Moohipisa, orumeela aka Omwene awe, Yehova onoomaliha mixankiho sotheene sa apinaatamu. Tthiri iyo ihapari sooreera. Yesu oniphavela wira atthareli awe yaahimeeryeke ihapari iyo sooreera atthu otheene! (Matheyo 28:19, 20) Anamoona a Yehova anipaka sai ele Yesu orumme awe?

1. Olelo-va, eniiraneya sai eprofesia eri Matheyo 24:14?

Yesu aahihimya vahinatthi wira: “Ihapari iya sooreera sa Omwene sinoolaleiwa elapo yotheene”. (Matheyo 24:14) Moohakalala Anamoona a Yehova annivara muteko ola woolaleerya, yoowo ori muteko wa efaita yinceene. Hiyo ninnilaleya ihapari sooreera olumwenku wotheene mattaava anivikana 1.000! Nto onitthuneya wiimananiha ni wiitthokiha oratteene wira niwerye ovara muteko wa efaita yinceene. Tthiri khanaarowa owerya ovara muteko ola muulupale nihikhaliheriwaka ni Yehova.

2. Itthu xeeni nimpaka ahu wira naalaleerye atthu ihapari sooreera?

Hiyo, ninnilaleya ihapari sooreera khula opuro nnaaphwanya ahu atthu. Naatakihaka maKristau a okathi wa arummwa, hiyo ninnilaleya ihapari sooreera “mmaitthokoni”. (Miteko 5:42) Nirumeelaka mananna awo, ninniwerya waalaleerya atthu imilyau sinceene khula mwaakha. Ohiya-vo, okhala wira atthu anceene khanikhala owaani, hiyo ninnilaleya ihapari sooreera mapuro oowaatta atthu. Nave khula okathi nnaaphwanya ahu atthu, ninniimananiha waaleela voohimya sa Yehova ni soolakela sawe wala ele oniphavela awe.

3. Ti pani arina muritti woolaleya ihapari sooreera?

Makristau otheene eekeekhai, ahaana waalaleerya atthu otheene ihapari sooreera. Ninnivara muteko owo ni murima wotheene. Nto ninniluttuweliwa waalaleerya atthu otheene mwaha woowi muteko ahu woolaleerya onnoopola ikumi sa atthu. (Mmusome 1 Timootheyo 4:16.) Hiyo khaninliviwa mwaha wa muteko woolaleerya ninvara ahu. Maana Biibiliya onihimya wira: “Nyuwo nvahiwe mahala, nto nvaheke mahala”. (Matheyo 10:7, 8) Masi khahiyo wira atthu otheene anniphavela ihapari ninlaleya ahu. Hata vari siiso, khaninhiya olaleerya, maana ninnisuwela wira nimmwiiwelela Yehova ni ninnimuhakalaliha.

MWIIXUTTE ITTHU SIKINA

4. Hiyo ninniimananiha wira naalaleerye atthu anceene

EVIIDIYU: Olaleerya Mapuro Oorakamela Mulaponi (7:33)

• Etthu xeeni enoosivelani voohimya sa wiimananiha Anamoona a Yehova anipaka aya wira alaleye ihapari sooreera?

Mmusome Matheyo 22:39 ni aRoma 10:13-15, nuumala-vo mwaakhule makoho anittharelana:

• Vaavo ninlaleerya ahu, nnooniherya sai wira ninnaaphenta atthu akina?

• Yehova oniwoonela sai ale anilaleya ihapari sooreera?—Nwehe eversiikulu 15.

5. Hiyo ninvara vamosa ni Muluku

Sowiiraneya sinceene sinnooniherya oratteene wira Yehova tonihoolela muteko ahu woolaleerya. Mwa ntakiheryo oNova Zelândia, munna mmosa onaasimiya Paul aahimphwanya muthiyana vaavo aalaleerya awe empa ni empa makaaripi. Voosiisu wa nihiku nne, muthiyana ole aahinvekela Muluku orumeelaka nsina nawe Yehova, onvekelaka wira omurume mutthu orowa omuxukurya. Munna Paul onihimya so: “Nuuvira iwoora tthaaru miyo kaahiphiya owannyawe”.

Mmusome 1 aKorinto 3:9, nuumala-vo mwaakhule nikoho ninttharelana:

• Yowiiraneya ntoko ela ya oNova Zelândia enooniherya sai wira Yehova tonihoolela muteko woolaleerya?

Musome Miteko 1:8, nuumala-vo mwaakhule nikoho ninttharelana:

• Xeeni nintthuneya ahu okhaliheriwa ni Yehova wira nivare muteko ahu woolaleerya?

Nyuwo mwaanisuwela?

