“Murowé, Mwawixuttiheke Atthu”

1-3. (a) Etthu xeeni mulimi onipaka awe akhala wira khoniwerya othukumanyerya ipyo sawe mekhawe? (b) Muxankiho xeeni Yesu aarina awe okathi wa ephovo ya mwaakha wa 33 Nuumala Kristu Orwa, ni moota xeeni owo aaphunke awe muxankiho ola?

MULIMI mmosa ookhalana muxankiho muulupale. Myeeri vakhaani ottuli, owo oolima ematta awe ni ohaala mmiso. Owo onniweha okhapelelaka oratteene, vaavo makukhu oopacerya aniphuwa aya, ni onnihakalala oweha ipyo sinnuwaka. Vano, muteko awe wotheene woolipa ovanre awe onnitthuveliwa, okhala wira woophiya okathi woohepha. Masi muxankiho orina awe tuula: Khoniwerya ohepha mekhawe okhala wira ipyo iye khasireere waatta. Wira ophuke muxankiho ola, mwa miruku, owo onnilakela waaphavela anamuteko akina ni waaruma mmatta mwawe. Masi, orina okathi vakhaani paahi wira othukumanyerye ipyo sawe iye sootepa oreera.

² Okathi wa ephovo, mwaakha wa 33 Nuumala Kristu Orwa, Yesu yoowo aahihimuxiwe, aahikhalana muxankiho mmosaru. Okathi wa muteko awe woolaleerya valaponi, Yesu aahaala mmiso wa ekeekhai. Vano, wookhala muteko woohepha, ni ipyo khasireere. Atthu anceene anaakhulela ekeekhai anitthuneya othukumanyiwa ntoko awiixutti a Yesu. (Yohani 4:35-38) Yesu oniphuka sai muxankiho ola? Oryeene vamwaako oGalileya, okathi vakhaani ohinatthi orowa wiirimu, owo onnaaruma awiixutti awe waaphavela anamuteko anceene, oriki: “Vano, murowé, mwawixuttiheke atthu a maloko othene, mwabatizaka. . . . Mwawixuttiheke wettela sothene sòrumalyakani”.​—Matheyo 28:19, 20.

³ Yooruma eyo ti etthu yuulupale enimusuwanyeiha mutthu okhala mutthareli eekeekhai a Kristu. Nto, nrowe nthokorerye makoho mararu. Nthowa xeeni Yesu aarumme awe ophaveliwa anamuteko anceene? Moota xeeni aawiixuttinhe awe awiixutti awe waaphwanya anamuteko? Yooruma ela ennihela sai muhina?

Nthowa Naya Yaatthuneya Aya Anamuteko Anceene

4, 5.Nthowa xeeni Yesu ahaarowa awe omaliha muteko aapacenrye awe, ni tani yaarowa ovikaniha ovara muteko ola, nuumala owo otthikela wiirimu?

⁴ Okathi Yesu aapacenrye awe muteko awe woolaleerya mwaakha wa 29 Nuumala Kristu Orwa, owo aahisuwela wira aapaceriha muteko ahaarowa awe omaliha mwaneene. Okathi vakhaani waamuhalela okhala valaponi, owo khaawerya olaleerya mapuro otheene ni waalaleerya atthu otheene muhupi wa Omwene. Mwekeekhai, owo aalaleerya paahi aYuda ni ale yaakenle oyuda, yaawo yaari ntoko “ipwittipwitthi sirimenle”. (Matheyo 15:24) Masi, “ipwittipwitthi [iyo] sirimenle” saahimwareela muttetthe wotheene wa Isarayeli, yoowo wunnuwa waya waarina ikiloomo ikonto sene. Ohiya vo, olumwenku wotheene waahaana olaleiwa ihapari sooreera.​—Matheyo 13:38; 24:14.

