Omoonelaka Othunku Yesu Aahinvoniha Namakokho

Yesu ni awiixutti awe 4, yaaheetteetta “elapo yothene y’oGalileya, alaleyaka mpani mothukumana”. Nto itthu sootikiniha Yesu aapanke awe saahimwareela elapo yotheene. (Marko 1:39) Miteko iyo saahisuweliwa epooma yeele aakhala awe mulopwana aarina makokho. Luka, yoowo aari meediku, aahimmye wira mulopwana ole “asareiye makuttula”. (Luka 5:12, Waataana wa Naanaano) Moolumo a Luka anooniherya wira makuttula ale yaahihonona erutthu yotheene ya mulopwana ole.

Tivonto, mukhalelo wa namakokho ole waari wowooniha othunku maana aahaana okhala ottaiwene ni atthu. Nave aahaana okhuwela oriki: “Ka namwikho! Ka namakuttula!” Wira atthu yaari vakhiviru ahimwaattamele ni orava makokho ale. (Onamukuttho 13:45, 46) Exeeni namakuttula ole aapanke awe? Owo aahimwaattamela Yesu khukokhora omuxonttelaka wira: “Pwiya, mwatthuná, munniwerya okireriha”.​—Matheyo 8:2.

Tthiri mulopwana ole animwaamini Yesu! Nave aanooniha othunku mwaha wa eretta ele! Exeeni Yesu aapanke awe? Mwaari mwa nyuwo, mwaarowa opaka exeeni? Omoonelaka othunku, Yesu aahimookolela ntata nawe onanvara, oriki: “Kinnitthuna: murerihiwe”. (Matheyo 8:3) Okhala wira makokho ale yaahimukhuma, atthu akina vanaavila okupali.

Niireke munniphavela okhalana mwene orina othunku ni oowerya ntoko Yesu? Moota Yesu aamuthokorenrye awe namakokho ole, enninikupaliha wira vaavo Yesu onrowa awe olamulelaka elapo yotheene, eprofesia ela ya Biibiliya enimwiiraneya: “Onimwamorela ikharari alipa-òthanyiwa: onowòpola atthu òhawa ni òwiyeviha”. (Esalimo 72:13) Mwekeekhai, Yesu onrowa waakhaliherya atthu otheene oohaawa.

Muupuweleke wira hata Yesu ohinatthi onvoniha namakuttula ole, atthu khiyaareere ohakalala mwaha wa itthu sootikiniha aapanke awe. Vano atthu ale yaahikhalana eparakha ya wiiwa itthu sootikiniha Yesu aapanke awe. Masi Yesu khaaphavela wira atthu ale amwaaminiki mwaha wa itthu yiiwa aya paahi. Yesu aanisuwela eprofesia yaamuhimya yena yiiraka: “Khavo onrowa wiwa masu awe mmawani”, niire so, atthu khiyaarowa omulavula moohireerela. (Yesaya 42:1, 2) Tivonto, Yesu aamulakihenrye awe namakuttula ole oriki: “Mwiwe sana: muhimuhimeryé mutthu etthu ila. Nto murowé, mwaisoniherye mulipa a mukuttho. Mwanvahe yovaha ntoko sirummyawe Moise”.​—Matheyo 8:4.

Mulopwana ole khaareere ohakalala mwaha woopenuxiwa, nto khaawerya ohimuleela mutthu etthu ele yaamwiiranenle. Mulopwana ole aahirowa ni aanilaleya opuro wotheene aavira awe. Nto eyo yaahiwiiriha atthu anceene ophavela osuwela. Tivonto khula opuro Yesu aarowa awe aanisuweliwa. Masi okathi vakhaani paahi taawenrye awe okhala mekhawe. Nnaamwi vaari siiso, atthu a mittetthe sotheene yaahirwa wira yiixuttihiwe ni ovonihiwa ni Yesu.