Khula esumana, mithukumano sahu sa eriyari ya esumana ninniixuttihiwa moota woolaleerya. Akhala wira mootoko orowela mithukumano iyo, nyuwo moonenle sai enamuna nniixuttihiwa ahu?

6. Hiyo ninniiwelela yooruma ya Muluku ya orowa olaleerya

Okathi wa arummwa, awanani a atthareli a Yesu, yaahiimananiha waahiiha olaleerya. Tthiri makristau a okathi wa arummwa yaaniimananiha waakiherya ehakhi aya ya olaleerya arumeelaka ‘nlamulo wira aweryeke olaleya ihapari sooreera’ mootaphuwa. (aFilipi 1:7) Olelo-va, Anamoona a Yehova annipaka etthu emosaru.a

EVIIDIYU: Waakiherya Ihapari Sooreera (2:28)

Musome Miteko 5:27-42, nuumala-vo mwaakhule nikoho ninttharelana:

• Exeeni enniiriha ohihiya olaleya ihapari sooreera?—Nwehe eversiikulu 29, 38, ni 39.

IPONTO SUULUPALE

Yesu ohaaruma atthareli awe waalaleerya ihapari sooreera atthu a maloko otheene. Yehova onninikhaliherya vaavo ninvara ahu muteko owo.

Wuuluula

• Xeeni ihapari sooreera sinlaleiwa aya olumwenku wotheene?

• Vaavo ninlaleerya ahu, nnooniherya sai wira ninnaaphenta atthu akina?

• Niireke muteko woolaleerya onniniphwanyiha ohakalala? Mwaha wa xeeni?

NWEHE ITTHU SIKINA

Nwehe moota Anamoona a Yehova anilaleya aya ihapari sooreera ipooma suulupale.

Ekampanya ya Olaleerya Epooma ya oParis (5:11)

Etthu xeeni Anamoona a Yehova yaapanke aya wira yaalaleerya atthu atthyanwe elapo aya?

Waalaleerya Atthu Atthyanwe Elapo Aya (5:59)

Nwehe moota muthiyana mmosa onitthokiherya awe moota olaleerya onimphwanyiha awe ohakalala.

Kinnihakalala Othanla Ovara Muteko Woolaleerya (6:29)

Nwehe soothanla itribunaale sipanke aya seiyo sinikhalihenrye ovara muteko woolaleerya mootaphuwa.

“Anamalaleerya a Omwene Anniroiha Milattu Saya Otribunaali” (Omwene wa Muluku Onilamulela!, muru 13)

Yesu aahimmye wira makristau ahaana opatisiwa. (Mmusome Matheyo 28:19, 20.) Masi opatiso exeeni? Etthu xeeni mutthu onireerela awe opaka wira opatisiwe?

1. Opatiso exeeni?

Nuulumo noowi “opatiso” ninkhuma nttaava na eKereku ni nintaphulela “opwinihiwa aahiiso oxuweiwa” mmaasini. Eyo ti etthu yiiraneyale okathi Yesu aapatisiwe awe. Maana okathi Yesu aapatisiwe awe Muro Yordani, erutthu awe yotheene yaahipwinihiwa mmaasini. Ninnisuwela eyo mwaha woowi nuumala opatisiwa, Yesu ‘aahikhuma mmaasi’. (Marko 1:9, 10) Ntoko Yesu, vaavo makristau eekeekhai anipatisiwa aya, awo annipwinihiwa mmaasini, niire so, erutthu aya yotheene ennixuweiwa mmaasini.

2. Vaavo mutthu onipatisiwa awe onooniherya exeeni?

Okathi mutthu onipatisiwa awe, owo onnooniherya wira ohiivahererya wa Yehova Muluku. Mutthu oniivahererya sai wa Yehova? Ohinatthi opatisiwa, mutthu owo ohaana onvekela Yehova omuleelaka wira onrowa omurumeelaka okumi awe wotheene. Owo onnimuleiherya omukokhorela Yehova paahi ni ohela nipuro noopacerya mookumini mwawe ele Muluku oniphavela awe. Mutthu owo onnithanla ‘wiikhootta mmansawe’ ni otthara voohihiyererya sowiixuttiha ni ntakiheryo na Yesu. (Matheyo 16:24) Wiivahererya ni opatisiwa onnimukhaliherya mutthu owo okhalana ompatthani wooloka ni Yehova ni atthu animukokhorela Yehova.