⁵ Yesu aahisuwela wira nuumala owo okhwa, waamuhala muteko munceene wira ovariwe. Aahaahimeerya awiixutti awe 11 oororomeleya oriki: “Kinolèlani ekhweli wira: ole onikamini, yowo-tho onovara miteko sinvaraka: hatá onovara sulupalexa ovikana iya, mana miyo kinrowa w’Atithi”. (Yohani 14:12) Okhala wira Mwaana aatthikela wiirimu, nto atthareli awe, ohiya paahi arummwa, masi-tho otheene ale yaarowa okhala awiixutti awe muhoolo, yaahaana ovikaniha ovara muteko woolaleerya ni wowiixuttiha. (Yohani 17:20) Mowiiyeviha, Yesu aaheemererya wira muteko aya waarowa okhala ‘mulupalexa’ ovikana muteko awe. Mu iphiro xeeni? Mu iphiro tthaaru.

6, 7. (a) Mu iphiro xeeni miteko saarowa ovariwa ni atthareli a Yesu saarowa aya okhala suulupalexa ovikana sawawe? (b) Ninrowa wooniherya sai wira Yesu khovonnye mwaha wa waaroromela atthareli awe?

⁶ Ephiro yoopacerya ti yoowi, atthareli a Yesu yaarowa olaleerya muttetthe muulupale. Olelo va, olaleerya waya woophiya mapuro oottaivela a valaponi, ovikana ilapo saarukurerya muttetthe ole Yesu aalaleerya awe. Ephiro ya nenli ti yoowi, awo yaarowa waalaleerya atthu anceene. Awiixutti vakhaani Yesu aahin’ye awe, yaahincerereya mowaakuveya mpakha ophiyerya ikonto sene. (Miteko s’Arummwa 2:41; 4:4) Vano, atthareli a Yesu aaphiyerya imilyau sene, ni ikonto imiya sene annibatiziwa khuta mwaakha. Ephiro ya neeraru ti yoowi, atthareli a Yesu yaarowa olaleerya okathi munceene, mpakha olelo va sivinre aya iyaakha sinaattamela 2.000, okhuma vaavale orummwa wa Yesu wa iyaakha tthaaru nnimeya omanle aya.

⁷ Yesu ooniherya wira onnaaroromela atthareli awe, vaavo aahimmye awe wira awo yaarowa ovara miteko “sulupalexa ovikana iya”. Aahaavaha muteko yoowo waari wootthuneyexa wa owo, eyo piiyo, muteko woolaleerya ni wiixuttiha “Ehapari Yorera y’omwene wa Muluku”. (Luka 4:43) Yesu aahisuwelexa wira awiixutti yanvikaniha ovara muteko owo moororomeleya. Ela entaphulela exeeni wa hiyo olelo va? Vaavo mwa nthiti nimphavela ahu olaleerya ni murima wotheene, hiyo nnooniherya wira Yesu khovonnye mwaha wa waaroromela atthareli awe. Niireke wira ela khahiyo eparakha ya vameekh’aya?​—Luka 13:24.

Oowiixuttihiwa Wira Alaleeryeke

8, 9. Ntakiheryo xeeni Yesu ovanhe awe mmuteko woolaleerya, ni moota xeeni ninrowa ahu otthara ntakiheryo nawe?

⁸ Yesu aahiwiixuttiha awiixutti awe mmukhalelo woolokexa wira yaakhwaniherye orummwa aya. Wanipacerya, owo aahaavaha ntakiheryo noolokexa. (Luka 6:40) Muru ovinre, hiyo noolavula sa moota Yesu oonela awe muteko woolaleerya. Nkahaya mwaathokorerye vakhaani, awiixutti yaale yeetta ni Yesu mu ikwaha sawe soolaleerya. Awo yaaniweha wira Yesu aanilaleerya khuta opuro waaphwanyaneya atthu, eyo piiyo, mukerekhere mwa ephareya, mmattumuxani, mpooma, mmerkaatu, ni vatthokoni vaya. (Matheyo 5:1, 2; Luka 5:1-3; 8:1; 19:5, 6) Awo yaaninweha wira aari namuteko oowiilipiha, owo aanivara muteko okhuma voosiisu mpakha ohiyu. Muteko woolaleerya khahiyo waari muteko aavara awe akhalana okathi paahi, aahiiso aahooneke yoovara! (Luka 21:37, 38; Yohani 5:17) Tthiri, awiixutti awe yaaniweha wira Yesu aanivara muteko owo mwaha woowi aanaaphenta vanceene atthu. Waaniheryasa, awo yaaniweha owiitho wawe, omoriwa ikharari waarina awe vamurimani. (Marko 6:34) Nyuwo munuupuwela wira awiixutti awe yaahapuweliwe sai ni ntakiheryo nawe? Nyuwo mwaarowa ohapuweliwa sai?

