‘[Owo] Ohìxutta Wìwelela’

1, 2. Nthowa xeeni tiithi oophenta vanihakalala awe onweha mwanawe iiwelelaka, ni moota xeeni moonelo awe onooniherya aya moonelo wa Yehova?

TIITHI mmosa ori vaxanelani ni onweha ota, onwehaka mwanawe onithweela ni apatthani awe. Poola aya onnitupha ekintaali orowaka mustaraatani. Mmiravo ole onninwehexexa poola awe omunlelaka. Mmosa a apatthani awe onimutumererya wira omurowele poola ole mustaraatani mme, masi mmiravo ole onnittikinya muru awe ohimyaka wira: “Tiithi aka onnikikhoottiherya opaka eyo”. Tiithi awe onnitheya moohakalala.

² Exeeni enimwiiriha tiithi ohakalala vanceene? Mwaha woowi oomwiixuttiha mwanawe wira ohiroweke mekhawe mustaraatani. Nto, vaavo mwaana ole vaniiwelela awe, hata ohisuwelaka wira onniwehiwa ni apapa awe, tiithi awe onnisuwela wira mwanawe onniixutta wiiwelela ni oosukeya vanceene mwaha wa wiiwelela iwo. Tiithi owo onoona ntoko siisaale sinoona awe Tiithi ahu a wiirimu, Yehova. Muluku onnisuwela wira naphavela ovikaniha okhala oororomeleya wira naakhele itthu sooreera sa muhoolo sinsukenrya awe, hiyo nohaana wiixutta omuroromela ni omwiiwelela. (Miruku 3:5, 6) Wira niphiye elapo eyo esya, Muluku oomurumiha mwiixuttihi onaavikana apinaatamu otheene.

3, 4. Moota xeeni Yesu ‘ìxuntta [awe] wìwelela’ ni khukhalihiwa ‘òmalela’? Nvahe ntakiheryo.

³ Biibiliya onnilavula etthu yooreera voohimya sa Yesu, oriki: “Arokhalaru Mwana a Muluku, ohìxutta wìwelela ahawaka. Vano arerihiwene vomalela, ahaphwanyiha wopowa wohimala ale othene animwìwelela”. (aHéberi 5:8, 9) Mwaana ola aahikhala wiirimu iyaakha soohikontareya. Owo aahinweha Satana ni malaikha awe oohiiwelela amurukunuwelaka Muluku, masi Mwaana ola oopacerya opattuxiwa khotonko otakaahana n’awo. Eprofesia yowuupuxeriwa yaahirumeela masu ala emuthoonyaka Yesu, yiiraka: “Vano miyo nkikhontte”. (Yesaya 50:5) Nto, moota xeeni masu oowi “ohìxutta wìwelela” anivariheleya aya muteko oratteene wa Mwaana ola oowiiwelela? Vaaweryaneya sai mwaana oohittheka okhalihiwa ‘omalela’?

⁴ Nkahaya muthokorerye nlikanyiho nna: Nakhotto mmosa ookhalana xoowa a eyuuma. Xoowa owo toohaniwa saana ni oolikanela ovara muteko opakeliwa awe, masi khonarumeeliwe okhottoni. Nto, onnimuturuka xoowa owo ni eyuuma yoolipa vanceene ya aaso. Xoowa ola mukina, ootoko orumeeliwa saana okhottoni. Nto khamunaakhulela wira oturuka iwo etthu ya miruku? Moolikanasa, wiiwelela Yesu oonihenrya awe ohinatthi orwa valaponi waari woomalela. Masi nuumala okhala valaponi okathi vakhaani, wiiwelela wawe wahaakhwanihereya moomalela. Vano wiiwelela iwo waaheehereriwa, khumalela, nto eyo yaahiweryaneya orweela mwa soweeha Yesu saakumanne awe valaponi, seiyo sihaarowa awe okumana wiirimu.

