MMWAATTAMELE MULUKU
Niireke Yehova Onnookhapelelani Tthiri?
“Muupuwelo woowiixoona ohikhalana efaita ori muxankiho muulupale yoowo kiniimananiha aka oxintta”. Masu ala yaalavuliwe ni muthiyana mmosa yoowo oona okhala woovila okupali wira Yehova aarowa omukhapelela. Niireke ni nyuwo munuupuwela siiso? Akhala ti siiso, nyuwo pooti wiikoha so: ‘Niireke tthiri Yehova onnimuthokorerya khuta mmosa a arumeyi awe?’ Waakhuliwa waya ti: aayo! Hiyo ninnisuwela eyo orweela wa masu a Yesu.—Mmusome Yohani 6:44.
Exeeni Yesu aahimyale awe yoowo onisuwela saana omutthu ni yootthuna ya Yehova waavikana atthu otheene? (Luka 10:22) Owo ahimmye so: “Khavo onwerya okirwela, ahithanliwe n’Atithi akirumme”. Tivonto, hiyo khaninwerya okhala atthareli a Kristu, ni omukokhorela Tiithi ahu a wiirimu, Yehova, voohikhala Yehova onithanla. (2 aTesalonika 2:13) Akhala wira ninniiwexexa ele Yesu aahimya awe, nto nnimoona moolumo awe okhala onamoona muulupale wa othokorerya wa Muluku wa khula mmosa a hiyo.
Onitaphulela exeeni othanliwa ni Yehova? Nuulumo na Egriki nintaphuleliwa “othanla” ninnirumeeliwa-tho ntoko nthoonyeryo na mutthu onipurulela ota ntthavi na ihopa. (Yohani 21:6, 11) Niireke Yehova onninipurula wala onikhanyererya wira nimurumeele? Nnaari. Yehova oonivaha mukhalelo wa othanla mootaphuwa, nto owo khonnikhanyererya omurumeela. (Otumererya 30:19, 20) Musuweli mmosa a myaha soolempwa ahimmye so: “Khiivo etthu eniwerya otthukula wala owala murima wa apinaatamu. Owo ohaana ohuleya mmansawe”. Yehova onnitokosa mirima sa atthu ibilyau sinceene olumwenku ola, owaavyaka atthu aarina mweettelo wooloka vamaithoni vawe. (1 Wahala 28:9) Nto vaavo onimphwanya awe mutthu owo, onnimukhaliherya moovara murima. Moota xeeni?
Yehova mooreera murima onnithanla, wala ovara mirima sa khula mutthu oniphavela omurumeela ni murima wotheene. (Miteko 13:48) Yehova onnipaka eyo mwa inamuna piili: Orweela mwa Biibiliya ntoko ihapari sooreera seiyo sinimphwanya khula mmosa a hiyo, ni orweela mwa munepa awe wootteela. Vaavo Yehova oniweha awe wira murima wa mutthu onnaakhulela ekeekhai ya Biibiliya, owo onirumeela munepa awe wootteela wira omukhaliherye mutthu owo wira iiwexexe ni ovarihele muteko ikeekhai sa mBiibiliyani mweekumini mwawe. (1 aKorinto 2:11, 12) Voohikhala nikhaliheryo na Muluku, hiyo khinaarowa owerya okhala atthareli a Yesu ni okhala arumeyi oororomeleya a Yehova.
Nto exeeni, moolumo a Yesu a Yohani 6:44 anniixuttiha aya voohimya sa Yehova Muluku? Yehova onnaathanla atthu mwaha woowi onniweha etthu yooloka vamurimani vaya ni onnimuthokorerya khula mutthu. Wiiwexexa saana ekeekhai ela yootthuneya, yaahimulipiha muthiyana ole ohimmwale wanipacerya wa mwaha ola. Owo onihimya so: “Okhala murumeyi a Yehova, eparakha yuulupalexa yeeyo khula mutthu okhanle awe oophwanya. Nto akhala wira Yehova ookithanla wira kikhale murumeyi awe, eyo enitaphulela wira owo onnikiphenta”. Ankhi nyuwo munuupuwela sai? Niireke osuwela wira Yehova onnimuthokorerya khula mmosa a arumeyi awe onniwiirihani ophavela omwaattamela?
Malakiheryo a omusoma Biibiliya, Maio
[Eponto yuulupale ya epaaxina 14]
“Khiivo etthu eniwerya otthukula wala owala murima wa apinaatamu. Owo ohaana ohuleya mmansawe”