Mwene Aahikela oYerusalemu Onwenle Ene Mwaabuuru

Nihiku naattharelana, yaari Ettiminku 9 a Nisani, Yesu aahikhuma ni awiixutti awe oBethania orowaka oYerusalemu. Yaattamelaka oBethifage Omwaako Olivera, Yesu aahaaruma awiixutti awe anli.

Yesu aahimmye so: “Murowé muttetthe ori oholo iwe. Mphiyakaru-wo, munomphwanya bùru mwamuthiyana atthukeleliwene: ori ni mwaxan’awe. Mwamutaphule, mukiruhele va. Akhalá onokohani etthu, mmwakhule wira: ‘Apwiya t’anaphavela. Animwahokoloxa nanano’”.​—Matheyo 21:2, 3.

Awiixutti a Yesu khiyaasuwenle wira malakiheryo a Yesu yaahela muhina eprofesia ya mBiibiliyani. Masi muhoolo mwaha, yaamusuwela wiiraneya wa eprofesia ya Zakariya. Owo aahihimya vahinatthi wira Muluku aahileiherya wira Mwene toowiiyeviha ni aarowa okela oYerusalemu “anwenlene bùru mwamukhani”.​—Zakariya 9:9.

Okathi awiixutti ale yaaphiyale aya oBethifage anamukuxa mwaabuuru ni maama awe, atthu yaattamenle yaahaakoha wira: “Exen’iyo enìranyu vo? Munimutaphule-ni mwabùr’uwo?” (Marko 11:5) Nto nuumala osuwela wira mwaabuuru ole aarohiwa wa Pwiya, awo yaahaahiya awiixutti amukuxaka. Awiixutti yaahirula nlaya naya na ota anapweha vasulu va buuru ni mwaabuuru. Masi Yesu anwenle mwaabuuru.

Vaavo Yesu aattamela awe oYerusalemu onwenle ene mwaabuuru, muttitthi waanincerereya. Atthu anceene yaanaatala malaya aya mphironi. Akina yahaatala iritta sa miri aahiiso “makukhu a miri yantaya mmatta”. Awo yaanikhuwela ariki: “Avuwihiwe Muluku! Attottopeliwe owo onrwa ni nsina n’Apwiya! Orerihiwe Omwene wa tith’ihu, Davidi, ohanle orwa”. (Marko 11:8-10) Vano aFarisi yaari eriyari ya muttitthi ole, yaahinyoonyiwa ni moolumo awo. Nto yaahimuleela Yesu wira: “Mwixuttihi! Mwamàlihe awixutti anyu!” Vano Yesu aawaakhunle wira: “Kinohimeryani wira, awo yamàlaru, maluku t’anrowa okhuwela!”—Luka 19:39, 40.

Vaavo Yesu aawenhe awe muttetthe wa oYerusalemu, aahipacerya wunla oriki: “Weyo-tho wasuwenle olelo entthuna woruhela murettele . . . Nto vano etthu yeyo onnojela wona”. Yerusalemu aarowa ohukhummwa mwaha wa ohiiwelela wawe. Nto Yesu aahihimya vahinatthi wira: “Awanani awo animorukurerya wira yotuphele, animophunyererya mipantte sothene. Awo animonyakatta weyo vamosá n’atthu awo: khanohiyerya nnákhala nluku nimosá vasulu va nikhwaya”. (Luka 19:42-44) Mwekeekhai, masu a Yesu voohimya sa opwetexiwa wa Yerusalemu yaahiiraneya mwaakha wa 70 EC.

Vaavo Yesu aakenle awe oYerusalemu, “atthu othene a mmuttettheni yahekeseya, yanikohana wira: T’ani ula?” Nave atthu ale yaahivikaniha ohimya wira: “Ola ti profeta Yesu, onkhuma oNazarethi w’oGalileya”. (Matheyo 21:10, 11) Akina yaari muttitthi ole, yaawo yanwenhe Yesu omuhihimuxaka Laazaro, yaahaaleela atthu akina mwiiriirya ole. AFarisi yaahiikhupanyerya maana atthu anceene yaanimwaamini Yesu. Vano aFarisi yaanihimeeryana wira: “Mone: atthu othene animutthara!”​—Yohani 12:18, 19.

Ntoko aalimalenle awe oxukurya oYerusalemu, Yesu aahirowa wiixuttiha otemplo. Mpaani mme aahinvoniha mutthu mmosa ahoona ni mukina aarakanle. Mukhulupale aanamukuttho ni alipa-oolepa yaahinanariwa nuumala oweha ele Yesu aapaka awe ni wiiwa okhuwela wa anamwane mutemplo ariki: “Avuwíhiwe Mwana a Davidi!” Nto ahooleli a itiini yaahimukoha Yesu wira: “Munnìwa sinihimyaya ala?” Yesu aahiwaakhula wira: “Khamunasome silempwaya wira: ‘Ni masu ànamwane, ale anetta n’ale a mmatatani, muhìlikanyiherya ovuwa’?”​—Matheyo 21:15, 16.

Vano Yesu aahiweha itthu saari mutemplo. Nuuvira okathi, Yesu aahikhuma ni arummwa awe. Yesu aahitthikela oBethania, nihinatthi opacerya nihiku 10 na Nisani, weiwo aavirinhe awe ohiyu wa Ettiminku.