⁹ Ntoko atthareli a Kristu, hiyo ninnimutakiha owo mmuteko ahu woolaleerya. Tivonto, hiyo ninnirumeela khuta okathi wooreerela orina ahu wira nivahe “onamona” woomalela. (Miteko s’Arummwa 10:42) Nimutakihaka Yesu, hiyo ninnaaxukurya atthu vatthokoni vaya. (Miteko s’Arummwa 5:42) Vaaphaveleyaka vale, hiyo ninnilokiherya eprograma ahu wira naaxukuryeke atthu okathi yoole waaniheryasa aniphwanyaneya aya owaani. Nave-tho, hiyo ninnaaphavelasa ni mwa miruku ninnaalaleerya atthu mapuro yaale aniphwanyaneya atthu anceene, eyo piiyo, mphironi, mpaarikhi, mulooxa, ni mapuro anivariwa muteko. Hiyo ninnivikaniha ‘ovara muteko woolaleerya’ mooluttuweliwa, okhala wira ninnithokorerya orummwa ahu okhala muteko wootthuneyexa. (1 Timótheyo 4:10) Ophenta wuulupale ni wa murima wotheene orina ahu n’atthu, onniniiriha ovikanihaka ophavela okathi wooreerela wira nilaleeryeke khuta opuro ni okathi oniphwanyaneya aya atthu.​—1 aTesalonika 2:8.

10-12. Etthu xeeni yootthuneya Yesu aawiixuttinhe awe awiixutti awe ohinatthi waaruma orowa olaleerya?

¹⁰ Enamuna ekina Yesu owiixuttinhe awe awiixutti awe, eri waavaha malakiheryo kamosa-kamosa a moota wowaakhwaniherya muteko aya. Ohinatthi waaruma ekwaha yoopacerya arummwa awe 12, ni ekwaha ekina ale 70, wira yalaleeryeke, Yesu aanithukumana n’awo, aavahaka malakiheryo kamosa-kamosa voohimya sa muteko woolaleerya. (Matheyo 10:1-15; Luka 10:1-12) Malakiheryo awo yaahikumiherya mireerelo sooloka, okhala wira Luka 10:17, NM, onihimya wira: “Ale a miloko mithanu na miili yaahihokolowa n’utteeliwa murima”. Nrowe nthokorerye myaha miili sootthuneya, seiyo Yesu aixuttinhe awe, nuupuwelaka wira masu a Yesu yaaroiheliwa aYuda a okathi wa Biibiliya, moovarihana ni ihuweliwo ni soolema saya.

¹¹ Yesu aahiwiixuttiha awiixutti awe omuroromela Yehova. Owo aahaahimeerya oriki: “Ekwah’anyu iyo muhikuxé ewero nnákhala eparatha, walá musurukhu: muhikuxé murupa, nnákhala sowara pili, walá ixapattho, hatá ttotto. Tthiri, namuteko onniphwanela ovahiwa yolya”. (Matheyo 10:9, 10) Yaari etthu yoolema mulipa oneetta mukwaha okuxa musako waaheliwa musurukhu, ncokha naaheliwa yoolya, ni ixapattho sikina.a Mwaha wa Yesu waalakiherya awiixutti awe wira ahixanke mwaha wa itthu iyo, owo aaphavela ohimya wira: “Mmuroromeleke moomalela Yehova, okhala wira owo onimookhapelelani”. Yehova aamwaakhaliherya awo, owiirihaka ale yaakhulela ihapari sooreera waavaha yoolya ni opuro arummwa, okhala wira eyo yaari yoolema wIsarayeli.​—Luka 22:35.

