Nuumala ophiya opuro wooreera waari miri sa olivera, Yesu aahaahiya opuro ole arummwa awe 8. Woonasa wene waattamela opuro waakeliwa aya ejardim ele, Yesu aahaaleela arummwa awe wira: “Mukilathi vava: miyo kinrowa iwe olompa”. Yesu aahaakuxa arummwa awe araru, Pedru, Yakobo ni Yohani, onarowa mujardim. Yesu aahiriipiwa murima aaleela wira: “Murim’aka woripiwa mpakha okhwa. Muhalé vava: nwehereryeke ni miyo”.​—Matheyo 26:36-38.

Ori ene wiirimu, Yesu aahiweha ohaawa wuulupale wa atthu yiiviwe ni anakhotto ooRoma. Vano ntoko pinaatamu, Yesu aanoona owereya ntoko hiyo, nto aahixanka mwaha wa itthu saarowa omukhumelela. Etthu yaamuxankiha vanceene, okhala wira, wiiviwa wawe ntoko nakrime waarowa onyoholiha nsina na Tiithi awe. Iwoora vakhaani saahanle, Yesu aarowa okhomeliwa vamwirini va nihaaxeryo, okhalaka ntoko mutthu oninveeha Muluku.