5. Exeeni yiirinhe wiiwelela wa Yesu okhala wootthuneyexa, ni exeeni enrowa ahu othokorerya mmuru ola?

⁵ Wiiwelela yaari etthu yootepa otthuneya mmuteko wa Yesu wa orwa valaponi. Ntoko “Adamu òkiserya”, Yesu aahirwa valaponi wira opake ele tiithi ihu oopacerya yoocenle awe opaka, eyo piiyo, ovikaniha omwiiwelela Yehova Muluku, okathi wa yoweeha. (1 aKorinto 15:45) Masi, wiiwelela wa Yesu waari wekeekhai. Yesu aahiiwelela ni muupuwelo awe wotheene, ni murima awe wotheene, ni okumi awe wotheene. Nto, aapaka eyo ni otteeliwa murima. Opaka yootthuna ya Tiithi awe yaari etthu yootthuneya ovikana yoolya! (Yohani 4:34) Exeeni enrowa onikhaliherya wira ntakihe wiiwelela wa Yesu? Wanipacerya nrowe nthokorerye ele yaamwiiriha Yesu wiiwelela. Osuwela mathowa yaamwiiriha Yesu wiiwelela, onrowa onikhaliherya ovilela yoweeha ni opaka yootthuna ya Muluku. Nto, ninrowa wuuluula mareeliho anikhumelela mwaha wa wooniherya wiiwelela ntoko Kristu.

Etthu Yaamwiiriha Yesu Wiiwelela

6, 7. Mathowa xeeni makina yaamwiiriha Yesu wiiwelela?

⁶ Wiiwelela wa Yesu waakumiheriwa ni mikhalelo sooloka saari vamurimani vawe. Ntoko soonale ahu mMuru 3, Kristu aari oowiiyeviha. Wiixinnuuha onniwiiriha atthu ohiiwelela, masi wiiyeviha onninikhaliherya omwiiwelela Yehova ni murima wotheene. (Okhuma 5:1, 2; 1 Pedru 5:5, 6) Nave-tho, etthu yaamwiiriha Yesu wiiwelela mwaha woowi aaniphenta itthu sooloka ni aaninyokha itthu soohiloka.

⁷ Nave-tho, Yesu aanimphenta Tiithi awe a wiirimu, Yehova. Ophenta iwo onrowa othokoreriwa oratteene mMuru 13. Ophenta iwo waahimwiiriha Yesu omoova Muluku mwa nttittimiho. Siiso, okhala wira aanimphenta ni omuttittimiha vanceene Yehova, eyo ti etthu yaamwiiriha omwiiwelela Tiithi awe ni murima wotheene. Mwaha wa omoova Muluku, nto mavekelo a Yesu yaahiwiriyaniwa mooreerela. (aHéberi 5:7) Nave-tho, omoova Yehova ti ethoonyeryo yuulupale ya olamulelo wa Yesu ntoko Mwene ooMesiya.​—Yesaya 11:3.

8, 9. Ntoko saaleiheriwa aya, Yesu oonenle sai exariya ni otakhala, ni oonihenrye sai moonelo owo?

⁸ Omphenta Yehova onivekela-tho onyokha itthu sootakhala Yehova sininyokha awe. Nkawehani, mwa ntakiheryo, eprofesia ela enimuthoonya Mwene ooMesiya eriki: “Nyuwo munnettela ekekhai, munnikhotta sotakhala. Tivó Apwiya, Muluku anyu, ahòthanlani eriyari ya mamwene [makina] othene, ahòttikitthelani makhura òwarya”. (Esalimo 45:8) Mamwene ‘makina’ a Yesu yaari ale a emusi ya Mwene Davidi. Waavikana mamwene awo otheene, Yesu aahikhalana mathowa wira ohakalaleke, aahiiso otteeliwa murima vanceene, okathi wa woottihiwa wawe. Nthowa xeeni? Mwaha woowi etthu yaarowa awe waakhela yaari yuulupalexa ovikana ya mamwene awo, omwene awe onnikumiherya mareeliho oohimala. Owo onnitthuveliwa mwaha woowi ophenta wawe exariya ni onyokha wawe itthu sootakhala, waahimwiiriha omwiiwelela Muluku mwa itthu sotheene.

⁹ Yesu oonihenrye sai muupuwelo awe voohimya sa exariya ni otakhala? Mwa ntakiheryo, Yesu oonenle sai, vaavo atthareli awe yiiwelenle aya masu awe mmuteko wa olaleerya ni khuphwanya mareeliho manceene? Owo aahitteeliwa murima vanceene. (Luka 10:1, 17, 21) Nto, Yesu oonenle sai, vaavo atthu ooYerusalemu yoonihenrya aya munepa woohiiwelela ikwaha sinceene, akhoottaka wiimananiha wawe wira aakhaliherye? Owo aahinla mwaha wa ohiiwelela wa atthu a muttetthe ole. (Luka 19:41, 42) Yesu aahihakalala vanceene nthowa na mweettelo wooloka waarina awiixutti awe, masi aahoona othunku mwaha wa mweettelo woohiloka wa atthu a oYerusalemu.

