Yesu Aahilaleya Ihapari sa Muluku

Nuumala obatiziwa, Yesu aahipacerya olaleerya ohimyaka so: ‘Omwene wa Muluku ori vakhiviru!’ Awiixutti yaanimutthara vaavo aarowa awe mittetthe sa oGalileya ni oYudeya. Okathi aatthikenle awe elapo awe oNazarethi, aahikela muSinagoga, aahikhunula eroolu ya profeta Yesaya, ni aahisoma mowiiwanyeya masu anihimya so: ‘Yehova ookivaha munepa awe wootteela wira kilaleye ehapari yooreera’. Eyo yaataphulela exeeni? Yaataphulela wira nnaamwi atthu yaaphavela omoona Yesu opakaka miiriirya, masi owo aakhenle munepa wootteela wira olaleeryeke ehapari yooreera. Nuumala-vo aahaaleela atthu wira: ‘Olelo ehiiraneya eprofesia ela’.

Yesu aahirowa Ophareya ya oGalileya, ni aahaaphwanya alopwana 4 yaawo yaari atothi a ihopa. Yesu aahiwiirela wira: ‘Nrowe mukitthareke. Miyo kinimokhalihani atothi a atthu’. Masina aya taala: Pedru, Andreya, Yakobo, ni Yohani. Moohipisa yaahimuhiya nakoso aya a ihopa ni yaahimutthara Yesu. Awo yaanivira mittetthe sotheene sa oGalileya, elaleyaka Omwene wa Yehova. Yaanilaleya muSinagoga, mapuro iiriwa nakoso, ni mphironi. Atthu anceene yanaatthara khula opuro yaarowa aya. Ovuwa wa Yesu waahimwareela mittetthe sotheene, ohela muhina elapo yoorakamela ya oSiria.

Nuuvira okathi, Yesu aahaavaha owerya awiixutti awe akina wira yaavoniheke aretta ni yoomoleke malaikha ootakhala. Akina yaanimutthara vaavo aalaleerya awe khula epooma ni khula muttetthe. Nave athiyana anceene oowaamini, omuhela muhina Maria Madalena, Yohana, Susana ni akina, yaanimukhaliherya Yesu ni awiixutti awe.

Nuumala Yesu owiixuttiha awiixutti awe, aahaaruma orowa olaleerya. Vaavo awo yaalaleerya aya mittetthe sa oGalileya, atthu anceene yaanikhala-tho awiixutti ni yaanibatiziwa. Nto atthu anceene yaaniphavela okhala awiixutti a Yesu. Tivonto owo aalikanyinhe awe ni mihokorokho sa mmatta saaphiyale okathi aya woohemphwa. Owo aahimmye so: ‘Munvekele Yehova wira aarume anamuteko akina mmatta mwawe’. Muhoolo mwaya aahaathanla awiixutti 70 ni aahaaruma anli-anli orowa olaleerya oYudeya wotheene. Awo yaaniwiixuttiha atthu otheene voohimya sa Omwene. Okathi awiixutti yaatthinke aya, yaahitteeliwa murima ni yaahiphavela omuleela Yesu itthu siiraneyale. Hata Diabo khaawerya waakhoottiherya olaleerya.

Yesu aahipaka sotheene wira awiixutti awe awerye ovikaniha ovara muteko ole wootthuneya nuumala owo otthikela wiirimu. Owo aahaahimeerya wira: ‘Mwaalaleerye atthu a ilapo sotheene ihapari sooreera. Mwawiixuttihe Nuulumo na Yehova ni mwaabatize’.