Niireke Munnaakhela ‘Yoolya ya Okathi’ Wooreerela?

HIYO NINKHALA okathi woxankiha wa ekumi ya apinaatamu. (2 Tim. 3:1-5) Omphenta wahu Yehova ni yoolakela ahu ya okhala moovarihana ni malamulo awe axariya eneehereriwa khula nihiku. Yesu aahihimya vahinatthi wira saamwaakhumelela mixankiho arumeyi awe ni aahaaleiherya wira aamwaakhaliherya okhala oolipa murima ni owerya ovilela mpakha wanikisa. (Math. 24:3, 13; 28:20) Moophavela waalipiha arumeyi awe, owo aahimuthanla murumeyi oororomeleya wira aavaheke yoolya ya omunepani.​—Math. 24:45, 46.

Okhuma vaavale vathanliwe awe murumeyi oororomeleya mwaakha wa 1919, imilyau sa “anamuteko akina” anilavula mattaava otheene aathukumanyiwe mootthokeyani mwa Muluku ni annivahiwa yoolya ya omunepani. (Math. 24:14; Wis. 22:17) Hata vari siiso, khahiyo wira khula nttaava nnaakhela yoolya yomunepani enaamulikana, ni anamunceene khaniwerya waakhela iliivuru sahu sinikumiheriwa mwinternetini. Mwa ntakiheryo anamunceene khaniwerya oweha iviidiyu ni osoma myaha sinikumiheriwa paahi va jw.org. Niireke eyo enitaphulela wira ahaavo atthu ahinaakhela yoolya yoomalela ya omunepani? Wira naakhule saana nikoho nla nihaana ottokorerya makoho maxexe malupale.

1. Ekaruma xeeni yuulupale enirumeela awe Yehova wira onivahe yoolya ya omunepani?

Vaavale Satana vamweeherenrye awe Yesu wira otatuxe maluku akhale iphaau, Yesu aakhunle so: “Khahiyó n’iphawu-ru pahi mutthu t’onkhala awe mukumi, nto ni khula nulumo ninkhuma mwano ma Muluku”. (Math. 4:3, 4) Masu a Muluku alempwale mBiibiliyani. (2 Ped. 1:20, 21) Tivonto vanoona ahu wira Biibiliya ti ekaruma yuulupale ennivaha yoolya ya omunepani.​—2 Tim. 3:16, 17.

Nikhuuru nootthokeya na Yehova nompaka Tradução do Novo Mundo das Escrituras Sagradas, yoowo olelo-va oniphwanyaneya mwa mattaava 120 ni onitaphuleliwa mattaava manceene khula mwaakha. Ohiya-vo aakhala aBiibiliya akina aniphwanyaneya khula mpantta wa valaponi ni ataphuleliwe mwa mattaava imiya sinceene. Wiimananiha iwo wotheene onnivarihana ni yoolakela ya Yehova yoowi “atthu othene yòpowe, esuwele ekekhai”. (1 Tim. 2:3, 4) Okhala wira “Khivo etthu epattuxiwe envitheya va maithoni va Muluku” nto nihaana okupali wira Yehova onimwaakhaliherya otheene yaale “ari amasikhini murohoni mwaya”, wira akele mootthokeyani mwawe ni aavahe yoolya ya omunepani.​—aHéb. 4:13; Math. 5:3, 6; Yoh. 6:44; 10:14.

2. Muteko xeeni sinivara aya iliivuru sahu voohimya sa ovahiwa yoolya?

Wira mutthu okhalane nroromelo noolipa, onitthuneya osoma iliivuru sikina omuhiya Biibiliya paahi. Vannitthuneya-tho wiiwexexa ele enisoma awe ni ovarihela muteko ele eniixutta awe. (Yak. 1:22-25) Murumeyi mmosa a pwiyamwene a wEthiyopia waanimusivela opaka eyo. Owo iira osomaka Nuulumo na Muluku vaavo namalaleerya Filipe aamukonhe awe so: “Munníwa-mo sinsomanyu?” Mulopwana ole aakhunle so: “Kinwerya sai wiwa-mo, ahikhanle mutthu onkitaphulela?” (Mit. 8:26-31) Filipe aahimukhaliherya wiiwexexa Nuulumo na Muluku. Owo ahiiwexexa saana mpakha ophavela obatiziwa. (Mat. 8:32-38) Vamosaru, iliivuru sahu sinimutthokiherya Biibiliya sinoonikhaliherya osuwela ekeekhai. Ti seiyo sinikhalihenrye ovarihela muteko ele eniixutta ahu.​—aKol. 1:9, 10.

Sirumeeliwaka iliivuru iyo, arumeyi a Yehova annivahiwa itthu sinceene somunepani wira alyeeke ni owurya. (Yes. 65:13) Mwa ntakiheryo erevista Owehaweha, yeeyo vano eniphwanyaneya mwa mattaava 210 ennitthokiherya iprofesia sa mBiibiliyani, onikhaliherya wiiwexexa ikeekhai somunepani ni onitumererya okhala moovarihana ni miruku sa mBiibiliyani. Despertai!, yoowo onikumiheriwa mwa mattaava 100, onninnuuherya osuwela wahu voohimya sa soopattuxiwa sa Yehova ni onninooniherya moota woovarihela muteko malakiheryo a mBiibiliyani. (Mir. 3:21-23; aRom. 1:20) Murumeyi oororomeleya onnikumiherya iliivuru sa mattaava 680! Niireke nyuwo munnisuka okathi khula nihiku wira mmusome Biibiliya? Niireke nyuwo munniwerya osoma khula erevista ni khula eliivuru esya enikumiheriwa khula mwaakha?

