yehova onnaakhaliherya ale mwekeekhai aniphavela omurumeela wira yincererye omwiiwexexa Biibiliya. Awo ahiiwexexa saana ikeekhai sootthuneya ntoko iya: Nsina na Muluku ni yoolakela awe, mukuttho a yowoopola a Yesu Kristu, mukhalelo wa alipa-ookhwa, ni ohihimuwa. Mwa sotheene, anamakokhorela a Yehova ahiixutta moota wooweettiha ikumi saya mmukhalelo onaaruuhela mureerelo ni onimuttittimiha Muluku. Nave-tho awo ahiiwexexa saana ele Omwene wa Muluku enrowa awe opaka ni moota sinrowa awe ophuka miyaha sa valaponi. Anirumeela sai osuwela nno? Nto nikoho nno ninninooniherya eprofecia ekina yeeyo enaakhwanela mahiku ala ookiserya.

¹⁴ Mu eprofecia awe voohimya sa wanikisa wa elapo yootakhala ya Satana, Yesu Kristu aahimmye wira: “Ehapar’ila Yorera y’omwene wa wirimu enolaleiwa mulaponi mothene”. (Matheyo 24:3, 14) Moolumwenkuni, sinnilaleiwa ihapari sooreera sa Omwene ilapo soovikana 230 ni ilavulelo soovikana 400, voohimya sa yootaphulela ya Omwene, ele enrowa awe opaka, ni moota sinrowa ahu waakhela mareeliho aya. Anamoona a Yehova imilyau sinceene annilaleerya mwa nthiti ihapari sooreera sa Omwene. Awo ta “ilapo sothene ni maloko othene ni mahimo othene ni malavulelo othene”. (Wisupulula 7:9) Atthu imilyau sinceene, yaawo aniphavela osuwela ele Biibiliya eniixuttih’awe tthiri, annisomihiwa Biibiliya ni Anamoona vatthokoni vaya moohiliva. Mwekeekhai nno waakhwanela wookuxa murima wa eprofecia, mwa vameekh’aya okhuma vaavale Yesu vaahimmya awe vahinatthi wira ‘atthu othene animwanyokha’ maKristau eekeekhai!—Luka 21:17.

NYUWO MUNROWA OPAKA EXEENI?

¹⁵ Okhala wira iprofecia sinceene sa Biibiliya sinnaakhwanela olelo, khimunaakhulela wira hiyo ninkhala mahiku ookiserya? Nuumala ihapari sooreera olaleeriwa mpakha vaniphavela Yehova, ‘vano-nto olumwenk’ula onomala’ tthiri. (Matheyo 24:14) ‘Omala’ onitaphulela okathi yoowo Muluku onrowa awe omaliha otakhala valaponi. Yehova onrowa onvarihela muteko Yesu ni malaikha oowerya, wira aapwetexa otheene yaale moolakela aninvirikanya. (2 aTesalonika 1:6-9) Satana ni axetwani awe khanrowa-tho owoka maloko. Nuumala vo, Omwene wa Muluku onrowa waavaha mareeliho otheene yaale aniiwelela olamulelo awe wa xariya.—Wisupulula 20:1-3; 21:3-5.

¹⁶ Okhala wira wanikisa wa mukhalelo wa Satana orii vakhiviru, nohaana wiikoha so: ‘Kipakee exeeni?’ Ti wa miruku wuncererya wiixutta voohimya sa Yehova ni itthu sinnivekela awe. (Yohani 17:3) Mukhalee mulipa oomusoma Biibiliya a nthiti. Mpakee okhala yoolema anyu orowa mmithukumanoni moohicompela vamosaa ni ale aniphavela opaka yotthuna ya Yehova. (aHéberi 10:24, 25) Muttottele muraarelo osuwela weiwo Yehova Muluku onaavaha awe atthu elapo yotheene, ni mpakee mirukunuxo sinitthuneya mookumini mwanyu wira mweemereriwe ni Muluku.—Yakobo 4:8.