10. Moonelo xeeni onitthuneya ahu okhalana voohimya sa miteko sa xariya ni soohikhala sa xariya, ni exeeni enrowa onikhaliherya opaka eyo?

¹⁰ Wuupuwelela moonelo wa Yesu, onninikhaliherya othokorerya ele enniiriha omwiiwelela Yehova. Nnaamwi nryeene anamattheka, hiyo nnoowerya ophenta tthiri itthu sooloka ni onyokha mweettelo woohiloka. Hiyo nohaana onvekela Yehova wira onikhaliherye okhalana moonelo awe ni wa Mwanawe. (Esalimo 51:10) Okathi omosaru, hiyo nohaana osyaka soohapuwela seiyo sinrowa otteettheiha moonelo owo. Ti vootthuneya othanlaka matthekulelo ahu ni ale anitthekulana ahu. (Miruku 13:20; aFilipi 4:8) Akhala wira nnookhalana mathowa a wiiwelela ntoko ale a Kristu, wiiwelela wahu onrowa okhala wekeekhai. Hiyo ninrowa ophentaka ele eri yooloka mwaha woowi ninniphavela opaka eyo. Hiyo ninrowa osyaka sowiira soohiloka, ohiya mwaha wa woova wooneliwa, masi mwaha woowi ninninyokha mweettelo owo.

‘Kristu Khatonko Wira Etampi’

11, 12. (a) Exeeni yaamwiiranenle Yesu wanipacerya wa orummwa awe? (b) Wanipacerya Satana aamweeherenrye sai Yesu, ni aarumenle olavilavi xeeni?

¹¹ Voohimya sa onyokha wawe yoottheka, Yesu aaheehereriwa wanipacerya wa orummwa awe. Nuumala obatizo awe, owo aahiviriha mahiku 40 othana ni ohiyu mothakoni, ohilyiiye. Wanikisa wa mahiku awo, Satana aahirwa omweehererya. Nkawehani olavilavi Diabo aarumenle awe.​—Matheyo 4:1-11.

¹² Wanipacerya Satana aahimmye so: “Nyuwo, mwàri Mwana a Muluku, murume maluku ala othatuwa, ekhalé ephau”. (Matheyo 4:3) Yesu oonenle sai nuumala ovira mahiku manceene ohilyiiye? Biibiliya onihimya wira: “[Owo] ahivoliwa etala”. (Matheyo 4:2) Nto, moohaaniherya Satana aahinwehererya Yesu ovoliwa vanceene wira ottottele muraarelo yoophavela ya ephattu ya olya. Nave-tho, nwehe masu ooweeha a Satana oowi: “Nyuwo, mwàri Mwana a Muluku”. Satana aahisuwela wira Yesu “t’òpajerya mwa sopattuxiwa sothene”. (aKolosi 1:15) Hata vari siiso, Yesu kheemerenrye wira Satana omwiirihe okhala oohiiwelela. Yesu aahisuwela wira eyo khahiyo yaari yootthuna ya Muluku wira owo orumeeleke owerya wawe iirelaka soophavela sawe. Owo aahikhootta opaka eyo, ooniheryaka mowiiyeviha wira aaroromela okhaliheriwa ni ohooleliwa ni Yehova.​—Matheyo 4:4.

13-15. (a) Satana aamweeherenrye sai Yesu ekwaha ya nenli ni ya neeraru, nto Yesu aakhunle sai? (b) Ninsuwela sai wira Yesu khaakhala-khala ohiyereryaka okhala ooweha-weha weehererya wa Satana?

¹³ Ekwaha ya nenli, Satana aahimuroiha Yesu nipuro noorakamexa vasulu va empa ya Muluku. Orumeelaka moolavilavi Nuulumo na Muluku, Satana aahimweehererya Yesu wira iixooniherye orweela mwa otupha vasulu vale wira malaikha amukaphule mmatatani mwaya. Vaakhanle wira muttitthi ole w’atthu waari empa ele waahiweha mwiiriirya ole, niireke wira ookhala aarowa ovaanya wira Yesu ti Mesiya aaleiheriwe? Nto, vaakhanle wira muttitthi ole waaheemererya wira Yesu ti Mesiya, mwaha woowi ohiixooniherya otuphaka nipuro noorakamexa, niireke wira Yesu khaarowa osyaka ohaaxiwa ni mixankiho? Waaniheryasa, aayo. Masi Yesu aahisuwela wira Yehova onitthuna wira Mesiya aakhwaniherye muteko awe mowiiyeviha, ohiya owiiriha atthu okupali orweela mwa miteko sowiixooniherya. (Yesaya 42:1, 2) Ekwaha ela-tho, Yesu aahivikaniha omwiiwelela Yehova. Owo khaakuxen’ye murima mwaha wa ophavela ovuwa.