¹² Nave-tho, Yesu aahiwiixuttiha awiixutti awe osyaka itthu saarowa waakanyererya orummwa aya. Owo aahimmye oriki: “Muhimukohé ehali mutthu ti mutthu onkumananyu mphironi”. (Luka 10:4) Niireke wira Yesu aahimeerya wira awo yaahaana okhala oohipatthaneya aahiiso oohicalela? Nnaari. Okathi wa Biibiliya, okoha ihaali waanihela muhina itthu sikina, ohiya paahi omuntela mutthu oryeene ottaiwene. Okoha ihaali waalimaleliwe khalai, waanihela muhina sowiira sinceene ni ovaanela okathi munceene. Musuweli mmosa a myaha sa Biibiliya onihimya so: “Okohana ihaali w’atthu a onikela nsuwa, khahiyo paahi onihela muhina wuurama vakhaani aahiiso ovahana matata, ntoko silimalenle aya atthu a onikhuma nsuwa, masi [waahela] muhina okupaarelana ni wuurama ikwaha sinceene, ni okokhora ohoolo wa mutthu. Itthu sotheene iya saanikuxa okathi munceene”. Mwaha wa Yesu waaleela awiixutti awe wira ahimaliheke okathi munceene akohaka ihaali, owo aaphavela ohimya wira: “Muhaana orumeela oratteene okathi anyu, okhala wira muhupi onikuxa anyu ti wowaakuveya”.b

13. Mu inamuna xeeni ninrowa ahu wooniherya wira ninnihela vamurimani malakiheryo yaale Yesu aavanhe awe awiixutti awe a eseekulu yoopacerya?

¹³ Hiyo ninnihela vamurimani malakiheryo Yesu aavanhe awe awiixutti awe a eseekulu yoopacerya. Okathi onaakhwaniherya ahu orummwa ahu, hiyo ninnimuroromela moomalela Yehova. (Miruku 3:5, 6) Hiyo noosuwela wira khaninkhala-khala nthoiwaka sootthuneya sahu sa werutthuni, akhala wira ‘nnopajerya ophavela omwene’. (Matheyo 6:33) Anamalaleerya a Omwene a okathi wotheene a mulaponi motheene, pooti ohimyaka wira hata okathi wooxankiha, Yehova onnaakhaliherya. (Esalimo 37:25) Nave-tho hiyo ninnisuwela wira nohaana osyaka itthu sinaakanyererya orummwa ahu. Naahikhalane ephoole, mukhalelo ola wa itthu pooti onihapuxa mookhweya. (Luka 21:34-36) Nto, ola khahiyo okathi woohapuxiwa. Muhupi ahu ti wowaakuveya okhala wira okumi w’atthu onnoopopiheya. (aRoma 10:13-15) Wuupuwelela wira okathi ohanle vakhaani, onooniiriha oheemererya wira itthu soohitthuneya sa elapo ela sihonone okathi ni ikuru, seiyo saarowa ahu orumeela oratteene mmuteko wa olaleerya. Muupuweleleke wira okathi ohanle ori vakhaani ni muteko woohepha khoreere.​—Matheyo 9:37, 38.

Muteko Yoowo Onnihela Muhina

14. Etthu xeeni enooniherya wira yooruma elempwale mMatheyo 28:18-20 enaahela muhina atthareli otheene a Kristu? (Nwehe-tho masu ari vathi va epaaxina ela.)

¹⁴ Orumeelaka moolumo oowi “Murowé, mwawixuttiheke atthu”, Yesu yoowo aahihimuxiwe, aahaavaha atthareli awe muritti muulupale. Owo khahiyo paahi aawuupuwelela awiixutti yaale yaakhanle nihiku nne na ephovo, vamwaako oGalileya.c Muteko orummy’awe onihela muhina waalaleerya “atthu a maloko othene”, ni onoovikaniha “mahiku othene, mpakha elapo omala”. Mowooneya, muteko ola onnaahela muhina atthareli otheene a Kristu, hata hiyo olelo va. Nrowe nthokorerye vakhiviru vene, masu a Yesu alempwale mMatheyo 28:18-20.