Ohiya opaka iliivuru paahi, nikhuuru nootthokiheya na Yehova ninnipaka myaha sinikhuma mBiibiliyani wira silavuliweke omuthukumanoni sa muloko, asembeleya ni kongresu. Niireke nyuwo sinnoosivelani myaha, idarama, sowooniherya ni okoha ni waakhuliwa sinipakiwa mmithukumano iyo? Tthiri Yehova onninivaha efesta ya yoolya ya omunepani!​—Yes. 25:6.

3. Mwaahikhalane iliivuru sahu sotheene sa nttaava nanyu niireke nto moothoiwa yoolya ya omunepani?

Nnaari khahiyo siiso. Ni khahiyo voovila osuwela wira arumeyi akina a Yehova pooti okhalana yoolya yowaatta yomunepani waavikana akina. Moota xeeni? Nkahaya muthokorerye okathi wa arummwa. Awo yaahivahiwa osuwela wuulupale waavikana atthareli akina a eseekulu yoopacerya. (Mar. 4:10; 9:35-37) Hata vaari siiso, atthareli akina khiyaathoiwale yoolya, okhala wira yaanivahiwa yoolya yaatthuneya wa awo.​—aÉf. 4:20-24; 1 Ped. 1:8.

Hata okathi Yesu ari awe valaponi aahipaka itthu sinceene seiyo sihilempwale mBiibiliyani. Murummwa Yohani aalempe so: “Nlelo sihavo itthu sinjene siralyawe Yesu. Itthu iya salepiwaka emosá-emosa, kinona wira hatá olumwenku wothene khisàphiyerya-mo ilívuru satthuna olempwa”. (Yoh. 21:25) Nnaamwi atthareli a Yesu a eseekulu yoopacerya yaasuwela itthu sinceene voohimya sa Yesu onivikana hiyo, masi khiivo ennihalela. Yehova oonivaha osuwela wotheene waatthuneya wira nikhale atthareli a Yesu.​—1 Ped. 2:21.

Muupuwele-tho ipaphelo saalempwa ni arummwa aroihelaka miloko sa eseekulu yoopacerya. Yookhala epaphelo emosa Paulo aalempe awe ehikhanle mBiibiliyani. (aKol. 4:16) Nto niireke yoolya ahu ya omunepani ti yoohimalela mwaha woohisoma epaphelo eyo? Nnaari. Yehova onnisuwela etthu enitthuneya ahu ni onninivaha sotheene sintthuneya wira nikhalane nroromelo noolipa.​—Math. 6:8.

Olelo-va aakhala arumeyi a Yehova anceene arina yoolya yowaatta yomunepni waavikana akhwaaya. Niireke nyuwo munilavula nttaava nirina iliivuru vakhaani paahi? Vakhala wira ti siiso, musuwele wira Yehova khooliyanleni. Mukhalele nthiti osoma iliivuru sikhanle sa nttaava nanyu, ni vaaweryaneyaka muroweke mwawiriyane muthukumano wa nttaava nniiwexexa anyu saana. Ni muroromeleke wira Yehova onimoolipihani omunepani.​—Esal. 1:2; aHéb. 10:24, 25.

4. Vakhala wira nyuwo khamuniwerya woona hata osoma myaha sinikumiheriwa va jw.org paahi, niireke munrowa okhala otteettheya omunepani?

Ekeekhai wira Webi saiti ahu onnikumiherya irevista ni iliivuru sikina sinimwiixuttiha Biibiliya. Nave Webi saiti owo onnikumiherya myaha sikhanle owaakhaliherya anamathelana, amiravo ni ale arina anamwane axikhaani. Ni imusi sinceene sinnittottela mureerelo myaha iyo okathi wa Omulompa waya Muluku Vatthokoni. Ohiya-vo, Webi saiti ahu onnikumiherya irelatoorio sa iprograma sa vameekha aya, ntoko ograduwariwa wa anaxikola a oGileadi, muthukumano wa vamwaakhani, ni ihasara sa aphattu sinaakhumelela anna olumwenku wotheene, ophukiwa wa milattu sinaahela muhina atthu a Yehova. (1 Ped. 5:8, 9) Tthiri Webi saiti ola ekaruma yuulupale ya muteko woolaleerya, oniwerya opixa ihapari sooreera ilapo seiye muteko ahu ohinivariwa awe mootaphuwa wala onikhoottihiwa awe.

Hata vari siiso, nyuwo munoowerya okhala oolipa omunepani musomaka wala muhisomaka myaha siri va jw.org. Murumeyi onniimananiha vanceene wira okumiherye iliivuru soolempwa wira saakhaliherye atthu otheene okhala oolipa omunepani. Vano khuuvo onikhanyereriwa othuma ekaruma enrowa okhweiheryaka osoma myaha siri va jw.org. Akina pooti wimpirimiri myaha iyo vakhaani siri va Webi saiti ahu wira yaakawele anna vakhaani ahirina Internet, masi miloko khasinitumereriwa opaka eyo.

Hiyo ninnihakalala mwaha wa osuwela wira Yesu onnaakhwaniherya yooleiherya awe yoowi aarowa onivaha yoolya eniphiyerya ya omunepani. Olelo-va mahiku ala anaamutepa aya okhala otakhala, hiyo nihaana ororomela wira Yehova onrowa ovikaniha onivaha yoolya yomunepani ya “okathi aya” wooreerela.

[Eponto yuulupale epaaxina 4]

Yehova onnisuwela ele ennithowa ni onninivaha sotheene sinitthuneya wira nikhale oolipa omunepani