1. Yesu ti pani?

Yesu nlaikha noowerya ninkhala wiirimu. Ohinatthi opattuxa itthu sikina, Yehova ampattunxe Yesu. Tivonto Biibiliya onihimya awe wira Yesu “topacenrye opattuxiwa mwa itthu sotheene”. (aKolosi 1:15) Nave Biibiliya onnimuhimya Yesu okhala ‘Mwaana mmoseene’a a Muluku. (Nwehe enoota.) Mwaha woowi Yesu paahi topattuxiwe ni mwaneene ene Yehova. (Yohani 3:16) Yesu aavara vamosa ni Tiithi awe Yehova omukhaliheryaka opattuxa itthu sootheene sikhanle. (Musome Miruku 8:30.) Tthiri Yehova ni Yesu yaaniphentana vanceene, eyo enooniherya wira Yesu ookhalana waataana wooloka ni Yehova. Nave Yesu namitthaka oororomeleya a Yehova, eyo enooniherya wira onnivaha mihupi ni malakiheryo a Yehova. Tivonto Biibiliya onimuhimya awe Yesu okhala “Nsu”.—Yohani 1:14.

Hiyo na anatampi, ninnihaawa ni ninnookhwa mwaha woowi Adamu ni Eva khiyaamwiiwelenle Muluku.a (Nwehe enoota.) Masi khanirimenle. Maana Yehova oomuruma Mwanawe Yesu Kristu wira onoopole etampi ni okhwa. Biibiliya onihimya wira mwaha wa okhwa wa Yesu ooliverya yowoopola. Masi yowoopola exeeni? Yowoopola esisapo mutthu oniliva awe wira omoopole mutthu mukina. Nto Yesu aahiliva esisapo eyo, vaavo aavanhe awe okumi awe woomalela. (Mmusome Matheyo 20:28.) Yesu aahileva ehakhi aarina awe ya okhala mahiku otheene valaponi. Nto mwaha woopaka eyo, owo oonikhaliherya ophwanya ele Adamu ni Eva yaapweteiwale aya. Nave okhwa wa Yesu onnooniherya oratteene wira Yehova ni Yesu anniniphenta vanceene. Yoosoma ela, enimookhaliheryani wuncererya oxukhurela wanyu mukuttho wowoopola wa Yesu.

1. Olelo-va okhwa wa Yesu onniphwanyiha mireerelo xeeni?

Okhala wira na anatampi, ninnipaka itthu sinceene sihinimusivela Yehova. Masi mwaha wa ele Yesu opanke awe nnoowerya oleveleliwa itampi sahu. Nto wira nileveleliwe nihaana ottharuwa ni murima wotheene, onvekela Yehova ni wiimananiha ohitthikela opaka soovonya simosaru. Akhala wira nnoopaka eyo, nnookhalana waataana wooloka ni Yehova. (1 Yohani 2:1) Biibiliya onihimya wira: “Kristu, yoowo ori naxariya, ohookhwa ekwaha emosa paahi, mwaha wa itampi sa atthu ahikhanle anaxariya, wira ooroiheni wa Muluku”.—1 Pedru 3:18.

2. Okhwa wa Yesu onrowa oniphwanyiha mireerelo xeeni muhoolo?

Yehova aahimuruma Yesu orwa valaponi wira ovahe okumi awe woomalela “wira otheene ale anooniherya omwaamini yoowo, ahipwetexiwe, masi akhalane okumi woohimala”. (Yohani 3:16) Orumeelaka mukuttho wowoopola wa Yesu, Yehova onoomaliha itthu sotheene soohiloka sikhumelenle mwaha wa ohiiwelela wa Adamu. Eyo enooniherya wira akhala wira nnimwaamini mukuttho wa Yesu, ninrowa ohakalalaka ni okhala mahiku otheene mparayiisu valaponi!—Yesaya 65:21-23.

MWIIXUTTE ITTHU SIKINA

3. Mukuttho wa Yesu onninoopola etampi ni okhwa

EVIIDIYU: Exeeni Yaamwiirinhe Yesu Okhwa?—Mpantta 1 (2:01)

• Etthu xeeni Adamu ni Eva yaayelenle aya nuumala ohimwiiwelela Muluku?

Mmusome aRoma 5:12, nuumala-vo mwaakhule nikoho ninttharelana:

• Etthu xeeni ekhumelenle mwaha wa etampi ya Adamu?