3. Wira mutthu opatisiwe, ohaana opaka exeeni?

Muhinatthi opatisiwa, ti vooloka wiixutta itthu voohimya sa Yehova ni olipiha omwaamini wanyu. (Mmusome aHeeberi 11:6.) Vaavo omusuwela wanyu ni omwaamini wanyu Yehova onincerereya aya, munrowa otepaka omphenta Yehova. Eyo enimookhaliheryani opacerya olaleerya ni wiiwelela malamulo a Muluku, niire so, ele Muluku onihimya awe okhala yooloka ni yoohiloka. (2 Timootheyo 4:2; 1 Yohani 5:3) Vaavo mutthu onooniherya awe wira onniphavela ‘weetta ntoko simphwanela aya atthu a Yehova, omusivelihaka mwa itthu sotheene’, owo onimwiivahererya wa Yehova ni opatisiwa.—aKolosi 1:9, 10.a

MWIIXUTTE ITTHU SIKINA

4. Opatisiwa wa Yesu onniniixuttiha itthu sinceene

Mmusome Matheyo 3:13-17 wira nwehe itthu sikina saakhumelenle okathi Yesu aapatisiwa awe. Nuumala-vo, mwaakhule makoho anittharelana:

• Niireke Yesu aapatisiwe ori ene mwaana?

• Yesu aapatisiwe sai? Niireke aattonyeriwe maasi vamuru?

Nuumala opatisiwa, Yesu aahipacerya ovara muteko wa efaita yinceene aavahiwe awe ni Muluku. Mmusome Luka 3:21-23 ni Yohani 6:38, nuumala-vo mwaakhule nikoho ninttharelana:

• Nuumala Yesu opatisiwa, muteko xeeni aahela awe nipuro noopacerya mookumini mwawe?

5. Mwiimananiheke wira mpatisiwe

Wiivahererya wa Yehova ni opatisiwa, pooti okhalaka ntoko muritti muulupale. Masi vaavo munrowa anyu wiixuttaka itthu sikina voohimya sa Yehova ni weettela ele muniixutta anyu, eyo enimookhaliheryani opaka yoothanla eyo ya efaita yinceene, niire so, ophavela opatisiwa. Vano nwehe matakiheryo aatthu apanke eyo. Nwehe EVIIDIYU.

EVIIDIYU: Mulipihe Waataana Wanyu ni Yehova (1:11)

Mmusome Yohani 17:3 ni Yakobo 1:5, nuumala-vo mwaakhule nikoho ninttharelana:

• Etthu xeeni enrowa omukhaliherya mutthu wiilokiherya wira opatisiwe?

1. Hiyo ninniivahererya wa Yehova okathi nimmuleela ahu wira ninrowa omurumeelaka okumi ahu wotheene

2. Okathi nimpatisiwa ahu, ninniwooniherya atthu otheene wira nihiivahererya wa Muluku

6. Okathi nimpatisiwa ahu nniirela mpantta emusi ya Yehova

Okathi nimpatisiwa ahu, hiyo nniirela mpantta emusi yowiiraana ya olumwenku wotheene. Moohicikha elapo anikhuma aya ni mahuweliwo aya, Anamoona a Yehova anikupali itthu simosaru ni aneettela malamulo mamosaru a Muluku. Musome Esalimo 25:14 ni 1 Pedru 2:17, nuumala-vo mwaakhule nikoho ninttharelana:

• Nuumala mutthu opatisiwa, enamuna xeeni ya ompatthani onikhalana awe ni Yehova ni atthu animukokhorela Yehova?

IPONTO SUULUPALE

Yesu ohimmye wira makristau eekeekhai ahaana opatisiwa. Wira mpake eyo, nyuwo muhaana olipiha omwaamini wanyu, weettela malamulo awe ni wiivahererya wa Yehova.

Wuuluula

• Opatiso exeeni? Xeeni vari aya vooloka opatisiwa?

• Wiivahererya ni opatisiwa onivarihana sai?

• Itthu xeeni mutthu onireerela awe opaka ohinatthi wiivahererya wa Yehova ni opatisiwa?

NWEHE ITTHU SIKINA

Mwiixutte ele ekhanle opatisiwa wekeekhai ni opatisiwa ohikhanle wekeekhai.

“Opatisiwa Exeeni?” (Mwaha ori va jw.org)

Nwehe itthu mutthu okhanle awe oopaka wira opatisiwe.

“Omphenta ni Omuxukhurela Yehova Onoowiirihani Opatisiwa” (Owehaweha, Março 2020)

Nwehe etthu enooniherya wira etthu yaamwiirinhe mulopwana mmosa opatisiwa khahiyo waari okhummwa murima.

“Awosa yaaphavela wira kiwehe mmensaka etthu yaari yekeekhai” (Owehaweha, 1 a Feverero, 2013)

Nwehe ele entaphulela aya opatisiwa ni xeeni vari aya vooloka wiimananiha wira mpatisiwe.

“Kiireke Kihaana Opatisiwa?” (Amiravo Annikoha—Waakhuliwa wa Makoho, Evolume 2, muru 37)