¹⁴ Nto, sai voohimya sa yoweeha ya okhala mukhulupale? Omweehaka ekwaha ya neeraru, Satana aahihimya wira aamunvaha Yesu omwene wotheene wa mulaponi akhala wira Yesu aamweemererya omukokhorela Satana. Niireke wira Yesu aahithokorerya oratteene yoovaha eyo ya Satana? Yesu aamwaakhunle Satana oriki: “Khuma va, Satana!” Nave-tho aahincererya oriki: “Mana volempwa wira: ‘Mwakokhoreleke Apwiya Muluku anyu: yawo pahi mwattittimiheke’”. (Matheyo 4:10) Khiivo-tho etthu yaarowa omwiiriha Yesu omukokhorela muluku mukina. Khiivo yoovaha ya okhala mukhulupale mu olumwenku ola, yaarowa omwiiriha Yesu ohimwiiwelela Yehova.

¹⁵ Niireke wira Satana aahimuhiya Yesu? Aayo, owo aahimuhiya Yesu. Masi Ehapari ya Luka enihimya wira Diabo “ahimuhiya, khurowa mpakha okathi wophwanelela”. (Luka 4:13) Tthiri, Satana aarowa ophavela okathi mukina woophwanelela wira omweehererye Yesu mpakha wanikisa. Biibiliya onihimya wira Yesu “ahehereriwa ntoko hiyo mwa sothene”. (aHéberi 4:15) Tivonto Yesu khaahiyerenrye okhala ooweha-weha; nave-tho hiyo nihihiyereryeke okhala ooweha-weha.

16. Satana oniweehererya sai arumeyi a Muluku olelo va, ni ninrowa okhootta sai wiimananiha wawe?

¹⁶ Satana onnivikaniha oweehererya arumeyi a Muluku olelo va. Mooriipiha murima, ikwaha sinceene, mukhalelo ahu woottheka onniniiriha okhala yoolukama yookhweya ya Satana. Moolavilavi, Satana onnittottela muraarelo yoophavela ahu yeephattu ya wiitthuna, wiixinnuuha, ni okhulupale. Orumeelaka muraakho wa ophavelasa muhakhu, waaniheryasa, Satana pooti orumeela mikhalelo sotheene iya ekwaha emosa! Nto, ikwaha sikina, ti vootthuneya wiitokosaka oratteene. Hiyo nohaana wuupuwelelaka masu aniphwanyaneya mu 1 Yohani 2:15-17. Vaavo vanuupuwelela ahu, hiyo nohaana wiikohaka akhala wira soophavela sa werutthuni sa olumwenku ola, wunlela muhakhu, ni ophavela wiixooniherya, woopacerya ohonona omphenta wahu Tiithi ihu a wiirimu. Hiyo nohaana wuupuwelaka wira elapo ela enoovira, vamosa ni namalamulela aya, Satana. Nto hiyo nikhootteke wiimananiha woolavilavi wa Satana, oniphavela oniiriha opaka yoottheka! Tivonto, hiyo nohaana omutakihaka Pwiya ahu, okhala wira “khatonko wira etampi”.​—1 Pedru 2:22.

“Mahiku Othene Miyo Kinnìra Itthu Sinimusivela”

17. Yesu oonela sai omwiiwelela Tiithi awe, masi waaniheryasa muupuwelo xeeni atthu akina arina aya?

¹⁷ Wiiwelela onnihela muhina itthu sikina, ohiya paahi okhootta opaka yoottheka; Kristu aanivara ni ikuru sotheene sooruma sotheene sa Tiithi awe. Yesu aahihimya oriki: “Mahiku othene miyo kinnìra itthu sinimusivela”. (Yohani 8:29) Wiiwelela nno waahimuhakalaliha Yesu vanceene. Tthiri, atthu akina pooti wuupuwela wira Yesu khiwaamurikela wiiwelela. Awo pooti wuupuwela wira Yesu aahaana omwiiwelela paahi Yehova, yoowo ori oohittheka, masi hiyo ikwaha sinceene nohaana owiiwelelaka apinaatamu oottheka yaawo ari akhulupale. Masi, ekeekhai tiila: Yesu aaniwiiwelela apinaatamu oottheka yaawo yaari akhulupale.

