Yesu Aahilaleerya Mittetthe Sikina sa oGalileya

Yesu ni awiixutti awe 4, yaahaatteliwa miteko soovara oKafarnawu. Nsuwa nikelaka, atthu a oKafarnawu yaahaaruuha aretta aya wira avonihiwe. Yesu khaarina okathi wookhala mekhawe.

Vano, nlelo vahinatthi oxa oratteene, Yesu aahivenya onarowa nipuro nahaakhanle atthu wira onvekele Tiithi awe. Masi Yesu aakhanle mekhawe okathi vakhaani paahi. Vaavo yahaamoonale aya Yesu, “Simoni n’ale yarinawe” yaahirowa omwaavya. Okhala wira Yesu aari vatthokoni va Pedru, woonasa wene Pedru taapacenrye omphavelasa Yesu.​—Marko 1:36; Luka 4:38.

Nto vaavo yamphwannye aya Yesu, Pedru aahimmye so: “Atthu othene annophavelani!” (Marko 1:37) Tthiri atthu a oKafarnawu yaaphavela okhala ni Yesu. Nto mwaha wooxukhurela itthu Yesu aapanke awe, awo “yanimukhanyereriha wira ahahiyé-tho”. (Luka 4:42) Masi, niireke Yesu aarwenle opaka miiriirya paahi sa waapenuxa atthu? Niireke aarowa opaka itthu sootikiniha muttetthe yoole paahi? Yesu aahimmye exeeni?

Yesu aahaaleela atthareli awe wira: “Nrowé okinaku, mittetthe sowattamela, wira weiwo-tho kalaleye ehapari yorera: p’itthu kirwenlyaka yeyo”. Tthiri, hata atthu ale yanvekenle Yesu wira okhale ni yaawo owo aahimmye so: “Kihana olaleya ehapari yorera y’Omwene wa Muluku mittetthe sikina-tho: p’itthu kirwenlyaka”.​—Marko 1:38; Luka 4:43.

Tthiri etthu yuulupale Yesu aarwenle awe valaponi waari olaleya Omwene wa Muluku. Omwene owo onrowa otteeliha nsina na Tiithi awe ni omaliha mixankiho sotheene sa apinaatamu. Nave Yesu aahooniherya wira aarummwale ni Muluku vaavo aapanke awe miiriirya sa waavoniha atthu. Moolikanasa, iseekulu sinceene saavinre, Moise aahipaka itthu sootikiniha wira owiirihe atthu ale okupali wira aarummwale ni Muluku.—Okhuma 4:1-9, 30, 31.

Tivonto, Yesu ni awiixutti awe yaahikhuma oKafarnawu anarowa olaleerya mittetthe sikina. Awiixutti awo 4, ti Pedru ni munnawe Andreya, Yohani ni munnawe Yakobo. Esumana emosa vahinatthi, awo yaahilattuliwa ni Yesu wira yavareke ni yena.

Muteko woolaleerya wa Yesu oGalileya ni awiixutti awe 4 waahikhumela saana! Tthiri, muteko woolaleerya wa Yesu waahaaphwanya atthu yaakhala ottaiwene. Nto “ovuwa wawe wahimwarela mulaponi mothene m’oSiria”, mittetthe sa oDekaapoli ni mittetthe sotheene sa Muro Yordani. (Matheyo 4:24, 25) Muttitthi wa atthu waakhuma mittetthe iyo ni ale yaakhuma oYudeya yaahimutthara Yesu ni awiixutti awe. Nto atthu anceene yanaaruuha aretta aya wira apenuxiwe. Yesu khaavariha mwala maana aahaavoniha aretta ale ni woomola malaikha ootakhala yaavanre atthu.