15. Nthowa xeeni ory’aya wa miruku wiiwelela yooruma ya Yesu voohimya sa waapaka awiixutti?

¹⁵ Ohinatthi waaruma awiixutti awe, Yesu onihimya so: “Kovahiwa owerya wothene wirimu ni vathí”. (Eversiikulu 18) Niireke wira Yesu ookhalana owerya iwo wunceene? Aayo, ookhalana tthiri! Owo nlaikha nuulupale, onnihoolela malaikha ikonto ikonto sene. (1 aTesalonika 4:16; Wisupulula 12:7) Ntoko “muru wa muloko”, owo ookhalana owerya eriyari ya atthareli awe valaponi. (aÉfeso 5:23, NM) Okhuma mwaakha wa 1914, Yesu onnilamulela wiirimu ntoko Mwene a Omesiya. (Wisupulula 11:15) Nave-tho owo ookhalana owerya wa waahihimuxa atthu. (Yohani 5:26-28) Okhala wira Yesu aahipacerya ohimya owerya wuulupale orina awe, eyo enooniherya wira masu aalavunle awe moottharelana, khahiyo waari ovekela masi waari oruma. Ti wa miruku hiyo wiiwelela, okhala wira owerya wawe khahiyo orimwiivaha, masi ovahiwe ni Muluku.​—1 aKorinto 15:27.

16. Mwaha wa onleela wira “murowé”, etthu xeeni Yesu onniruma awe, ni nnaakhwaniherya sai yooruma ela?

¹⁶ Vano, Yesu onnivaha yooruma yeeyo enipacerya ni nuulumo nimosa noowi: “Murowé”. (Eversiikulu 19) Nto, owo onninruma wira hiyo nipacerye waalaleerya atthu akina muhupi wa Omwene. Hiyo pooti orumeela iphiro sinceene soovirikana wira naakhwaniherye muteko ola. Olaleerya empa ni empa, eri ephiro emosa yooreerela wira nlavuleke n’atthu. (Miteko s’Arummwa 20:20) Nave-tho hiyo ninniphavelasa okathi wooreerela wira nilaleeryeke moohiilokiherya; hiyo ninniphavela vanceene opacerya ovaanela ni mutthu voohimya sa ihapari sooreera khuta opuro oniphwanelela ni khuta okathi. Inamuna sahu sa olaleerya pooti ovirikana, nlaleeryaka moovarihana ni mikhalelo ni sootthuneya sa mapuro awo. Masi, etthu emosa ekeekhai: Hiyo ‘ninnirowa’ waaphavela atthu aniphwanelela.​—Matheyo 10:11.

17. Hiyo ‘ninwixuttiha sai atthu’?

¹⁷ Moottharelana, Yesu onnihimya yoophavela ya yooruma eyo, eyo piiyo, ‘owixuttiha atthu a maloko othene’. (Eversiikulu 19) Hiyo ‘ninwixuttiha sai atthu’? Naxikola mutthu oniixutta ni onisoma. Tivonto, waapaka awiixutti khahiyo paahi waavaha osuwela atthu akina. Okathi onimusoma ahu Biibiliya ni ale anaakhulela, yoolakela ahu ori waakhaliherya okhala atthareli a Kristu. Vaaweryaneyaka vale, hiyo ninnittittimiherya ntakiheryo na Yesu, wira ale anaasomiha ahu yiixutteke wira Yesu ti Mwiixuttihi ni Ntakiheryo naya, nto ahaana okhalaka ntoko owo saakhala awe ni ovara muteko aavara awe.​—Yohani 13:15.