Mmusome Yohani 3:16, nuumala-vo mwaakhule nikoho ninttharelana:

• Exeeni yaamwiirinhe Yehova omuruma Mwanawe orwa valaponi?

1. Adamu aari mutthu oomalela, mwaha wa ohimwiiwelela Muluku, apinaatamu otheene aattheka ni annookhwa

2. Yesu aari mutthu oomalela, nto mwaha wa omwiiwelela Muluku, apinaatamu otheene anoowerya ophwanya okumi wooloka ni woohimala

4. Okhwa wa Yesu onnaaphwanyiha mireerelo atthu otheene

EVIIDIYU: Exeeni Yaamwiirinhe Yesu Okhwa?—Mpantta 2 (2:00)

• Vaniweryaneya sai okhwa wa mutthu mmosa owoopola atthu otheene?

Mmusome 1 Timootheyo 2:5, 6, nuumala-vo mwaakhule nikoho ninttharelana:

• Adamu aari mutthu oomalela, masi mwaha wa etampi awe, apinaatamu otheene aattheka ni annookhwa. Nave Yesu aari mutthu oomalela. Nto owenrye sai ovaha “yoowoopola, yeeyo eniphiyerya”?

5. Yowoopola yoovaha enikhuma wa Yehova

Apatthani a Yehova annithokorerya yowoopola okhala yoovaha ya vameekhaaya. Mwa ntakiheryo, mmusome aGalasia 2:20, nuumala-vo mwaakhule nikoho ninttharelana:

• Moota xeeni murummwa Paulo aathokorerya awe yowoopola okhala yoovaha enikhuma wa Muluku?

Nuumala Adamu ottheka, osuulu aya wotheene onnookhwa. Masi Yehova oovaha okumi wa Mwanawe wira niphwanye okumi woohimala.

Nkahaya muupuwele moota Yehova oonela awe vaavo anweha awe mwanawe ohaawaka. Mmusome Yohani 19:1-7, 16-18, nuumala-vo mwaakhule nikoho ninttharelana:

• Nyuwo munoonela sai ele Yehova ni Yesu apanke aya?

IPONTO SUULUPALE

Okhwa wa Yesu onnimwiiriha Yehova waalevelela atthu itampi. Nave okhwa wa Yesu onninivaha eparakha ya okhala mahiku otheene.

Wuuluula

• Xeeni Yesu ohalaka okhwa?

• Vaniweryaneya sai erutthu yoomalela ya Yesu okhala mukuttho oniphiyerya owoopola apinaatamu otheene?

• Okhwa wa Yesu onoophwanyihani mireerelo xeeni?

NWEHE ITTHU SIKINA

Nwehe etthu eniiriha okumi woomalela wa Yesu ohimmwaka okhala yowoopola.

“Moota Xeeni Mukuttho wa Yesu Oniwoopola Aya Atthu Anceene? (Mwaha ori va jw.org)

Niwehe etthu ninreerela ahu opaka wira noopowe.

“Yesu Onooponle Sai?” (Mwaha ori va jw.org)

Niireke Yehova onnilevelela itampi?

“Waakhuliwa wa Makoho Voohimya sa Biibiliya” (Owehaweha, 1 a Maio, 2013)

Nwehe moota mukuttho wa Yesu waamukhalihenrye aya mulopwana mmosa orukunuxa omutthu awe wiixutta voohimya sa mukuttho wowoopola wa Yesu.

“Koohiya Otakhala Murima” (Mwaha ori va jw.org)

1. Ninrowa wooniherya sai wira ninnixukhurela vanceene ele Muluku ni Kristu anipakenle aya?

Biibiliya onihimya wira “otheene ale anooniherya omwaamini [Yesu]” anoophwanya okumi woohimala. (Yohani 3:16) Masi ontaphulela exeeni wooniherya waamini? Wira nooniherye wira ninnaamini, nihaana opaka etthu ekina ohiya paahi ohimya wira ninnimukupali Yesu. Maana nihaana wooniherya waamini wahu ni soothanla sahu ni miteko sahu. (Yakobo 2:17) Vaavo nnooniherya ahu waamini wahu ni miteko ni itthu nimpaka ahu, hiyo ninnilipiha waataana wahu ni Yesu vamosa ni Tiithi awe, Yehova.—Mmusome Yohani 14:21.