18. Ntakiheryo xeeni na wiiwelela Yesu aavanhe awe okathi aary’awe mmiravo?

¹⁸ Okathi annuwa awe, Yesu aaniwiiwelela axitiithi awe oopinaatamu yaawo yaari oottheka, Yosefe ni Maria. Moolikanasa, ntoko anamwane akina, owo aaniwerya oweha soovonya sa axitiithi awe. Niireke wira Yesu aanaarukunuwela, ohinawiiwelela ni onaalela axitiithi awe moota wohoolela etthoko? Eliivuru ya Luka 2:51 ennilavula sa Yesu okathi aarina awe iyaakha 12 eriki: “[Yesu] aniwiwelela yawo”. Mwaha wa wiiwelela iwo, owo oovaha ntakiheryo nooloka wa amiravo eeKristau, yaawo aniilipiherya owiiwelela axitiithi aya ni waavaha nttittimiho aniphwanelela aya.—aÉfeso 6:1, 2.

19, 20. (a) Mixankiho xeeni sa vameekh’aya Yesu aakumanne awe voohimya sa owiiwelela apinaatamu oottheka? (b) Nthowa xeeni maKristau eekeekhai olelo va, anitthuneya aya owiiwelelaka ale anihoolela mmulokoni?

¹⁹ Voohimya sa owiiwelela apinaatamu oottheka, Yesu aahihaawa mixankiho seiyo maKristau eekeekhai olelo va sihinrowa waaphwanya. Nkahaya muupuwele okathi ole wa vameekh’aya Yesu aary’awe valaponi. Mukhalelo wa itthu wa etiini ya aYuda, ni empa aya yookokhorela oYerusalemu, vamosa ni onamukuttho aya, waneemereriwa ni Yehova okhuma khalai, masi mu okathi vakhaani waarowa okhoottiwa, nto opuro aya waarowa oheliwa muloko wa eKristau. (Matheyo 23:33-38) Okathi ene yoowo, ahooleli anceene a itiini yaaniixuttiha ithiru saakhuma mu sowiixuttiha sa eKriki. Mpaani mwa Muluku mwaahisareya wiiya, tivonto Yesu aahiitthana opuro ole okhala “nikhuku n’anawĩye”. (Marko 11:17) Niireke wira Yesu aanisyaka orowa empa ele ya Muluku ni musinagoga? Nnaari! Yehova nlelo aanirumeela mapuro ale. Mowiiwelela, Yesu aanirowela miira yaapakiwa mapuro ale okhala wira Muluku nlelo aanirumeela nipuro nne.​—Luka 4:16; Yohani 5:1.

²⁰ Okhala wira Yesu aaniiwelela mmikhalelo iyo, nto ti vootepa otthuneya maKristau eekeekhai olelo va ovikaniha wiiwelela! Tthiri, okathi onikhala ahu ti woovirikana n’ule. Ntoko saahimmwale aya okhuma khalai, ola ori okathi wa olokiheriwa okokhorela wooloka. Muluku onninlipiherya wira khonikhala-khala eemereryaka wira Satana aahonone atthu Muluku aalokihenrye awe. (Yesaya 2:1, 2; 54:17) Mwekeekhai, mmulokoni mwa eKristau aakhala atthu oohimalela. Masi niireke wira hiyo nohaana orumeela soovonya sa annihu ntoko yootthyawelela wira nihimwiiweleleke Yehova, khino nihirowelaka mithukumano sa mmulokoni aahiiso waavaanyiha axitokweene a mmulokoni? Nnaari! Ohiya vo, hiyo ninnaakhaliherya ni murima wotheene ale anihoolela mmulokoni. Mowiiwelela hiyo ninnirowela mithukumano sa eKristau ni mithukumano sa muttetthe ni ninnivarihela muteko miruku sa mBiibiliyani sinivahiwa ahu mmithukumanoni mmo.​—aHéberi 10:24, 25; 13:17.

21. Exeeni Yesu aapanke awe okathi aakhanyereriwa awe ni apinaatamu wira ohimwiiwelele Muluku, nto ntakiheryo xeeni onivanhe awe?