¹⁷ Yesu aahihimya vahinatthi wira anamunceene khiyaarowa ocalelaka yowooniherya yoowi ninkhala mmahiku ookiserya. Opwetexiwa wa atakhali onrowa orwa mootutuxa ni moohilipeleleya. Ntoko nawiiye ohiyu, onrowa waaphwanya anamunceene mootutuxerya. (1 aTesalonika 5:2) Yesu aaloponle so: “Orwa wa Mwana a Mutthu onokhumelela volikana n’itthu sìraneĩye mahiku a Nowé. Tthirí, mahiku awo, ehalaka orupa epula ya mutáseke, atthu yanilya, yaniwurya, yanithelana, mpakha nihiku Nowé nakenlyawe mukalawani. Awo khiyànyiherya etthu, mpakha ophiya epula ya mutáseke, khuwivakasa atthu othene. Vanimwiraneya siso-tho okathi onrwawe Mwana a Mutthu”.—Matheyo 24:37-39.

¹⁸ Tivonto, Yesu aahaaleela ale yanwiriyana oriki: “Mwipasope, wira mirima sanyu sihilemeliwe ni sonanara ni sohapala ni sovelaveliha s’ekumi, ni wira nihiku nenlo nihotutuxeni, mana ninrowa wamorela, ntoko ntthavi, atthu othene ankhala mulaponi mothene. Vano mulipeleleke, muhirupé: mulompeke okathi t’ukathi, wira mphwanele otthyawa sothene sinrowa okhumelela ni wemela n’uroromela [moweemereriwa] oholo wa Mwana a Mutthu”. (Luka 21:34-36) Ti wa miruku wiiwelela masuu a Yesu. Nthowa xeeni? Nthowa noowi otheene yaale aneemereriwa ni Yehova Muluku ni “Mwana a Mutthu”, Yesu Kristu, annilipelela woopowa wanikisa wa mukhalelo wa itthu sa Satana, ni okhala moohimala mu elapo esyaa yooreera yeeyo eri vakhiviru!—Yohani 3:16; 2 Pedru 3:13.

[Footnote]

ELE BIIBILIYA ENIIXUTTIH’AWE

▪ Mahiku ookiserya yaarowa osuwanyeihiwa ni ikhotto, othowa wa yoolya, itetere, ni iretta.—Matheyo 24:7; Luka 21:11.

▪ Mahiku ookiserya, atthu anrowa wiisupuwelaka mmansaya paahi, anrowa okhala anamilili, oophavela soopuha omuhiya Muluku.—2 Timótheyo 3:1-5.

▪ Mahiku ala ookiserya, ihapari sooreera sa Omwene sinnilaleeriwa elapo yotheene.—Matheyo 24:14.

[Study Questions]

1. Ninrowa osuwela sai voohimya sa muhoolo?

2, 3. Awiixutti yaamukonhe exeeni Yesu, nto owo aakhunle sai?

4, 5. (a) Etthu xeeni yiiranen’ye wirimu moohipisa nuumala Yesu waakhela Omwene? (b) Moovarihana ni Wisupulula 12:12, ekhotto ya wirimu ekumihenrye exeeni?

6, 7. Masuu a Yesu voohimya sa ikhotto ni othowa wa yoolya anaakhwanela sai olelo va?

8, 9. Exeeni enooniherya wira iprofecia sa Yesu voohimya sa itetere ni iretta sinnaakhwanela?

10. Mikhalelo xeeni saahimmwale vahinatthi mu 2 Timótheyo 3:1-5 siniwoonana anyu atthu olelo?

11. Esalimo 92:8 enooniherya etthu xeeni enrowa owiiraneela atthu ootakhala?

12, 13. Moota xeeni “osuwela” wekeekhai wuncereren’ya aya “mahiku [ala] òkiserya”?

14. Moota xeeni olaleiwa wa ihapari sooreera sa Omwene wuulaanaly’aya olelo, nto tanii anilaleerya?

15. (a) Nyuwo munnikupali wira ninkhala mahiku ookiserya, nto enookupalihani exeeni? (b) ‘Omala’ onrowa otaphulela exeeni wa ale aninvirikanya Yehova ni ale aniiwelela olamulelo wa Omwene wa Muluku?

16. Etthu xeeni ya miruku muntthuneya anyu opaka?

17. Nthowa xeeni opwetexiwa wa atakhali onrowa aya waatutuxerya anamunceene?

18. Yoolopola xeeni ya Yesu nintthuneya ahu wiiwelela?

[Pictures on page 93]

“Ehapar’ila Yorera y’omwene wa wirimu enolaleiwa mulaponi mothene”.—Matheyo 24:14