Aahaalyiha Atthu Anceene ni Iphaawu ni Ihopa Vakhaani

Nuumala olaleerya oGalileya, arummwa 12 khiyaareere ohakalala. Nto yaahirowa omuleela Yesu “sothene sìralyaya ni sixuttihalyaya”. Ekeekhai wira yaahikhulumuwa. Masi khiyaarina okathi wira alye okhala wira atthu anceene yaanoorwa ni yaanirowa. Tivonto Yesu aalenle awe wira: “Nyuwano murwé wiphini, nipuro nihinviraviriwa: mwamumule vakhani”.​—Marko 6:30, 31.

Nuumala owela ekalawa, woonasa wene waattamela oKafarnawu, yaahirowa onikhuma nsuwa wa Muro Yordani mpantta mukina wa oBethisaida. Masi atthu anceene yaahaaweha akhumaka nave akina yaahisuwela eyo. Atthu ale yaahipacerya ophiya ekalawa ehinatthi.

Vaavo Yesu aakhuruwa awe mukalawani, aahaaweha atthu ale khuwoonela othunku, maana yaari ntoko ipwittipwitthi sihirina makampusi aya. Tivonto, aahipacerya “owixuttiha itthu sinjene” voohimya sa Omwene. (Marko 6:34) Nave “anavoniha ale yawereiwa”. (Luka 9:11) Vaavo okathi waavira aya, awiixutti yaahimuleela wira: “Vahanle wila: nipuro nla mothakoní. Mwamwarye atthu ala, erowase mmawani, yathume yolya”.​—Matheyo 14:15.

Yesu aahiwaakhula wira: “Ehikhanyererihiwé orowa: mwavahe yenyu yolya!” (Matheyo 14:16) Nnaamwi Yesu aasuwela ele aarowa awe opaka, aahimweehererya Filipi, omukohaka wira: “Ninrowa othuma vai iphau, wira atthu ala othene elyé?” Filipi taakohiwa maana aakhala waattamela oBethisaida. Masi othuma iphaawu khiwaarowa omaliha muxankiho ole. Maana yaahikhala alopwana 5.000. Nave yaahikhala athiyana ni anamwane! Nto Filipi aahaakhula oriki: “Musurukhu idenario miloko miloko mili [edenaario emoosa waari musurukhu aaliviwa namuteko nihiku nimosa] khumphiyerya othumela iphau s’onvaha nipattuxa nimosa khula mutthu”.​—Yohani 6:5-7.

Woonasa wene, ophavelaka wooniherya wira khivaaweryaneya waalyiha atthu ale otheene, Andreya aahimmye so: “Okhala va mwammiravo, orina iphau thanu n’ihopa pili ixikhani. Nto siniphiyerya-ni w’atthu òwatta sisa?”​—Yohani 6:9.

Waari okathi wa ephovo ohinatthi Paasikha a 32 EC, okerekhere wa mwaako khiyaareere malaxi ooripelela. Yesu aahaaruma awiixutti awe waaleela atthu ale wira akilaathi vamalaxini igrupu sa atthu 50 ni 100. Yesu aahikuxa iphaawu iye 5 ni ihopa piili khumuxukhuru Muluku. Nuumala-vo, aahikawanya iphaawu ni ihopa iye. Nto aahaavaha awiixutti awe wira yaakaweleke atthu. Mootikiniha, atthu otheene yaahilya mpakha ovona!

Muhoolo mwaya, Yesu aahaaleela awiixutti awe wira: “Muttottele mapattuxa ahanle, wira ehirimelé etthu”. (Yohani 6:12) Iphaawu iye yaattottenle aya saahisarya ithokwa 12!