²¹ Yesu khaaweemerenrye atthu, hata apatthani awe yaarina miruku saakhala ntoko ti sooloka, wira amuhiihe omwiiwelela Yehova. Mwa ntakiheryo, murummwa Pedru aaheererya omukupaliha Pwiya awe wira khaatthuneya ohaawa ni okhwa. Yesu aahikhootta moomalela muupuwelelo ole waakhala ntoko wooloka wa Pedru, yoowo aarumeela awe moohiphwanelela, ophavelaka wira Yesu iimorele ikharari. (Matheyo 16:21-23) Olelo va, ikwaha sinceene atthareli a Yesu annikumana mixankiho sinikumiheriwa ni amusi aya, yaawo arina miyuupuwelelo sinkhala ntoko ti sooloka, masi aniphavela owiiriha maKristau awo ohiiwelela malamulo a Muluku. Naatakihaka atthareli a Yesu a eseekulu yoopacerya, hiyo nohaana ovikaniha “omwiwelela Muluku ovikana owiwelela atthu”.​—Miteko s’Arummwa 5:29.

Mareeliho Anikhumelela Mwaha wa Wiiwelela Ntoko Kristu

22. Yesu aakhunle nikoho xeeni, ni moota xeeni?

²² Okathi Yesu aahala awe okhwa, wiiwelela wawe waheehereriwa vanceenexa. Nihiku nne nooriipiha murima, ‘[owo] ahìxutta wìwelela’ mmukhalelo woomalela. Yesu aahipaka yootthuna ya Tiithi awe, ohiya yootthuna awe. (Luka 22:42) Mwaha woopaka eyo, Yesu ookhalana myaha soolempwa seiyo sinihimya ororomeleya wawe. (1 Timótheyo 3:16) Oovaha waakhula wa nikoho naakumiheriwe khalai. Niireke wira pinaatamu oottheka anvikaniha okhala oororomeleya wa Yehova, hata eehereriwaka? Adamu ni Eva yaahittheka. Nuumala vo, Yesu aahirwa valaponi, khukhala, khukhwa ni aahivaha waakhula woomalela wa mwaha owo. Yesu yoowo onivikana soopattuxiwa sotheene sa Yehova, aahivaha waakhula wuulupalexa ni woophwanelela. Yesu aahiiwelela mpakha okhwa.

23-25. (a) Moota xeeni wiiwelela onivarihana aya ni ororomeleya? Mulikanyiherye. (b) Mwaha xeeni onrowa othokoreriwa mmuru onittharelana?

²³ Ororomeleya aahiiso wiivahererya wahu wa Yehova ni murima wotheene, onnoonihereya orweela mwa wiiwelela. Mwaha woowi Yesu aahiiwelela, owo aahisuka ororomeleya wawe ni aahaaphwanyiha mureerelo apinaatamu otheene. (aRoma 5:19) Yehova aahimutthuvela vanceenexa Yesu. Akhala wira nnoomwiiwelela Pwiya ahu Kristu, Yehova onrowa onreeliha-tho. Omwiiwelela Kristu onniroiha “wopowa wohimala”!​—aHéberi 5:9.

²⁴ Nave-tho, okhala oororomeleya onnikumiherya mareeliho. Eliivuru ya Miruku 10:9 enihimya wira: “Ole onetta voloka, khanova etthu yotakhala”. Vaakhanle wira ororomeleya waarowa olikanyihiwa ni empa yuulupale etekiwe ni ituupu sooloka, nto khuta ekwaha eniiwelela ahu pooti olikanyihiwaka ni etuupu. Etuupu emosa pooti wooneyaka okhala etthu ehinivareleya muteko, masi khuta etuupu yookhalana nipuro naya, ni efaita aya. Nto, vaavo vaniilaanyeriwa aya ituupu sinceene wira etekiwe empa, vano ennitekiwa empa yuulupale ni yooreera. Vaavo khuta nihiku ni khuta mwaakha vanooniherya ahu miteko sa wiiwelela, hiyo ninnikhalana ororomeleya woolipa onlikanyihiwa ni empa.

²⁵ Mweettelo wa wiiwelela yoowo onooniherya ahu okhuma khalai onninuupuxerya mukhalelo mukina, eyo piiyo, ovilela. Ovilela, weiwo Yesu oonihenrya awe, ti mwaha onrowa othokoreriwa mmuru onittharelana.