18. Nthowa xeeni obatizo ory’aya etthu yootepa otthuneya mookumini mwa mwiixutti?

¹⁸ Mpantta wootthuneya wa yooruma eyo onnihimmwa mmasu ani: “Mwabatizaka ni nsina n’Atithi ni na Mwana ni n’Eroho Yowarya [“munepa wootteela”, NM]”. (Eversiikulu 19) Obatizo eri etthu yootepa otthuneya mookumini mwa mwiixutti, okhala wira ti nthoonyeryo noophwanelela noowi mutthu ole ohiivahererya wa Muluku ni murima wotheene. Tivonto, obatizo ti wootthuneya wira mutthu oopowe. (1 Pedru 3:21) Aayo, ovikaniha opaka itthu sotheene siniwerya awe wira omurumeele Yehova, mwiixutti ole oobatiziwa pooti owehereryaka muhoolo mareeliho oohimala anrwa mu elapo esya. Niireke wira mootoko omukhaliherya mutthu mpakha okhala mwiixutti oobatiziwa a Kristu? Tthiri khiivo etthu yootepa otteeliha murima ovikana eyo, mmuteko wa eKristau.​—3 Yohani 4.

19. Etthu xeeni eniwiixuttiha ahu ale anaasomiha ahu Biibiliya, ni nthowa xeeni wiixuttihiwa iwo onitthuneya aya ovikanihiwaka, hata nuumala obatiziwa?

¹⁹ Yesu onnitthokiherya mpantta woottharelana wa yooruma awe, oriki: “Mwawixuttiheke wettela sothene sòrumalyakani”. (Eversiikulu 20) Hiyo ninniwiixuttiha ale animusoma Biibiliya wira yiiweleleke sooruma sa Yesu, ohela muhina yooruma ya omphenta Muluku, waaphenta anamwaattamanani ahu, ni wira awo yaapakeke awiixutti. (Matheyo 22:37-39) Moorowa vahoolo, hiyo ninnivikaniha owiixuttiha wira atthokiheryeke ikeekhai sa Biibiliya ni yaakiheryeke nroromelo naya, nenno aninnuuherya aya vakhaani-vakhaani. Vaavo awo aniphwanelela aya olaleeryaka ni muloko, hiyo ninnivara muteko hoothe, niwiixuttihaka orweela mwa masu ni ntakiheryo, moota woowerya ovara muteko ole mookhumela saana. Ale abatiziwe niinano pooti ophavelaka malakiheryo makina wira yaakhaliherye ohoolela mixankiho siniheliwa muhina mu omutthara Kristu.​—Luka 9:23, 24.

“Miyo Kinokhala ni Nyuwo Mahiku Othene”

20, 21. (a) Nthowa xeeni nihintthuneya ahu woovaka, vaavo vanaakhwaniherya ahu yooruma ya Yesu? (b) Nthowa xeeni ola ohikhanle aya okathi wookhala ootteettheya, ni tiivi enitthuneya okhala yoolakela ahu?

²⁰ Masu ookiserya a yooruma ya Yesu toororomeliha vanceene: “Vano miyo kinokhala ni nyuwo mahiku othene, mpakha elapo omala”. (Matheyo 28:20) Yesu onnisuwela wira muteko ola ti wootthuneyexa. Nave-tho onnisuwela wira mwaha wa ovara muteko ola, pooti ikwaha sikina okumiherya onyokhiwa ni anamavaanyiha. (Luka 21:12) Masi, khanikhanle nthowa nowoova. Muhooleli ahu khonlipelela wira hiyo nivareke muteko owo moohikhaliheriwa aahiiso mekhihu. Niireke wira khahiyo ti voolipiha osuwela wira Ole ‘ovahiwe owerya wirimu ni vathí’, ori ni hiyo wira onikhaliherye waakhwaniherya muteko ola?

²¹ Yesu aahaalipiherya awiixutti awe wira aarowa okhala n’awo mmuteko aya woolaleerya mu okathi wotheene “mpakha elapo omala”. Hiyo nohaana ovikaniha ovara muteko Yesu ohin’ye awe, mpakha wanikisa ophiya. Ola khahiyo okathi wookhala ootteettheya. Muteko woohepha womunepani onnivikaniha orowa vahoolo! Atthu anceene anaakhulela ekeekhai annithukumanyiwa. Ntoko atthareli a Kristu, nrowe nlakele waakhwaniherya muteko wootthuneya, yoowo nroromeliwe ahu. Nrowe nlakele ovaha okathi ahu, ikuru sahu, ni itthu sirina ahu wira naakhwaniherye yooruma ya Yesu eni: “Murowé, mwawixuttiheke atthu”.